Хүүхэд бүхний инээд хөөрөөр дүүрэн цэцэрлэгийн орчин гэдэг гэр бүлийн хамгийн чухал сонголтын нэг. Жил бүрийн намар нийслэлийн эцэг эхчүүд хүүхдээ цэцэрлэгт бүртгүүлэхээр мэдээлэл цуглуулж, харьцуулалт хийж, хамгийн зөв шийдвэрийг гаргахыг хичээдэг. Гэвч энэ шийдвэр зөвхөн сургалтын чанар, орчны аюулгүй байдлаар хэмжигдэх бус, төлбөрийн боломжтой шууд холбогддог болжээ.

2025 онд Улаанбаатар хотын хувийн цэцэрлэгүүдийн сарын төлбөр 275 мянган төгрөгөөс эхэлж, 18 сая төгрөгт хүрч байгаа нь сонголтын хүрээ өргөн ч нийгмийн ялгаа тодорч байгааг илтгэнэ.

Бид нийслэлд үйл ажиллагаа явуулж буй хувийн цэцэрлэгүүдийн төлбөр, сургалтын хөтөлбөрийг сурвалжиллаа.

“ЖАРГАЛАН” ЦЭЦЭРЛЭГ

Сонгинохайрхан дүүрэгт байрлах “Жаргалан” цэцэрлэг нь сургуулийн өмнөх боловсролын үндэсний хөтөлбөрийг хэрэгжүүлдэг, хувийн хэвшлийн боловсролын байгууллага юм. Уг цэцэрлэг нь дунджаар 15-20 хүүхэдтэй бүлгүүдтэй, тохилог анги танхим, тоглоомын булан, гадна тоглоомын талбайтай.

Сургалтын хөтөлбөр:

Үндэсний сургалтын хөтөлбөр

Үсэг, тоо танилцуулга, дүрслэх урлаг, хөгжмийн анхан шатны ойлголт

Биеийн тамир, хөдөлгөөний дасгал

Ёс суртахуун, харилцааны чадвар хөгжүүлэх хичээлүүд

Бүлгийн үйл ажиллагаа, тоглоомын сургалт

Хүүхдийн нас, онцлогт тохирсон танин мэдэхүйн болон бүтээлч хөгжлийн аргачлал ашигладаг

Төлбөр:

Сарын төлбөр: 450.000 төгрөг

Төлбөрт өдрийн хоол, хичээлийн хэрэглэгдэхүүн багтсан.

“ГОЁ ЕРТӨНЦ” ЦЭЦЭРЛЭГ

“Гоё ертөнц” цэцэрлэг нь Баянзүрх дүүргийн нутаг дэвсгэрт байрладаг. 2018 оноос үйл ажиллагаагаа эхлүүлсэн тус цэцэрлэг нь хүүхэд бүрийг өөрийн онцлогт тохируулан хөгжүүлэхийг зорьдог бөгөөд эцэг эхчүүдийн дунд тохилог орчин, анхаарал халамжтай багш нараараа танигдсан. Цэцэрлэгийн анги танхимууд нь гэрэлтүүлэг сайтай, тохижилт, тав тухыг хангасан бөгөөд 2-5 насны хүүхдүүдийг хамруулан сургалтаа зохион байгуулдаг.

Сургалтын хөтөлбөр:

Монгол Улсын сургуулийн өмнөх боловсролын үндэсний хөтөлбөр

Англи хэлний суурь ойлголт олгох хичээлүүд

Урлагийн боловсрол: дуу, бүжиг, дүрслэх урлаг

Хөдөлгөөний дасгал, тоглоомоор дамжуулан суралцах арга

Ёс зүй, харилцааны эерэг дадал төлөвшүүлэх сургалт

Сар бүр сэдэвчилсэн хөтөлбөрөөр хичээллэж, хүүхдийн бүтээлийг    танилцуулах өдөрлөг зохион байгуулдаг

Төлбөр:

Сарын төлбөр: 600.000 төгрөг

Хоолны зардал, сургалтын хэрэглэгдэхүүн багтсан

Төлбөрийг улирал, хагас жилээр төлсөн тохиолдолд хөнгөлөлт үзүүлдэг

Шинээр элсэгчдэд нэг удаагийн элсэлтийн хураамж 100.000 төгрөг.

