Монголын урлагт амин хайртай нутгаа алагхан зүрхэндээ багтааж, өглөө мэт тунгалаг, гэгээн эх орноо өөрийн аялгуугаар хөглөж, аргадаж, бүүвэйлдэг хөгжмийн зохиолч бий. Өчигдөр тэр эх орон, монгол наадмын тухай гурван сайхан аялгуугаараа төрийн соёрхол хүртлээ. Тэгэх ч учиртай. Сонсох бүрд цээжин дотор омогшлын манан татдаг "Бурхан эх орон", "Миний монгол наадам", "Амин хайрын эх орон" бол яах аргагүй жинтэй бүтээлүүд. Амгай шаргиж, алсад нар мандахад аргагүй хөгжмийн зохиолч Л.Балхжавын гэсэн аялгуу хөвөрч, даруухан мөртлөө даацтай бүтээлтэй тэр төгөлдөр хуурынхаа ард дулаан инээмсэглэл тодруулан сууна. 

       Ийм л тархац, цар хүрээ өндөр, урын сан халгим цалгим авьяастан тэр билээ.

Түүний аялгуу өдгөө мэдээж нэмэгдэн төрнө үү гэхээс хасагдахгүй, дундрахгүй.

АРГАДАН БҮҮВЭЙЛЭГЧ

          Түүний аль ч аялгуунд сэтгэл аргадаж, бүүвэйлсэн зөөлөн хөг эгшиглэж байдаг. Сонсоход л "Энэ яг Л.Балхжав хөгжмийн зохиолчийн аялгуу байна" гэж танигдам. Аялгуундаа тэр эх, үрийн хайрыг, дурлалт хосын сэтгэлийг, алс, ойр бүхний дундах цаг хугацааг, яруу найрагчийн шүлгээрээ дамжуулж хэлэх гэсэн санааг бүрэн дүүрэн багтааж, цөм болгон төгөлдөр хуурын товчлуур дээр нэгтгэж, өөрийн мэдрэмж болоод өнгө хоршлоор амталж, сонссон хэнийг ч автуулж, бүтээлдээ гүн бат оршоож чаддаг уран бүтээлч. Уйлах, аргадах, санан үгүйлэх, уяран үймрэх гээд хүний сэтгэлийн долгисол давалгаа бүхэнд хүрч, тэдгээр мэдрэмжийг тэтгэн тэнхрүүлж, хөглөх аялгуу л түүнийх байдаг.