Эрүүл мэндийн сайд Э.Батшугар “UNCCD COP17”-д оролцохоор Монгол Улсад хүрэлцэн ирсэн Израилийн “МАШАВ”-ын захирал Эйнат Шлейн, БНХАУ-д суугаа Элчин сайд Элиайв Белоцерковский нартай уулзаж, эрүүл мэндийн салбарын хамтын ажиллагааны талаар санал солилцлоо. Мөн Уулзалтын үеэр Монгол, Израилийн эрүүл мэндийн салбарын хамтын ажиллагааны түүх, өмнө хэрэгжүүлсэн хамтын ажиллагааны үр дүн, цаашид хамтран ажиллах боломжтой чиглэлүүдийн талаар санал солилцов.

    Түлэнхийн тусламж, шархны менежмент, нөхөн сэргээх эмчилгээний чиглэлээр Израилийн мэргэшсэн эмнэлгүүдтэй хамтран ажиллах боломжийн талаар ярилцлаа. Монголын эмч, эмнэлгийн мэргэжилтнүүдийг сургах, мэргэшүүлэх, туршлага солилцох боломж байгаа ажээ. “МАШАВ”-ын сургалт, мэргэжил дээшлүүлэх хөтөлбөрт Монголын эрүүл мэндийн салбарын мэргэжилтнүүдийг тогтмол хамруулах боломжтой гэлээ.Монгол Улсын хэрэгцээнд нийцсэн тусгай сэдэвт сургалт, хүний нөөцийн чадавх бэхжүүлэх хөтөлбөр хэрэгжүүлэх боломжийг судлана гэв.

    Хоёр улсын эрүүл мэндийн салбарын хамтын ажиллагааг зөвхөн туршлага солилцох түвшинд бус, эмч, мэргэжилтний чадавх, эмчилгээний технологи, бодит үр дүнд чиглэсэн урт хугацааны түншлэл болгон хөгжүүлэх нь чухал гэдгийг онцлов. Монгол, Израилийн эрүүл мэндийн салбарын хамтын ажиллагааг шинэ шатанд гаргаж, Монгол Улсын эрүүл мэндийн салбарын хөгжилд үр өгөөжтэй түншлэлийг өргөжүүлнэ гэлээ.