“ЭРДЭМ” ЦЭЦЭРЛЭГ

“Эрдэм” цэцэрлэг нь Баянгол дүүргийн нутагт байрладаг. Сургалтын таатай орчин, тогтвортой багшийн бүрэлдэхүүнтэйгээр үйл ажиллагаа явуулдаг тус цэцэрлэг нь 2-5 насны хүүхдийг хамруулан сургалтаа явуулдаг. Тохилог, цэвэр орчин, хүүхдэд ээлтэй тохижилт бүхий анги танхимуудтай бөгөөд эцэг эхчүүдийн дунд найдвартай, дундаж төлбөртэй цэцэрлэгт тооцогддог.

Сургалтын хөтөлбөр:

Үндэсний сургалтын хөтөлбөрийг хэрэгжүүлдэг

Хүүхдийн нас, хөгжилд тохирсон хичээл, үйл ажиллагааг зохион байгуулдаг

Дуу хөгжим, дүрслэх урлаг, хөдөлгөөний дасгал зэргийг хослуулсан өдөр тутмын хөтөлбөртэй

Танин мэдэхүй, харилцаа, бие даасан байдлыг дэмжих сэдэвчилсэн сургалттай

Сургалтын үйл ажиллагаа тоглоомоор дамжуулан явагддаг

Төлбөр:

Сарын төлбөр: 495.000 төгрөг

Хоолны зардал болон хэрэглэгдэхүүн багтсан

“ХҮҮХЭД ЭРДЭНЭ” ЦЭЦЭРЛЭГ

“Хүүхэд эрдэнэ” цэцэрлэг Баянзүрх дүүрэгт байрлалтай бөгөөд төр-хувийн хэвшлийн түншлэлийн зарчмаар ажилладаг хагас улсын хэлбэрийн цэцэрлэг. Харьяалалтай болон харьяалалгүй хүүхдүүдийг хамруулан, өөр өөр төлбөрийн нөхцөлтэйгөөр сургалтаа зохион байгуулдаг. Цэцэрлэгийн орчин тохилог, хүүхдийн хөгжилд ээлтэй, мэргэжлийн багшийн бүрэлдэхүүнтэй.

Сургалтын хөтөлбөр:

Монгол Улсын сургуулийн өмнөх боловсролын үндэсний хөтөлбөрөөр хичээллэдэг

Хөгжим, бүжиг, дүрслэх урлаг, биеийн хөгжил зэрэг хичээлийг өдөр тутам зохион байгуулдаг

Хүүхдийн нас, хөгжлийн онцлогт тохирсон хөтөлбөр, тоглоомын аргачлал хэрэглэдэг

Сургалтын хэрэглэгдэхүүнийг улирал бүр шинэчилж, баяжуулдаг

Төлбөр:

Харьяалалтай хүүхэд: 275.000

Харьяалалгүй хүүхэд: 550.000

“БЯЦХАН МОНГОЛ” ЦЭЦЭРЛЭГ

“Бяцхан Монгол” цэцэрлэг нь салбар бүртээ өөрийн орчны онцлог, сургалтын уур амьсгалтайгаар үйл ажиллагаа явуулдаг цогц боловсролын байгууллага юм. Улаанбаатар хотод Зайсан, Төв салбар (Баянзүрх), Нисэх гэсэн гурван салбартай. Тус цэцэрлэг нь бага насны хүүхдэд зориулсан цэгцтэй сургалтын хөтөлбөр, тав тухтай анги танхим, аюулгүй тоглоомын орчныг бүрдүүлснээр эцэг эхчүүдийн итгэлийг хүлээсэн байгууллагын нэг.

Сургалтын хөтөлбөр:

Сургуулийн өмнөх боловсролын үндэсний хөтөлбөр дээр суурилсан хичээл, үйл ажиллагаа явуулдаг

Хүүхдийн нас, хөгжлийн түвшинд тохирсон танин мэдэхүйн сургалт, дүрслэх урлаг, хөгжим, хөдөлгөөн зэрэг чадваруудыг хөгжүүлдэг

Төлбөр:

Зайсан салбар: 1.500.000 төгрөг

Төв салбар:  1.100.000 төгрөг

Нисэх салбар: 750.000 төгрөг