Зуны амралт дуусч, хичээлийн шинэ жил эхлэхэд хэдхэн хоног үлджээ. Шинээр сургуулийн босго алхаж буй хүүхдүүд шинэ мэдлэг, шинэ уур амьсгал, шинэ багшийнхаа мэндчилгээг тэсэн ядан хүлээж байгаа энэ үед эцэг эхчүүд хүүхдийнхээ боловсролын орчин, сургалтын чанар, юуны өмнө төлбөрийн асуудлыг судалж эхэлдэг. Улаанбаатар хотод үйл ажиллагаа явуулж буй хувийн сургуулиудын 2025-2026 оны хичээлийн жилийн сургалтын төлбөр, сургалтын онцлог, хөтөлбөрүүдийг танилцуулж байна.

INTERNATIONAL SCHOOL OF ULAANBAATAR (ISU)

ISU нь олон улсын IB (International Baccalaureate) хөтөлбөрийг хэрэгжүүлдэг тэргүүлэх сургууль бөгөөд 3-19 насны сурагчдад зориулсан PYP, MYP, DP гэсэн гурван түвшний хөтөлбөртэй. Сургалт нь100% англи хэл дээр явагддаг ба гадаад, өндөр мэргэжлийн багш нар ажилладаг.

Сургалтын төлбөр: 126,000,000 төгрөг (ойролцоогоор 36,750 ам.доллар)

IB диплом нь дэлхийн 140 гаруй орны их сургуулиудад хүлээн зөвшөөрөгдөж, сурагчдыг олон улсын түвшинд өрсөлдөхүйц боловсрол эзэмшүүлэхэд чиглэдэг.

JET INTERNATIONAL SCHOOL

Jet International School нь STEAM (Шинжлэх ухаан, Технологи, Инженерчлэл, Урлаг, Математик) хөтөлбөрийг англи хэл дээр заадаг олон улсын стандартад нийцсэн сургууль юм. Сурагчид төслийн ажилд идэвхтэй оролцож, бүтээлч сэтгэлгээгээ хөгжүүлэх боломжтой.

Сургалтын төлбөр: 13,000,000 төгрөг

IELTS болон Cambridge шалгалтуудад бэлтгэх хөтөлбөрөөрөө англи хэлний өндөр түвшинг олгоход анхаардаг.

TOMUJIN ALTERNATIVE SCHOOL

Tomujin Alternative School нь Канад, Сингапур, Австралийн боловсролын загваруудыг үндсэн хөтөлбөртөө нэвтрүүлж, STEAM чиглэлээр гүнзгийрүүлэн сургалт явуулдаг. Хүүхдийн асуудал шийдэх чадварыг хөгжүүлж, олон улсын олимпиад, шалгалтуудад оролцох боломж олгодог.

Сургалтын төлбөр: 29,900,000 төгрөг

Програмчлал, мэдээллийн технологийн суурь мэдлэгийг бэхжүүлэхэд онцгойлон анхаардаг.

ШИНЭ МОНГОЛ ХАРҮМАФҮЖИ СУРГУУЛЬ

Шинэ Монгол сургууль нь үндэсний хөтөлбөрийн хүрээнд япон сургалтын арга зүйг хослуулан сургалт явуулдаг. Ёс зүй, сахилга бат, хариуцлагыг хөгжүүлэхэд онцгой анхаарал хандуулдаг бөгөөд яон багш нартай.

Сургалтын төлбөр: 8,100,000 төгрөг

Монгол хэл, математик, байгалийн ухааны хичээлүүдийг гүнзгийрүүлэн заадаг.

ОЛОНЛОГ БҮРЭН ДУНД СУРГУУЛЬ

Олонлог сургууль нь үндэсний хөтөлбөрийг дагаж мөрддөг боловч англи хэл, шинжлэх ухаан, тоон сэтгэлгээнд нэмэлт анхаарал хандуулдаг. Хүмүүжил, ёс суртахуунд чухал ач холбогдол өгдөг.

Сургалтын төлбөр: 8,500,000 төгрөг

Оюун ухааны олимпиад, хэлний сургалтуудыг идэвхтэй явуулдаг.

ШИНЭ ҮЕ БАГА СУРГУУЛЬ

Шинэ Үе бага сургууль нь бага насны хүүхдийн нас онцлогт тохирсон сургалтын хөтөлбөр боловсруулсан бөгөөд “individualized learning” буюу хүүхэд бүрийн онцлог, хэрэгцээнд нийцсэн сургалтыг эрхэмлэдэг.

Сургалтын төлбөр: 8,000,000 - 9,000,000 төгрөг

Унших, бичих, тоо бодох чадварыг сайжруулахад түлхүү анхаардаг.

Хүүхдийнхээ ирээдүйн боловсролд тавих хөрөнгө оруулалт нь зөвхөн төлбөр төдий биш, хөтөлбөрийн чанар, багшлах арга барил, суралцах орчинд шингэх ёстой. Тиймээс эцэг эхчүүд сургуулийн хөтөлбөрийн онцлогийг гүнзгий судалж, хүүхдийнхээ нас, сонирхол, зорилгод тохируулан сонголтоо хийх нь хамгийн чухал.