-ӨНГӨРСӨН ЖИЛ Ч.УЛААН САЙДЫН СОНГУУЛИЙН ШОУНААС БОЛООД ЧЕНЖҮҮД НООЛУУРЫН КИЛОГРАММ ТУТМЫН ҮНЭЭ БУУЛГАЖ, ИРГЭД БАГА ҮНЭЭР ХУДАЛДСАН-

Монгол Улсын Засгийн газраас өнгөрсөн жил малчдад “Килограмм ноолуур 105 мянган төгрөгөөр авна” гэсэн амлалт өгч, бүтэн жилийн турш хүлээлгэсэн. Дээрх мэдээллийн сургаар малчид өдөр болгон ноолуурын үнийг асууж, сураглан, зарим нь бүр үнэ нь өсөхийг хүлээж, шуудайтай ноолуураа хадгалж байсан гэнэ. Харин Засгийн газрын “үлээсэн” амлалтыг зун гартал хүлээсэн  малчид аргагүйн эрхэнд амласан үнээс нь хоёр дахин бага үнээр худалдсан юм. Төрдөө “хулхидуулсан” малчид энэ хавар ноолуурын үнэ ямар байх талаар чих тавьж, мөн тэр хэрээр “Хэдэн малынхаа ноолуурыг өмнөх жилээс ч бага үнээр худалдах вий” гэх айдастай суугаа аж. Тэгвэл энэ жил ноолуурын үнэ ханш ямар байгаа, цаашид хэрхэх талаарх сурвалжилгыг уншигч та бүхэнд хүргэж байна.

Хүй долоон худагт байрлах “Ноос ноолуур өндөр үнээр авна” гэх зарын самбар өлгөсөн айлын гадна олон хүн цуглана. Гадаа нь хэд хэдэн “Приүс” маркийн автомашин зогсон, таван ханатай гэрийн гадна ноолуурын үнэ сурагласан хүмүүс иржээ. Өнгөрсөн жилийн ноолуураа тушааж чадалгүй одоог хүртэл дарагштал нь хадгалсан малчид “Гайгүйхэн шиг үнэтэй байвал зарчихъя өө. Хэдий болтол хадгалах вэ. Ингэж хадгалаад л байвал хүн тоож авахааргүй юм болох нь” хэмээн халаглах. Таван ханатай гэрээс нүд нь гэрэлтсэн нэг залуу гарч ирээд их л эвлэгхэн “Би 90-100 мянган төгрөгөөр ноолуур авч байгаа. Гэхдээ аль аймгийнх байхаас нь шалтгаална. Харж байж л болно оо” гэж ноолуурын үнэ сурагласан хүмүүст найрсагхан хандав. Тухайн ченжээс ноолуур өгөх хүсэлтэй хүмүүс хэр их ирж байгаа, ноолуурын үнэ ханш хэрхэх талаар байр суурийг нь асуухад,

       “Цагаан ноолуур килограмм нь 90-100 мянган төгрөгийн хооронд байна. Энэ жил ихэнх нутгаар их хэмжээний цас орж, малчид хэцүүхэн л өвөлжсөн бололтой. Малын тарга тэвээргэ муу байгаа. Тийм ч учраас цаг агаар гэнэт хүйтэрвэл мал нь муудаж магадгүй гээд малчид хаширлаж, ямаагаа бүрэн самнаж чадахгүй байгаа байх. Гэхдээ бага сага ноолуур ирээд л байна. Өнгөрсөн жил ноолуурын үнэ 70 мянган төгрөгөөс эхэлсэн. Хэдий улс даяар санхүүгийн хямралтай байсан ч үйлдвэр, ченжүүд дээрх үнээр авах сонирхолтой байсан. Гэтэл ХХААХҮ-ийн сайд  Ч.Улаан “Нэг кг ноолуурыг 100 мянган төгрөгөөр авна” гээд худлаа шоудчихаад хүрээгүйгээс болоод ченж нар үнээ унагасан. Сайдын шоунаас болоод хөөрхий малчид улам хохирч ноолуураа хямдхан өгсөн. Харин энэ жил гайгүй байх” гэлээ.

