“Арслан хүлэг баатар” жүжгийн гол дүр болох Алагдай хүүгийн дүрийг бүтээсэн Хүүхэд, залуучуудын театрын залуу жүжигчин Э.Дөлгөөнийг урьж, тус жүжгийн талаар цөөн хором ярилцлаа.

        Тус жүжгийн зохиолыг Д.Нацагдоржийн нэрэмжит болон МЗЭ-ийн шагналт Н.Сүхдорж бичиж, СТА Б.Энхээ найруулжээ.

-Сайн байна уу. Та манай уншигчдад өөрийгөө танилцуулаач?

          -Сайн байна уу. Танай уншигчдад болон танд энэ өдрийн мэндийг хүргэе. Намайг Энхсайханы Дөлгөөн гэдэг. Улсын Хүүхэд Залуучуудын Театрт жүжигчнээр ажилдаг. Би СУИС-ийн Театр Урлагийн Сургуулийг МУГЗ Б. Отгонбат багшийнхаа удирдлага дор 2022 онд төгссөн. Өмнө нь эзэмшсэн мэргэжлээрээ ажиллаж байгаагүй ээ. Анхны ажил, анхны хамт олон, анхны уран бүтээл, анхны гол дүр ер нь энэ ажилдаа ороод бүх зүйл анхны удаа болохоор догдолж байна.

-“Арслан хүлэгт баатар” жүжгийн талаар яриа дэлгэвэл?

            -"Арслан хүлэгт баатар" жүжиг маань үзэгдэл болгон нь хүүхдүүдийг уйдаахааргүй жүжиг болсон байгаа. Тайз, дуу, дүр, хувцас гээд бүх зүйлс нь маш сонирхолтой хүүхдүүд үнэхээр гүн орж үзнэ гэдэгт итгэлтэй байна. Хурдхан шиг хүүхдүүдтэйгээ уулзаж мянга мянган хүүхдүүдийг өөрсдийнхөө бүтээсэн ертөнцөд автуулах гээд тэсэн ядан хүлээж байна даа.

-Таны дүрийн тухайд?

          -Миний дүрийн нэрийг Алагдай хүү гэдэг. Сэргэлэн цовоо, эрдэм номтой жаахан дүрсгүй хүүгийн тийм дүр байгаа. Гэхдээ сайн талаараа шүү.

-Энэ жүжгээр дамжуулан хүүхдэд юуг ойлгуулах бол?

-Сурсан бүхэн чинь эрдэм шүү. Их бага гэж гололгүй байнга сурч, суралцаж яваарай. Эрдэм мэдлэг хамгийн чухлыг ойлгуулахыг хичээсэн.

-Хүүхдийн жүжигт тоглоход хүндрэлтэй зүйл гарч байна уу?

            -Анх бэлтгэлийн үеэр айдастай байсан юуг нь нуухав. Би чадах болов уу.  Нэг удаагийн тоглолтыг 760 хүүхэд үзнэ. Тэр олон үзэгчийг  би барьж чадах болов уу гэсэн түгшүүр бол зөндөө байсан. Одоо бол эсрэгээрээ тайзан дээр би үнэхээр жаргаж тоглож байгаа. Тэр хүүхдүүдийн үнэн нүдийг тайзан дээрээс харах ямар гоё ямар их хүч өгдөг гээч.  Өдөрт зургаан удаа тоглосон ч ядрахгүй байх.

-Театрын юунд татагдаж ажиллах болсон бэ?

            -2015 онд УДЭТ-д "Ромео Жульетта" үзээд театр гэдэг гайхалтай ордонд татагдаж, дурлаж, шунаж, эхэлж байсан. Төгсөөд УДЭТ-д шалгалт өгөх гэсэн чинь. Энэ жил авахгүй дараа жил авна гээд бүтэн нэг жил гэртээ хүлээсэндээ. Тэгж хүлээсний ачаар УХЗТ-даа орсондоо. Өө нээрээ хамгийн их татагдсан зүйл нь уран бүтээлчид маань бүгд үе тэнгийн шижигнэсэн залуучууд, байгаа нь л юм даа.

-Өөрийгөө нэг үлгэрийн баатартай зүйрлээч?

          -Намайг бага байхад найзууд маань Долоон одойгийн хамгийн бага дэлдэн чихтэй одоотой нь адилхан гэдэг байсан.

-Өмнө бүжгийн хамтлагт байсан юм билээ. Тэр талаар яриа дэлгээч?

         -“Aim4r Production”-ний харьяа "Assassins" гэдэг хамтлагт бүжиглэж байсан. Анх бол өөрийгөө хөгжүүлж задлах зорилгоор бүжиглэж эхэлсэн. Гэхдээ би таг мод байсан гэвэл итгэх үү, зарим хүмүүст хэлэхээр итгэдэггүй юм. Тэгээд 2018 онд “Авьяаслаг Монголчууд” шоунд хамтлагаараа оролцож байсан. Тэр үеэс хойш хамтлагаасаа гарсан. Соёл Урлагийн Их Сургуульд сурахын хажуугаар бүжиглэх гэхээр төдийлөн цаг амжихгүй байсан юм.

-Таны хүүхэд нас хаана, хэрхэн өнгөрсөн бэ. Гэр бүлийнхээ талаар ярьж болох уу

                -Болно оо. Манай ээж Англи Улсад ажиллангаа амьдардаг. Аав болохоор Америкт ажиллаж, амьдардаг. Бараг л хоёр настайгаасаа хойш эмээ, өвөөтэйгөө өссөн. Манай өвөө Монгол Улсын Гавьяат нисгэгч Д.Пүрэвдорж. Харин эмээ маань МУСТА Хилийн цэргийн дуучин  Ч.Огтоо гэх хүмүүс байдаг. Өвөө эмээ хоёртоо энэ завшааныг ашиглаад баярлалаа гэж хэлэх гэсэн юм. Та хоёрынхоо ачаар хүү нь өдий зэрэгтэй яваа шүү.

-Цаашдаа ямар дүрд өөрийгөө сорих бодолтой байдаг вэ?

           -Би эсрэг дүр дээр л ажиллаж өөрийгөө соримоор байна. Өөрөө зөөлөн, даруу, дөлгөөхөн хүн болохоор ч тэр юм уу эсрэг дүр дээр л ажилламаар санагдаад байдаг юм. Гэхдээ театрынхаа гурав дахь уран бүтээл болох "18 дахь хаврын хайр" гэх жүжиг дээр эсрэг талын гол дүр авсан байгаа.  Энд л өөрийгөө сорьж үзнэ дээ.

-Ярилцсанд баярлалаа.                                                                                             

                -Баярлалаа. “Арслан хүлэгт баатар” жүжиг маань тавдугаар сарын 27-наас зургадугаар сарын 02-ны өдөр хүртэл Хүүхэд, залуучуудын театрт тоглогдоно. Та бүхэн өргөнөөр ирж үзээрэй.