“Хоолоо захиалчих, бид бэлдэж байя. Ширээгээ нийлүүлээд хүлээж байх уу, хойд өрөөнд ороод суу, ширээ нийлүүлээд сууж болно”  хэмээн 12-15 хүнийг нийтийн зааланд болон тусгай өрөөнд угтах ресторан, цайны газар Улаанбаатар хотор дүүрэн байх нь тэр ээ.

            Дөрөвдүгээр сарын 3-18-нд ресторан, лоунж, саун, бассейн алжаал тайлах төв, кино театр, үзвэр үйлчилгээ, бялдаржуулах төв, амралт сувилал, сургалтын төв ажиллахгүй. Хоол үйлдвэрлэл, зоогийн газар хүргэлтээр үйлчлэх Засгийн газрын шийдвэр гарсан. Гэтэл бодит байдал дээр тус шийдвэрийг дагаж, мөрдөж буй зоогийн газар цөөхөн байх аж. Бид хоол үйлчилгээний газрууд Засгийн газраас гаргасан шийдвэрийг хэрэгжүүлж байгаа эсэхийг сурвалжиллаа. 

“Тэнгис” кино театрын замын хойд тал байрлах “Зочин бууз” хэмээх  зоогийн газарт өчигдөр 17:00 цагийн үед оров. “Бид 12 уулаа хоол идэх гэсэн юм. Зааланд сууж болох уу” гэхэд хойд өрөөнд сууж болно. Бүх хоол гарч байгаа” хэмээн хэнэггүйхэн хариуллаа. Мөн эл хоолны газартай залгаа байрлах "Нүнжигтэй монгол” зоогийн газар ороход мөн л ижил хариулт өглөө. Улаанбаатарчуудын хэлж сурсанаар “Хүнсний-1”-т байрлах рамен рестораныг зорилоо. Тэднийх модон ширээ сандалтай тохилог, намуухан орчин бүрдүүлжээ.

Үйлчлэгч нь “Сайн байна уу” хэмээн  биеийн халуун үзэж, үйлчлүүлэгчээ хүндэлж харицдаг гэдэг нь мэдэгдэв. Хоолны цэстэй нь танилцаж, зөөгчөөс нь “Танай хоол бүгд гарч байгаа юу.  Бид олуулаа зааланд сууж хоол идэх гэсэн юм. Зааланд суух боломжтой юу гэхэд “Тусгай өрөөнд сууж болно. Өрөө үнэгүй" гэв. Гэтэл нөгөө зөөгч нь  суудлаас босож ирээд таваас дээш хүнд үйлчлэхгүй. Тусгай өрөө байгаа гэхдээ шилэн хаалгатай болохоор баригдаж магадгүй. Олон хүн бөөгнөрүүлж суулгаад баригдах юм бол манайх үйл ажиллагаа явуулах эрхгүй болно” хэмээлээ.

Түүнээс гараад яг урд талд нь байрлах “.....” зоогийн газар мөн л “Олноороо сууж болно. Хэдэн цагийн үед орж ирэх вэ. Хоолоо эртхэн 8801.... утсаар захиалаарай бэлдээд хүлээж байя. Ширээгээ нийлүүлж суух болох нь дээ” хэмээн уриалгахан хандаж байлаа. Үүний дараагийн онгорхой зоогийн газар “Аура”  байлаа.

Тус газарт хүн их  байв. “10 хуушуур авъя”, “Уух юм юу байна ” зэрэг 4-5 үйлчлүүлэгчийн захиалгийг тэмдэглэж авах зөөгч хөндлөнгийн хүний үгийг сонсох ч сөхөөгүй байх нь тэр. Захиалга авч буй эмэгтэйн хажууд нь зосгож байсан залуу “Та нарыг орж ирэх юм бол хоёр өрөөнийхөө нэгийг гаргаж өгч болно. Одоохондоо хүнтэй байна. Хэдэн цаг суух юм. Хоолоо идээд л гарна биз дээ” хэмээн лавшруулж асууж байлаа.

Мөн л “Тэнгис" кино театрын замын хойд талд байрлах “MN” тауврын зургаан давхарт байрлах “Hot pot” ресторанд олноор үйлчлүүлэхээр орох нь тэр ээ. Тэдний  заал дүүрэн хүнтэй байх аж.  2-3 үйлчлэгч нааш цааш хоол зөөгөөд тун ч завгүй байв. Тэгэх зуур эмэгтэй зөөгчөөс нь “12-уулаа үйлчлүүлж болох уу. Тусгай өрөө гаргаж өгөх боломжтой юу” гэхэд “За. Асуугаад өгье” гээд цааш оров. Удалгүй гарч  ирээд “Өрөөнүүд дүүрэн байгаа юм байна. Зааланд ширээ нийлүүлээд сууж болно шүү” хэмээсэн юм. Зөөгчөөс нэгэн эмэгтэй “Таваас дээш хүн  үйлчлүүлж болно биз дээ” хэмээн үргэлжлүүлэн асууж байгаа нь сонсогдоно.  

Би  буцах замдаа “Novetel” хэмээх ресторан үүдээр явлаа. Өдөрхөн л “10 хүн суух боломжтой өрөөнд 12 уулаа шахаад сууж болно. Тусгай өрөө нэг цаг нь 25 мянган төгрөгийн үнэтэй” гэх нь чихэнд дахин сонсогдох шиг илхэн санагдаж байлаа. Түүний урдхан талд байрлах “Солонго” хэмээн солонгос хоолны газар ч нүдэнд тусав.  10-с дээш хүнийг нэг өрөөнд суулгаж, хооллуулдаг сурагтай.

             Энэ мэт онгорхой бүхий л зоогийн газар, ресторан хэдэн  ч хүн хүлээж авахад бэлэн гэдгийг хэдхэн зоогийн газраар орж ойлголоо. Зарим  зоогийн газар хэдийгээр “Зааланд олон хүн суулгах боломжгүй” гэсэн мөртлөө чухалчилж гуйвал тусгай өрөөнд олноор суулгаж, үйлчлэхэд бэлэн гэдэг нь ч тодорхой байсан юм. Тухайлбал, “LAAV”, “Олон үндэстний хоол”, “Ким Баб Чон Гүг” зэрэг зоогийн газарт “Олноор үйлчлүүлэх гэсэн юм. Болно биз дээ”  гэхэд  “Огт үгүй” хэмээн шуурхай хариулсангүй. “Харин суулгачихвал яадаг бол. Хэр удах вэ. Манайх нэг цагийн дараа хаана, амжих болов уу, тусгай өрөө ч байгаа л даа” хэмээн олон хүн бөөгнөрүүлчихээд баригдаж магадгүй хэмээн санаархсанаас цаашгүй байлаа.

            Харин цөөн хэдхэн газар түгжээтэй. Тэдний цөөнгүй нь “УОК-ын шийдвэрийн дагуу хүн  зааланд суулгаж үйлчлэхгүй. Бүх хоол авч явахаар гарна. Хүргэлттэй” хэмээн утасныхаа дугаарыг бичсэн нь содон. Мөн онгорхой мөртлөө “Манайх захиалгаар хоол хүргэж өгнө. Зааланд суух боломжгүй. Хяналт, шалгалт орж ирээд хэцүү байна” хэмээн хариулж, УОК-ийн шийдвэр хүчинтэй үйлчлэх цөөхөн газартай таарлаа.