Манай улс Түлэнхийн төвгүй болоод 10 гаруй жил болж байна. Тодруулбал, Түлэнхийн төв 1957 онд ашиглалтад орсон хуучин барилгад үйл ажиллагаа явуулж байсан учраас 2005 онд нураасан байдаг. Ингээд 2009 Түлэнхийн төвийн шинэ барилгын тендер зарлаж, тус тендерт “Цаст констракшн”, “Нутгийн зам” гэх хоёр компани шалгарсан. Гэвч улсаас төсөв хөрөнгийг нь шийдэж өгөхгүй, тендерт шалгарсан хоёр компани нь ажлаа эхэлж чадахгүй байсаар 2017 онтой золгосон. Улмаар 2017 онд Кувейтийн Засгийн газрын найман сая ам.долларын буцалтгүй тусламжаар Түлэнхийн төвийн барилгын ажил сая нэг эхэлсэн.

Түлэнхийн төвийн барилгыг анх А, В, С гэх гурван блоктой байхаар зураг төслийг нь гаргасан. Ингэхдээ А блок нь таван давхар амбулатори, В блок нь найман давхар эмнэлэг, С блок нь цогцос хадгалах моорог байхаар зураг төсөлд тусгасан байдаг. Барилгын А, С блокийг “Цаст констракшн”,  В блокийг “Нутгийн зам” компани барьж гүйцэтгэхээр ажлаа эхэлсэн.

Өнгөрсөн хоёр жил гаруйн хугацаанд Түлэнхийн төвийн А блок буюу таван давхар амбулатори нь баригдаж дууссан бол В блок нь 90 гаруй хувийн гүйцэтгэлтэй баригдаж байна.

Тэгвэл С блок буюу цогцос хадгалах барилгын газрын асуудал шийдэгдээгүй учраас Түлэнхийн төвийн шинэ барилга анх зураг төсөлд тусгагдсан шигээ цогц эмнэлэг болж ашиглалтад орох боломжгүй болжээ. Өөрөөр хэлбэл, шинэ Түлэнхийн төв цогцос хадгалах байргүй байх нь.

         Түлэнхийн төвийн С блокийн газрын маргааныг эргэн сануулбал, “Цаст констракшн” компани сууриа цутгаад байсан боловч 2019 оны хоёрдугаар сарын 11-ний өдөр Нийслэл дэх захиргааны хэргийн анхан шатны шүүхийн А/116  дугаар захирамжаар С блокийн газрыг “Хамтын шийдэл” ТББ-д шилжүүлсэн байдаг. Одоо тус газарт 16 давхар орон сууц баригдаж байна. Тухайн орон сууцны захиалагч нь “Хамтын шийдэл” ТББ бөгөөд барилгын гүйцэтгэгчээр “Ивээг түшиг” ХХК ажиллаж байгаа юм.

Эрх мэдэлтнүүд, хувийн компаниуд нийлж, цогцос хадгалах газрыг нь “булааж” авсан байтал Эрүүл мэндийн яам нь тэдэнтэй тэмцэхийн оронд Түлэнхийн төвийн цогцос хадгалах байгууламжийг В блокийн доор буюу зоорийн давхарт нь байгуулахыг төсөл хэрэгжүүлэгч компаниудад үүрэг болгожээ. Гэтэл эмнэлгийн барилга байгууламжийн стандартаар бол эмнэлгийн зоорийн давхарт цогцос хадгалах моорог байх боломжгүй гэнэ.

Үүсээд байгаа энэ асуудлаар Түлэнхийн төвийн В блокийн ажлыг гүйцэтгэж буй “Нутгийн зам” компанийн Түлэнхийн төвийн төсөл хариуцсан захирал Ц.Ганзоригоос тодрууллаа.

-Түлэнхийн төвийн В блокийн барилгын явц хэдэн хувьтай явж байна вэ?

-Манай Б блок 250 хүний ортой, нийт найман давхар барилга. Барилгын явц одоогоор 90 хувьтай явж байна. Гадна тохижилт хийгдээд дуусаж байна. Замын хучилт хийж, гэрэлтүүлэг зоох дутуу байна. Өнгөрсөн жил эрт хүйтрээд гадна тохижилтын ажил түр зогссон.

