Хаврын энэ л өдрүүдэд сургуулиуд төгсөлт, хонхны баяраа хийдэг билээ. Сургуулийнхаа ширээнд баяртай гэж хэлэх амьдралын хамгийн дурсамжтай эл баяраа тэмдэглэх гэж догдлохын сацуу өмсөх хувцас, төлбөл, монтажны мөнгө гээд чамлахааргүй их зардал гаргах хэрэгтэй болдог. Тиймээс төгсөлтийн баяртай холбоотойгоор хонхны баяр тойрсон үнэ ханшийг сурвалжиллаа.

ХОНХНЫ БАЯРААР ӨМСӨХ ДЭЭЛ 130-899 МЯНГАН ТӨГРӨГ БОЛ НҮҮР БУДАЛТ 80-210 МЯНГАН ТӨГРӨГ

Их сургуулийн хонхны баярын голлох гоёл нь дээл байдаг билээ. Жил бүрийн тренд загваруудыг хонхны баярын үеэр харж болно. Нарантуул худалдаан төв дээр эмэгтэй дээлийн үнэ загвар, материалаасаа хамаараад 200 мянган төгрөгөөс эхэлж байгаа аж. Тус худалдааны төв дээр наймаа эрхэлж буй Д.Алимаа “Тавдугаар сар эхэлснээс хойш хонхны баяраар өмсөх дээлээ авах гэж байгаа гэсэн залуус орж ирж байгаа. Энэ жил бүдэг ягаан, шаргал өнгийн дээл эрэлттэй байна. Манай лангууны дээл 200-450 мянган төгрөгийн хооронд байна” гэсэн юм. Хүмүүсийн танил болсон “Түмэн торго” брэндийн дээл 299-899 мянган төгрөгийн хооронд үнэтэй байгаа бол “Эбэхэй” брэндийн эмэгтэй дээлүүд 450-850 мянган төгрөгийн хооронд байна. Борголжин брэндийн дан дээлийн үнэ 130 мянган төгрөгөөс эхэлсэн бол “Iveel” брэндийн эмэгтэй дан дээлийн үнэ 125 мянган төгрөгөөс эхэлж байлаа.

       Хонхны баяраа тэмдэглэх гэж байгаа охид нүүрээ мэргэжлийн нүүр будагчаар будуулахыг эрмэлздэг. Баярын будалт студи, хувь хүн гэдгээсээ хамаарч 80-210 мянган төгрөгийн дундаж үнэтэй байгаа бөгөөд нэмэлтээр үсээ янзлуулбал 35-75 мянган төгрөг төлөх юм.

ДУРСАМЖИЙН ЦОМОГ 75-180 МЯНГАН ТӨГРӨГИЙН ДУНДАЖ ҮНЭТЭЙ БАЙНА

       Сургуулиа төгсөж буй оюутан сурагч нарт хамгийн нандин мөчийг зураг болгон хадгалдаг дурсамжийн цомог хуудас, нүүрний тооноосоо хамаараад өөр өөр үнэтэй байна. Дөрвөн хуудас, арван нүүртэй нэг дурсамжийн цомог 75-180 мянган төгрөгийн дундаж үнэтэй байгаа бөгөөд хуудасны тоо нэмэгдсэн тохиолдолд дурсамжийн цомгийн үнэ нэмэгдэх юм. Харин төгсөлтийн баярынхаа дүрс бичлэгийг хийлгэх студийн үнэ 400 мянган төгрөгөөс эхэлж байна.

       Төгсөлтийнхөө баярыг хийж байгаа гэдгийг нь илтгэх хамгийн нандин дурсамж болж үлдэх өдрийг нь илүү онцгой болгодог зүйл бол хонх билээ. Энгэртээ зүүх мөнгөн хонх, нэр, туузаар хийсэн энэхүү гоёлын үнэ 5000 мянган төгрөгөөс эхлэх бөгөөд чимэглэл, хийцээсээ хамаараад үнэ нь өөр байгаа юм.  Энэ жилийн тренд болоод буй тууз болон хонх хосоороо 15-25 мянган төгрөгийн хооронд үнэтэй байна.

АМРАЛТЫН ГАЗРЫН БАЙШИНГИЙН ҮНЭ 300 МЯНГАН ТӨГРӨГ, АВТОБУС 250 МЯНГАН ТӨГРӨГӨӨС ЭХЭЛНЭ

Хонхны баяраа хийх гэж байгаа оюутан, сурагч нар 80-330 мянган төгрөгийн нэг хүний багцтай ресторанаас сонголт хийх боломжтой. Багцад салат, хоёр хоол, амттан, уух зүйлс багтана. Зарим рестораны хувьд 40-90 мянган төгрөгийн үнэ бүхий уух юмны багцаар тусад нь үйлчлэн. Ингэж багц авсан тохиолдолд тухайн заалыг 4-5 цаг ашигладаг бөгөөд цаг сунгахыг хүсвэл 100-200 мянган төгрөг нэмж төлнө.

                Төгсөлтийн баярын үйл ажиллагаа амралт зугаалгаар үргэлжлэн. Хонхны баяр дөхсөн энэ өдрүүдэд амралт хүн зоны хөлд дарагддаг билээ. Харин тус амралтын газрын нэг байшингийн үнэ 300 мянган төгрөгөөс эхэлдэг. Байршил болон амралтын газрын тухтай байдлаас шалтгаалан үнэ нь нэмэгдсээр хоёр сая хүрэх нь ч бий. Хаус, байшин, гэр гэсэн олон сонголтоос төгсөлтийн баяраа хийж байгаа ангиудын нийтлэг сонголт нь байшин байдаг гэнэ. Харин тэднийг хүргэж ирэх автобусны үнэ хол ойроосоо шалтгаалаад нэг талдаа 250-500 мянган төгрөгийн хооронд амандаа багтсан үнийг хэлнэ.