Саяхан нэг найз маань уруу царайлчихсан явж байхтай таарлаа. Учрыг нь асуутал, байгууллагынхаа шинэ жилээр халамцаж, дарвиснаас болоод эхнэр нь салах дээрээ тулсан гэнэ.

  Уг нь оны шилдэг ажилтан болж овоохон шагнуулаад авч л дээ. Хүн бүр л баяр хүргэж, хундага тулгаад, сэтгэл нь хөөрсний дээр дуртай хамтлаг нь ч ирсэн байсныг хэлэх үү чөлөөтэй бүжиглэж, таарсан болгоноо л тэврэхийг нь тэвэрч, үнсэхийг нь үнсээд ёстой нэг дураараа сайхан баярлаж өгч л дээ. Гэтэл тийм байгааг нь нэг нь хэдийнэ бичлэг хийгээд фэйсбүүкдээ нийтэлчихэж. Үүнээс болж эхнэр нь хардаад бөөн хэрүүл маргаан болж салах дээрээ тулж байгааг ярьж байна. Утаснаасаа салахаа больж, алхам тутамдаа ямар ч шүүлтүүргүйгээр, хэн нэгнийг бодохгүйгээр хандалт авахын төлөө бичлэг, стори хийдэг хэт их сошиалд донтсон хүмүүс үнэндээ ийм л сөрөг нөлөөтэй байна. Жилдээ ганцхан удаа болдог албан байгууллагын шинэ жилээр удирдлагууд нь аль болох ажилчидаа сайхан баярлуулах гэж хичээж, хамгийн гоё газрыг сонгож, хэн бүхний сонсох дуртай хит хамтлаг, дуучдыг өндөр үнээр авчирч, тэр үдшийг жаргалтай, дурсамжтай, чөлөөтэй байлгах гэж зорьдог. Гэвч нөгөө талд хэдэн сошиалчид бусдынхаа амьдралыг самарч, баярласнаасаа эс юм болгон орхиж буйгаа үнэндээ мэдэхгүй л яваа байх. Санаандгүй бичлэг, зурагнаас болж хэчнээн хүмүүс ер нь ийм асуудалд орж, хэдэн гэр бүл салах дээрээ тулж байгаа бол. Салахгүй, маргаан болоод өнгөрдөг юм гэхэд дараа нэг өдрийн хэрүүлийн эхлэл суурь гарцаагүй энэ бичлэг нь болно.

Тиймээс өөд, уруугүй бичлэг, зураг сошиалд оруулдагаа багасгаж, ядаж шинэ жилийн баяраар нь бусдыгаа тайван, чөлөөтэй баярлуулж, гэртээ аз жаргалтай харьж, баяраа хуваалцах боломжийг нь олгоорой, хүмүүс ээ.