“Манай анги 30 хүүхэдтэй ч цахим хичээлдээ 19 хүүхэд орж ирсэн. Үлдсэн 11 хүүхэд нь датагүй, утасгүй учраас хичээлдээ орж ирж чадсангүй. Ангийн тал шахуу хүүхэд нь хичээлийн хоцрогдолтой болох нь. Маргаашнаас цахим хичээлдээ орж ирэх хүүхдийн тоо улам багасна” хэмээн Сүхбаатар дүүргийн 35 дугаар сургуулийн 3А ангийн багш Ж.Жигдбаяр халаглан сууна. 1-5 дугаар ангийн сурагчид цахимд шилжсэн эхний өдөр багш, сурагчид яг л ийм асуудалтай тулгарч байна. Айл бүрд байдаггүй гар утас, дата, таблет сурагчдын сурах эрхийг хязгаарлаж, нэг талаараа ялгаварлаж байгаа нь энэ. Нийслэлд томуу, томуу төст өвчний тархалт эрчимжиж буйтай холбоотойгоор хамгийн их өвчлөл бүртгэгдэж буй бага болон дунд ангийн сурагчдын хичээлийг цахимд шилжүүлэх Боловсролын сайдын шийдвэр гарсан. Ингэхдээ 1-5 дугаар ангийн сурагчид арванхоёрдугаар сарын 1-нээс цахимаар хичээллэх бол 6-9 дүгээр ангийн сурагчид энэ сарын 8-наас цахимд шилжихээр болсон билээ. Тэгвэл цахим хичээл хэр үр дүнтэй байгаа, сурагчид бүрэн хамрагдаж чадаж байгаа эсэх талаар сурвалжиллаа.

                Өнөөдөр /өчигдөр/ бага ангийн сурагчдын цахим хичээл эхэлсэн эхний өдөр. Гэсэн ч сурагчид хичээлдээ бүрэн ирцтэй хамрагдаж чадсангүй. Эмээ, өвөөгийнхөө гэрт эсвэл харгалзах хүнгүй үлдсэн багачууд цахим хичээлийнхээ учрыг олохгүй төөрч, багш нь зааж, зааварласаар хичээл зарласан цагаасаа 20-40 минутын хойно эхэлж байна. Төөрч, будилсан ч цахим хичээлдээ хамрагдаж байгаа сурагчид байхад  утас, дата, таблетгүйн гачигдлаар танхимын хичээл эхлэх хүртэл хичээлдээ сууж чадахгүйд хүрч, үе тэнгийнхэн, ангийнхнаасаа сурлагаараа хоцрох хүүхэд Монгол Улсад олон байна. Тэдний зарим нь эцэг, эхээ хүлээн өвлийн хүйтэнд хүйт даасан гэртээ гал ч түлж чадахгүй, өлсөөд сууж байгаа.

ЦАХИМ ХИЧЭЭЛ ҮР ДҮНГҮЙ, АНГИЙН ХАГАС НЬ Л ЦАХИМ ХИЧЭЭЛДЭЭ ОРЖ ИРЖ БАЙНА

        Бага ангийн сурагчид хичээлдээ хэр өргөн хүрээтэй хамрагдаж байгаа талаар сурвалжлахаар Сэлбэ, 7 буудал орчим буюу Сүхбаатар дүүргийн 13 дугаар хорооны хүүхдүүдийн суралцдаг ерөнхий боловсролын 35 дугаар сургууль дээр очсон юм. Дунд, ахлах ангийнхан амны хаалт зүүж, хичээлдээ сууж байх бол 1-4 дүгээр ангийнхан хичээллэдэг сургуулийн хоёрдугаар байр чимээ аниргүй, анги бүрээс цахимаар хичээлээ заах багш нарын дуу хадаж байлаа. Тус сургуулийн 3а ангийн багш Ж.Жигдбаяр “Манай анги 30 хүүхэдтэй, цахим хичээл эхлэхээс өмнө зургаан хүүхэд өвчтэй байсан. Өнөөдөр 30 хүүхдээс 19 хүүхэд цахим хичээлдээ хамрагдсан. Үлдсэн хүүхдүүдийн асран хамгаалагч, эцэг эх нь ажилдаа явсан учраас утасгүй, датагүй, нэгжгүй гэсэн шалтгаанаар хичээлдээ орж ирээгүй. Тэднийг дараа нь нөхөж үзээсэй гээд давхар ангийн групп дээр хичээлээ оруулж байгаа. Хичээлдээ орж ирсэн 19 хүүхэд чанартай суралцаж байна уу гэвэл үгүй. Эцэг эхийн хяналтад байгаа хүүхдүүд тогтвортой суугаад хичээлээ хийж байгаа ч зарим хүүхдийн ах, эгч нь өмнөөс нь бодох, түрүүлж хариулах тохиолдол гарч байна.  Нэг айлаас бага ангид 2-3 хүүхэд явдаг айл байгаа учраас сургалтын менежертэйгээ ярилцаад ангиудын хичээл эхлэх цагийг зөрүүлсэн. Цахим хичээл үнэхээр үр дүнгүй. Ангийн хагас нь хичээлдээ орж ирнэ, ирсэн ч танхимаар орж байсан шиг сайн ойлгохгүй. Бага ангийн хүүхдүүд бие дааж сурах тал дээр хамгийн сул байдаг” гэсэн юм. 

