"Баярлалаа аав аа", "Хамгийн сайхан бэлэг", "Гарц" тэргүүтэй олон бүтээлд дүр бүтээсэн залуу жүжигчин Г.Мөнхтулга "Событ фильм"-ийн шинэ уран бүтээл "Золиос 6/16" кинонд тоглосон билээ. Ингээд тус уран бүтээлтэй холбогдуулан Г.Мөнхтулгатай ярилцсанаа хүргэж байна.

-Энэ өдрийн мэнд хүргэе. Шинэ уран бүтээл “Золиос 6/16” уран сайхны кинонд тоглосон шүү дээ. Тус уран бүтээлд ажилласан сэтгэгдлээсээ хуваалцахгүй юу?

-Намайг Ганбаатарын Мөнхтулга гэдэг. Би “Золиос 6/16” уран сайхны киноны гол дүрийн бага насанд тоглосон. Тус кино миний анхны өргөн дэлгэцийн уран бүтээл байлаа. Анх киноны санал авахдаа тодорхой хэмжээний айдас, догдлол мэдэрсэн. Гэхдээ айдастай эхэлсэн ч зураг авалтынхаа ард гарч, киногоо үзэгчдэдээ хүргэсэндээ баяртай байна.

-Уран бүтээлчидтэйгээ хамт анхны үзвэрээ үзэж, киноны нээлтэд оролцох ямар байсан бэ?

-Зураг авалт эхлэх үеэр найруулагчтайгаа хамт жүжигчидтэйгээ танилцсан. Миний үргэлж дэлгэцээр хардаг мундаг уран бүтээлчид байсан. Тэдгээр мундаг жүжигчидтэй хамт улаан хивсэн дээр алхаж, “Жүжигчин Г.Мөнхтулга” гэж нэрээ дуудуулах сайхан юм билээ.

-Ажилласан анхны уран бүтээл нь ямар кино байв. Кинонд ажиллана гэдгээ мэдэх ямар байсан бэ?

-Миний анхны дүр ч бас гол дүрийн бага нас байсан. “Хамгийн сайхан бэлэг” уран сайхны киноны найруулагч З.Батболд ахаас дүрийн шалгаруулалтад орохоосоо өмнө зөвлөгөө авч байсан юм. Шалгаруулалтын хоёрдугаар шатандаа харамсалтай нь тэнцээгүй. Гэхдээ найруулагч маань намайг “Хамгийн сайхан бэлэг” кинонд тоглохыг урьсан.

-Өмнө нь “Событ фильм”-ийн “Баярлалаа аав аа” киноны гол дүрд тоглосон шүү дээ. Гол дүрд тоглох ямар байсан бэ?

-“Баярлалаа аав аа” миний анхны гол дүр л дээ. Гол дүрд тоглох болсноо мэдээд хэсэг хугацаанд баярласандаа болоод амнаас огт үг гараагүй. Дотроо “Би гол дүрд тэнцчихлээ шүү дээ” гэж бодоод, үнэхээр их баярласан. “Баярлалаа аав аа” киноны дүр яг надад тохирсон юм шиг санагдсан. Би ер нь тэр хүү шиг зантай л даа. Гол дүр учраас орох үзэгдэл, хэлэг үг олон байсан. Надад итгэсэн хүмүүсийн итгэлийг алдалгүй, дүрээ сайн бүтээхийн тулд их бэлдсэн.

-Чиний тоглосон киног ангийнхан, найзууд, гэр бүлийнхэн нь үзээд юу гэсэн бэ?

-"Золиос 6/16" кино театруудаар гарч байгаа болохоор найзууд маань үзэж амжаагүй ээ. Манай хичээл их шахуу ордог учраас кино үзэх зав хараахан гараагүй байх. Харин гэр бүлийнхэн минь үзээд шууд уйлсан гэсэн, бас намайг дүрээ ёстой гоё гаргасан байна гэж магтсан.

-Дэлгэцээр өөрийгөө үзэх ямар байдаг вэ?

-Үнэхээр мөрөөдөл минь биелж байгаа юм шиг санагддаг. Кинонд тоглож эхлээгүй байхдаа өөрийгөө зурагтаар харах юм сан гэж их боддог байсан. Дэлгэцээр харах бүрд зүүдэлж байгаа юм шиг санагддаг. Энэ удаа уран бүтээлчидтэйгээ киноныхоо анхны үзвэрийг хийж өөрийгөө өргөн дэлгэцээр харах үнэхээр сонирхолтой байлаа.

-“Гарц” олон ангит киноны ах дүүсийн бага насны дүрийг бүтээсэн шүү дээ. Тус бүтээлийн талаар яривал?

-Би Монголын хүүхдийн ордны Ө.Нямсүрэн багштай драмын дугуйланд зургаа дахь жилдээ суралцаж байна. "Гарц" киноны дүрийн шалгаруулалт манай дугуйлан дээр болсон юм. Киноны компьютерийн мэргэжилтний дүрд манай найз н.Анар тоглосон. Харин би С.Чингүүн, Ц.Чингүүн хоёртой ах дүүсийн бага насанд тоглосон. Найзуудтайгаа хамт кинонд тоглох сонирхолтой, хөгжилтэй юм билээ.

-Чиний бодлоор багийнхан нь киногоороо дамжуулж үзэгчдэд ямар мэдрэмж, ойлголт өгөхийг зорьсон бол?

-Хүүхэд байхдаа авсан сэтгэл зүйн шарх нас биед хүрсэн ч байсаар байдаг. Насан туршид нь бие, сэтгэл зүйгээс нь салдаггүй. Хүүхэд тийм л эмзэг, нандин гэдгийг харуулахыг хичээсэн байх. Мөн хүний өөрийнхөө төлөө хийсэн буруу сонголт бусдад хэрхэн муугаар нөлөөлдгийг "Золиос 6/16" кино тод харуулна.

-Кино зураг авалтын үеэр тохиолдсон хөгжилтэй дурсамжаасаа хуваалцахгүй юу?

-Миний хүмүүсийн яриаг нууцаар чагнаж байгаа хэсэг гардаг юм. Тэр хэсгийн зураг авалтыг хийсэн газар нь хуучны барилга болохоор халгай ихтэй байсан л даа. Найруулагч зураг авалт эхлэхээс өмнө миний зогсох хэсгийг зааж өгч байгаад халгайнд түлэгдчихсэн. Дараа нь би зураг авалтдаа орж байхдаа яг тэр найруулагчийн түлэгдсэн халгайнд түлэгдсэн. Уг нь анхааруулж хэлсэн л дээ. Олон сайхан дурсамж бүтээж, их зүйл сурсан. Гэхдээ одоо тэр үе хамгийн түрүүнд бодогдож байна.

-Мэргэжлийн жүжигчин биш шүү дээ. Кинонд ажиллах ямар байсан бэ. Цаашид энэ чиглэлээр суралцах бодол байдаг уу?

-Кинонд тоглох бүрдээ олон зүйл сурч, өөрийгөө шинээр нээдэг. Тийм учраас кинонд тоглох дуртай. Гэхдээ ирээдүйд энэ мэргэжлээр сурна гэдэгтээ бат итгэлтэй болоогүй байгаа. Инженерийн мэргэжилд ч би дуртай. Ахлах анги хүртлээ өөрийнхөө хүссэн зүйлийг хийж, дурсамж бүтээж, шинэ чадваруудтай болохыг хүсэж байна.