“МЭК” судалгааны байгууллагаас сар бүр улс төрийн барометр судалгааг гаргадаг билээ. Тэд 11 дүгээр сард хатуу хөл хорио тогтоосонтой холбогдуулан аж ахуйн нэгжүүдийн судалгааг хийсэн байна. Судалгаанд Монгол Улсад үйл ажиллагаа явуулж буй 660 аж ахуйн нэгжийн эздүүд хамрагджээ. Тухайлбал, ковид-19 халдварын тархалт компанийн орлогод хэрхэн нөлөөлсөн бэ гэсэн асуултад “орлого буурсан” гэж 92 хувь нь хариулсан байна. Харин долоон хувь нь “орлогод нөлөөлөөгүй”, нэг хувь нь “орлого нэмэгдсэн” гэсэн хариулт өгчээ. 

Мөн төрөөс ямар нэгэн дэмжлэг шаардлагатай байгаа эсэхэд 85 хувь нь “төрийн дэмжлэг хэрэгтэй байна” гэжээ. Харин 10 хувь нь “төрийн дэмжлэг хэрэггүй” гэсэн бол таван хувь нь “мэдэхгүй” хэмээн хариулжээ. Үүнээс төрийн ямар дэмжлэг илүү авахыг хүсэж байгааг тодруулахад 45 хувь нь Нийгмийн даатгалын шимтгэлийг тэглэх, 22 хувь нь хүүгүй эсвэл хөнгөлөлттэй зээл олгох, 17 хувь нь санхүүгийн буцалтгүй тусламж үзүүлэх гэсэн бол 32 хувь нь зээлийн болон үндсэн хүүгийн төлөлтийг хойшлуулах гэжээ. Харин бусад нь аж ахуйн нэгжийн орлогын албан татвар болон хүн амын орлогын албан татварыг тэглэх санал ирүүлсэн байна. 

Судалгаанд оролцолгчдын 67 хувь нь “одоогоор ажилчдаа цомхотгох бодолгүй байгаа” гэсэн бол “энэ сардаа багтааж цомхотгол хийнэ” гэж 14 хувь нь хариулсан байна. Харин  долоон хувь нь “цомхотгол хийсэн” гэжээ.