Гаалийн байцаагчдын аалзны сүлжээ шиг авлигын схем задарчээ. Хууль хяналтын байгууллага 40 орчим гаалийн улсын байцаагчийг яллагдагчаар татан шалгаж байгаа талаар эх сурвалж мэдээллээ.

     Монгол Улсын хил, гааль өнгөрчээ. Хахууль өгөхгүй бол хилээр гаргадаггүй, гаалийн бүрдүүлэлт хийдэггүй гэдийгээд суучихдаг хэдэн байцаагчтай болсон байна. Байна ч гэж угаасаа байсан гэдгийг учир мэдэх хүмүүс баримтаар хэлэх биз ээ. Энэ нь ч хууль хяналтын байгууллагын хараанд өртөж, сүүлийн хэдэн жил гаалийн байцаагчдыг цаг тутам шалгаж байжээ. Энэ шалгалтад одоогийн байдлаар 40 орчим гаалийн улсын байцаагч бүдэрч, хууль хяналтын байгууллагад ээрэгдэж байгаа нь энэ гэнэ. Хамгийн сүүлд гэхэд гаалийн улсын байцаагч Н-г Сонгинохайрхан дүүргийн нутаг дэвсгэрт хахууль авч байхад нь үйлдэл дээр нь саатуулж хойшлуулшгүйгээр баривчилсан байдаг. Гаалийн улсын байцаагч Н нь эрх мэдэл, албан тушаалын байдлаа урвуулан ашиглаж, нэр бүхий тээвэр зуучийн үйл ажиллагаа эрхэлдэг аж ахуйн нэгжийн захирлаас хийх 50 сая төгрөгийн хахууль авч байжээ. Үүнийг нь АТГ-ын мөрдөгчид илрүүлж, дөрөвдүгээр сарын 26-ны 20:00 цагт нийслэлийн Сонгинохайрхан дүүргийн нутаг дэвсгэрээс баривчилсан юм.

20 САЯАР ТОРГУУЛЬ ЭСВЭЛ ГУРВАН САЯЫН ХАХУУЛЬ ӨГ...

        Замын-Үүдийн гаалийн улсын байцаагчдад ийм схем үйлчилж байна гэнэ. Тодруулбал, “Карго чиглэлээр үйл ажиллагаа явуулж байгаа компаниуд араагаа нэг бүрчлэн тоолж, нэгжүүлээд, үнэн зөв мэдүүл. Буруу, худал мэдүүлсэн бол 20 сая төгрөгөөр торгоно. Эсвэл надад гурван сая төгрөгийн хахууль өг” гэдэг бичигдээгүй хууль үйлчилж байжээ.

       Энэ талаар эх сурвалж мэдээлэхдээ “Каргоны бизнес жилээс жилд дэлгэрч байна. Одоо цагт бүх л хүн БНХАУ-аас хэрэглээний бараа материалаа захиалж байна шүү дээ. Энэ болгонд карго чиглэлээр үйл ажиллагаа явуулдаг компаний хэрэгцээ гарна. Хүмүүсээс төлбөр аваад, ачааг нь Монголын хилээр давуулна. Гаалийн байцаагчид бараагаа үнэн зөв мэдүүлээгүй гэдгийг нь мэдээд шиншлээд эхэлнэ. Тэр том машинд дүүргэж ачсан, хятадын хаа хамаагүй мужаас ирсэн хүмүүсийн барааг нэг бүрчлэн мэдүүлнэ гэж байхгүй. Тийм учраас барагцаалаад л гаалийн бүрдүүлэлт хийнэ. БНХАУ, Монгол Улсын хилийн ретген асуудалгүй гээд гаргана. Гэхдээ гаалийн байцаагчид үнэн зөв мэдүүлээгүй гээд л торгууль бариад дайрчихна. Тийм учраас хахууль өгөөд, хүмүүсийнхээ ачаа барааг түргэн хугацаанд гаргахыг бодно шүү дээ. Нэг машинаас гэхэд гурван сая төгрөгийн хахуулийн ханштай гэсэн. Тэгэхээр авлига цэцэглэхгүй яах вэ дээ” гэлээ.

       Энэ мэтээр хахууль авч, хууль бусаар хөрөнгөжсөн гаалийн улсын 40 орчим байцаагчийг АТГ-аас шалгаж байна. Тодруулбал, энэ талаар АТГ-аас өгсөн мэдээллээр Гаалийн ерөнхий газрын эрх бүхий албан тушаалтнууд нь бүрэн эрх, албан тушаалын байдлаа урвуулан ашиглаж, бараа тээвэрлэгч аж ахуйн нэгжүүдийн ашиг сонирхлын үүднээс гүйцэтгэх ёсгүй үйлдлийг гүйцэтгэж хахууль авах, хууль бусаар олсон орлогын эх үүсвэр, бодит шинж чанарыг өөрчлөн мөнгө угаасан байж болзошгүй гэх мэдээлэлд Эрүүгийн хуулийн 18.6-1, 22.1-1, 22.4-1-т тус тус зааснаар хэрэг бүртгэлтийн хэрэг нээн шалгаж байна” гэсэн юм.

ЗАМЫН-ҮҮДИЙН ГААЛИЙН УЛСЫН 40 ГАРУЙ БАЙЦААГЧ ХАХУУЛИЙН ХЭРЭГТ ШАЛГАГДАЖ ЭХЭЛЖЭЭ

      Замын-Үүд дэх Гаалийн газрын даргаар С.Дамжабавыг томилоод байгаа. Тэрбээр өмнө нь Хангийн боомт, Нисэхийн боомт, Сайншанд дахь Гаалийн газрын эрхлэгчээр ажиллаж байжээ.

Өнгөрсөн дөрөвдүгээр сард АТГ-аас Замын-Үүд дэх Гаалийн газарт мөрдөн шалгах ажиллагаа явуулсан. Мөрдөгчид маш ноцтой сэжүүр илрүүлж, Замын-Үүд дэх Гаалийн газрын гаалийн улсын байцаагч нарт холбогдох эрүүгийн гурван хэрэгт мөрдөн шалгах ажиллагаа явуулж байна. Эрүүгийн хэрэг хянан шийдвэрлэх тухай хуульд заасан үндэслэл, журмын хүрээнд Замын-Үүд дэх Гаалийн газрын 40 гаруй гаалийн улсын байцаагч, гаалийн бүрдүүлэлт хийдэг 10 гаруй аж ахуйн нэгж, хувь хүнийг хамруулан нэгжлэгийн ажиллагааг зохион байгуулж, одоогийн байдлаар гурван сэжигтнийг баривчлаад байна.

      Одоогийн байдлаар дээрх нэр бүхий гаалийн улсын байцаагчид яллах тогтоол үйлдэн, яллагдагчаар татан шалгаж байна. Гаалийн газрын нэр бүхий албан тушаалтнууд болон гаалийн бүрдүүлэлт хийдэг этгээдүүд нь Эрүүгийн хуулийн 22.1, 22.4-т заасан эрх мэдэл, албан тушаалын байдлаа урвуулан ашиглаж, бусдаас их хэмжээний хахууль авсан гэмт хэргийг бүлэглэн үйлдсэн байж болзошгүй байгаа юм.