          Тус сургуулийн 5б ангийн багш С.Сувд-Эрдэнэ “Цахим хичээлд шилжихээс өмнө ангийн 25 хүүхдийн арван хүүхэд өвчтэй, хоёр хүүхэд чөлөөтэй байсан. Нэг хүүхэд эдгээд ирэхэд, нөгөө нь өвдөөд явчихдаг, солигдож өвчлөөд байсан юм. Өнөөдөр талаас бага хүүхэд цахим хичээлдээ орсон. Манай ангийн таван хүүхэд утасгүй, зарим нь дата, нэгжгүй гэсэн шалтгаан хэлсэн. Ээж, аав нь утсаа аваад явчихсан учраас хичээлдээ орж чадаагүй хүүхдүүд ч байна. Мөн харгалзах хүнгүй учраас гурван хүүхэд хөдөө явсан гэсэн. Цар тахлын хөл хорионы үеийнхтэй ижил цахим хичээл, хичээлийн хоцрогдол дагуулдаг. Амны хаалтаа зүүгээд хичээлдээ явсан нь дээр санагддаг. Нэг талаараа өвчлөхгүй байсан хүүхдүүдийн эрхийг зөрчиж байгаа хэрэг шүү дээ” гэсэн юм.

ТАВДУГААР АНГИЙН ОХИН МИНЬ НЭГ, ХОЁРДУГААР АНГИЙН ДҮҮГЭЭ ХАРААД ҮЛДСЭН. БИ АЖИЛТАЙ УЧРААС ТЭДЭНД УТСАА ҮЛДЭЭЖ ЧАДААГҮЙ ЭЭ

               Багш нарын дурдсанчлан эцэг, эх нь ажилдаа явсан учраас бага ангийн хүүхдүүд цахим хичээлд орох утасгүй, цаашлаад харгалзах хүнгүй гэртээ үлдэж байна. Энэ талаар эцэг эхийн төлөөлөл н.Эрдэнэчимэгтэй холбогдож тодруулсан юм. Тэрбээр “Би ажилдаа явах шаардлагатай учраас хүүхдүүддээ утсаа үлдээж чадаагүй ээ. Тавдугаар ангийн охин маань утасгүй учраас цахим хичээлдээ орж чадаагүй. Хэдийгээр гэмшиж байгаа ч утсаа үлдээх боломж байгаагүй. Охин минь нэг, хоёрдугаар ангийн хоёр дүүгээ харж байгаа. Гурвуулаа бага ангийн сурагчид учраас цахим хичээлд хамрагдах ёстой ч утасгүй учраас аль аль нь хичээлдээ орж чадаагүй. Багшийнх нь тавьсан даалгаврыг оройн цагаар эсвэл амралтын өдрөөр нөхөж хийлгэнэ. Манай гурван хүүхэд ээлжлээд ханиад хүрсэн ч богино хугацаанд арга хэмжээ аваад хичээлдээ явж байсан. Хүүхдүүд цахимд шилжихээрээ хичээлээсээ их хоцордог юм билээ” гэв.

                Утас, дататай ч нэг айлын 2-3 хүүхэд бага ангид явдаг тохиолдолд хичээлийн цаг давхцах, даалгавраа бүрэн хийж чадахгүй байх асуудалтай тулгарч байгаа юм. Энэ талаар эцэг эхийн төлөөлөл Б.М “Манай хоёр хүүхэд бага ангид сурдаг юм. Хоёр цагийн зайтай хичээл нь орж байгаа болохоор тун сандруу л хичээлдээ орж байна. Том охины минь ангийн хүүхдүүд хичээлдээ орох гэж цуварсаар 40 гаруй минут болсон. Бага охины хичээл эхлэх болоод том нь хичээлийнхээ дундаас гарсан. Дараа нь, даалгавраа хийх гэж утсаа булаалцалдаад таарч байна. Манайхаас олон хүүхэдтэй айлд бүр хэцүү байгаа даа” гэсэн юм.

                Нэгжгүй, датагүй, утасгүй сурагчид цахим хичээлийн ард ийн хохирч үлдэж байна. Айл бүр ухаалаг утастай, дата, нэгжтэй байдаггүйг мэддэггүй төрийн шийдвэрээс болж, олон зуун хүүхэд хаалганы цаана, танхимаар хичээл орох өдрийг хүлээн сурч, хүмүүжих эрхээ зөрчүүлж байна.