ОРОН НУТГИЙН ХУВЬ ЧЕНЖҮҮД КГ НООЛУУРЫГ 75-110 МЯНГАН ТӨГРӨГӨӨР АВЧ БАЙНА

       Энэ жилийн ноолуурын үнэ ханш Улаанбаатар хот болон орон нутагт ямар байгаа талаар тухайн аймгуудын ченжүүдтэй холбогдоход

-Өвөрхангай аймагт 85 мянган төгрөг,

-Хэнтий аймагт 95 мянган төгрөг,

-Дорнод аймагт 110 мянган төгрөг,

-Сүхбаатар аймагт 100 мянган төгрөг,

-Өмнөговь аймагт 75 мянган төгрөг,

-Баян-Өлгий аймагт 85 мянган төгрөгийн үнэтэй байна. Ноолуурын үнэ ханшийн талаар орон нутгийн ченжүүд “Одоогоор цөөхөн хүн л бага хэмжээний ноолуур өгч байна. Малчид ямаагаа самнаж эхлээгүй болохоор үнэ өсөх талаар тодорхой хэлж мэдэхгүй л байна. Малчид ямаагаа самнаж эхлэх үеэр ноолуурын үнэ нэмэгдэж магадгүй. Гэхдээ энэ жил ноолуурын үнэ дажгүй ханштай л байгаад байна. Цаашид өсөх байх аа” гэж ченжүүд хэлж байлаа.

Малчин Т.ДАГВАДОРЖ: Удаан хадгалж, дарагшсан ноолуурыг маань багаар үнэлж, өнгөрсөн жил нэг килограммыг нь 40 мянгаар л худалдаж авсан

       Өвөлжилт хэрхсэн, малын тарга, тэвээргэ хэрхсэн талаар Өвөрхангай аймгийн Хайрхан-Дулаан сумын малчин Т.Дагвадоржтой малынх нь бэлчээрт байхад цөөн хором ярилцсан юм.

-Сайхан хаваржиж байна уу. Өвөлжилт хэр болж өнгөрсөн бэ. Ноолуурын үнэд сураг тавьж байна уу?

-Сайхан хаваржиж байна. Хэцүүхэн л өвөл болж өнгөрлөө дөө. Арванхоёрдугаар сарын эхнээс цас орж, өвс дарагдсан. Тэгээд хэдэн мал маань идэх юмгүй бол арай чүү л зээлээр өвс авч, хэдэн малаа нэг юм онд оруулж чадсан. Ашгүй нэг юм цас хайлж, дулаарсан хэдий ч малын тарга муу байна. Ноолуурын үнэ энэ жил гайгүй эхэлж байгаа болохоор цаашид нэмэгдэх байх гэж найдаж байгаа. Гэхдээ сэтгэлд нэг л хүрч өгөхгүй л байна. Уг нь өнгөрсөн жил ноолуураа гайгүй үнээр борлуулах боломжтой байсан Ч.Улаан сайдын 100 мянган төгрөгийн амлалт буруугаар эргэж, анхны үнээс нь ч хямдхан зарсан.

-Өнгөрсөн жил ноолуураа хэдэн төгрөгөөр борлуулсан бэ?

-Өнгөрсөн жил ноолуурын үнэ килограмм тутамдаа 70 мянган төгрөгөөр анх эхэлж байлаа. Тэр үед хүмүүс ямаагаа самнаж эхлээгүй байсан байх. Гэтэл сайдын шоунаас болоод 70 мянгаараа ч худалдаж чадаагүй, килограммыг нь 40 мянгаар л худалдсан даа.

Д.ЦЭДЭВСҮРЭН