Завхан аймгийн Тосонцэнгэл сумын яаралтай тусламжийн тасгийн эмч С.Долгормаа, жолооч М.Ганхуяг нар нэгдүгээр сарын 18-нд холын дуудлагад явжээ. Тэднийг хөдөө дуудлагад явахад цас орж, шуурчихсан байсан учир автомашин нь цасанд суусан байна. Тэд өвчтөндөө яаралтай тусламж үзүүлэхийн тулд автомашинаа орхиод харанхуйд 10 гаруй километр алхаж айлдаа хүрсэн байна. Тухайн үед нөхцөл байдал ямар байсан талаар С.Долгормаа эмчтэй ярилцлаа.

-Өвчтөндөө яаралтай тусламж үзүүлэхийн тулд цасанд суусан автомашинаа орхиод алхаж айлдаа очсон тухай олон нийтийн сүлжээнд гарсан байсан. Тухайн үеийн нөхцөл байдал ямар байсан бэ?

     -Тухайн дуудлага нэгдүгээр сарын 18-ний 22:00 цагийн үед ирсэн. Бидний яаралтай түргэн тусламж үзүүлэх ёстой хүн сумын төвөөс 60 гаруй километрт байсан. Түүний амьдардаг газар отрын бүсэд ордог учир цас их орж, хоёр удаагийн шууралтаар цасыг нь хатууруулчихсан байсан. Бид цас ихтэй, зам хэцүүг гадарлаж байсан учир түүний сумын төв дээр амьдардаг хамаатных нь хүнийг дагуулж явсан. Бид шөнөөр явсан учир цас сууж, цас их ухсан. Биднийг холын дуудлагад явахад километрт нь тохируулж шатахуун хийж өгдөг. Бидний суусан газар сүлжээ барихгүй, ойрхон айлгүй байсан учир буцахдаа шатахуунгүй болох эрсдэлтэй гээд дуудлага өгсөн айл руу алхахаар шийдсэн.

-Дуудлага өгсөн айлаас гар утасны сүлжээ барьдаг уу?

    -Дуудлага өгсөн хүний гэрээс сүлжээ барьдаггүй. Өдөр нь сүлжээ барьдаг уулан дээр гарч багийн даргадаа хэлсэн байна лээ. Тэгээд багийн дарга нь сумын эмнэлэгт дуудлага өгсөн.

-Өвчтөн таныг дуудлагаар очиход ямар оноштой байсан бэ. Түүний биеийн байдал ямар байгаа вэ?

    -24 настай өвчтөн биднийг очиход тав хоног өндөр хэмтэй халуурч, босож чадахгүй байгаа гэх өгүүлэмжтэй байсан. Өвчтөн хатгалгаа туссан байсан учир сумын эмнэлэгт эмчилж, эдгээгээд эмнэлгээс гаргасан.

-Та бүхнийг 10 гаруй километр алхаж, дуудлага өгсөн айлдаа хүрсэн гэсэн. Харанхуйд цасан дунд алхахад ямар бэрхшээл тулгарсан бэ?

    -Автомашин явахгүй цасан дундуур алхана гэдэг амаргүй. Бид талдаа 12 километр алхсан. Зарим үедээ өвдгөөр татсан цастай газраар алхсан. Харанхуйд хаана, юу байгаа нь мэдэгдэхгүй учир гуу, жалганы цасанд унаж, босож явсан. Хайрцагтай эм, тариа, багаж хэрэгслээ эвдэж, гэмтээхгүйн тулд унахгүй байхыг хичээсэн.

-Та бүхэн хэдэн цаг алхаж айлдаа очсон бэ?

    -Бид дуудлага ирсэн даруйд сумын төвөөс гарсан. Замдаа автомашин цасанд суусан, алхсан гээд 04:00 цагийн үед айлдаа очсон. Хэдэн цаг алхсаныг сайн мэдэхгүй байна.

-Өвчтөнөө автомашин руугаа яаж зөөвөрлөсөн бэ?

    -Өвчтөнөө мориор автомашин руугаа зөөсөн. Бид ирж, очихын 20 гаруй километр цасан дундуур алхсан.

-Орон нутгийн эмч нарт дээрх бэрхшээл үргэлж тулгардаг болов уу. Та хэдэн жил эмчээр ажиллаж байна вэ?

    -Жилийн дөрвөн улирал дуудлагын эмч, жолооч нар цаг агаарын нөхцөл байдалтай холбоотойгоор ямар нэгэн бэрхшээлтэй тулгарч байдаг. Өвөл цасанд суух бол энгийн үзэгдэл болсон байна. Зун ч мөн ялгаагүй уулын ам бүрээс ус урсдаг болохоор намаг,шаварт суух, үерт боогдох гээд асуудалтай тулгарна.

-Танай эмнэлэг хэдэн автомашинтай вэ?

   -Манай эмнэлэг 4-5 автомашинтай. Хоёр нь актлагдсан боловч дуудлагад явдаг. Тийм болохоор найдваргүй тээврийн хэрэгсэл гэсэн үг. Эмнэлэгт шинэ автомашин шийдэж өгөөгүй учир хуучнаараа явахаас өөр аргагүй байгаа юм.