-Хэзээ ашиглалтад орох вэ?

-Коронавирусийн эсрэг хөл хорио тогтоохгүй бол графикийн дагуу тавдугаар сарын 15-нд Улсын комисст хүлээлгэж өгнө. Хөл хорионы улмаас ерөнхий ажил маань 28 хоногийн алдагдалтай явж байна. 

-Түлэнхийн төвийн барилгын явц удаашралтай байгаагийн нэг том шалтгаан нь С блокийн газрын асуудал болоод байна гэж та хэллээ?

-Ямар асуудал үүссэн бэ гэхээр барилгын С блок буюу цогцос хадгалах байгууламжийн газраа алдсанаас үүдэн мооргоо хаана барих нь тодорхойгүй болчихсон. Гэтэл Эрүүл мэндийн яамнаас манай компанид энэ мооргоо 250 ортой эмнэлгийнхээ зоорийн давхарт барих чиглэл өгч байгаа юм. Энэ ажлаас болоод манай барилгын ажил удааширч байна. Бүхэл бүтэн нэг барилгыг нэг барилгын доор барих гээд байгаа биз дээ. Зураг төсөл нь гараад, тэр зургийнхаа дагуу баригдаж байгаа барилгын зураг төслийг өөрчлөх болчхоод байна. Б блокод хэвтэн эмчлүүлэх тасгууд, ажилчдын гал тогоо, эмнэлгийн тоног төхөөрөмж байрлаж байгаа юм. Тэгэхээр гал тогоо, моорог хоёр хамт байх боломжтой юу. Мэдээж үгүй шүү дээ. Гэтэл одоо ийм нэг сонин нөхцөл байдал үүсээд, үүнийг нь хүлээж авах хэцүү, байх хэцүү болоод байна.

Дээрээс нь манай “Нутгийн зам” компани В блокийг бариад дуусаж байгаа хирнээ одоо ямар ч төсөвгүйгээр дахиад С блокийг ажлыг хийх болоод байна. Тэгээд ч С блок манай ажил ч биш “Цаст” констракшний ажил. Энэ л бидний хооронд их том асуудал болоод байна.

-Цогцос хадгалах байгууламжийн “Цаст” констракшны барьж байгаа А блокийн зоорийн давхарт барих боломжгүй юм уу?

“Цаст” констракшны А блокийн зоорийн давхраас ус гараад байгаа юм.

-С блокийн барилгын ажлыг танай компанид шилжүүлэх болбол нэмэлт гэрээ хийнэ гэсэн үү?

Уг нь асуудал тэгж шийдэгдвэл нэмэлт гэрээ хийх ёстой хэдий ч одоогоор нэг ч гэрээ манай компанитай хийгээгүй. Моорог гэдэг чинь тусдаа бие даасан зураг төсөлтэй. Бүх шугам нь тусдаа байдаг юм. Жишээ нь агааржуулалтын шугам нь хамт байх юм бол хэвтэж буй өвчтөнүүдийн өрөөнд үнэр нь ороод ирнэ шүү дээ. Мөн бохир нь ч тусдаа байх ёстой.

-Танай компани өнгөрсөн хугацаанд хэдэн төгрөгийн ажил хийж гүйцэтгэсэн бэ?

Бид зарчмын дагуу эхлээд “Голомт” банкнаас зээл авч ажлаа гүйцэтгэчхээд дараа нь улсаас гүйцэтгэлийн мөнгө авдаг. 2019 онд 997 сая төгрөг, 2020 онд улсаас нэг тэрбум төгрөг авсан. Барилгаа хүлээлгэж өгөөд хоёр тэрбум төгрөгийн санхүүжилт авах дутуу байна.

Түлэнхийн төвийн барилгын С блокийн асуудлыг цаашид хэрхэн шийдвэрлэх талаар Эрүүл мэндийн яам, Нийслэлийн эрүүл мэндийн газраас нэмэлт тайлбар авч, эргэн мэдээлэх болно.