Улаанбаатар хотын Захирагчийн ажлын алба Хүнс, хөдөө аж ахуй, хөнгөн үйлдвэрийн яамтай хамтран нийслэлийн хүн амын хүнсний хангамжийг сайжруулах, үндэсний үйлдвэрлэгчид, тариаланчдын шилдэг бараа бүтээгдэхүүн, шинэ ургацын дээжийг хэрэглэгч түмэнд хүргэх зорилгоор “Намрын ногоон өдрүүд” үзэсгэлэн худалдааг зохион байгуулдаг. Тэгвэл энэ жилийнх есдүгээр сарын 26-29-нд Төв цэнгэлдэх хүрээлэнгийн гадна талбайд болж байна. Энэхүү үзэсгэлэнд 21 аймгаас шалгарсан бүтээгдэхүүн, жижиг, дунд үйлдвэрлэлийн бизнес эрхлэгчид оролцож буй. Тодруулбал, 21 аймаг, нийслэлийн, мөн хүнсний боловсруулах салбарын 450 гаруй иргэн, хоршоо, аж ахуйн нэгж оролцон бүтээгдэхүүнээ танилцуулан, худалдаалж байна. 19 дэх жилдээ зохион байгуулж буй энэхүү үзэсгэлэн нь шинэ ургацын ногоо, жимс жимсгэнэ, нарийн ногооноос гадна сүү, сүүн бүтээгдэхүүн, загас, зөгийн бал, дотоодын үйлдвэрлэлийн бүтээгдэхүүнүүдийг дундын зуучлагчгүй үйлдвэрлэгчийн гар дээрээс худалдан авах боломжийг олгодгоороо онцлог. Мөн энэ жилийн нэг онцлог нь нийт оролцогчдыг долоон бүсэд хувааж, бүс бүр тайзыг ашиглан, өөрсдийн үйл ажиллагаа, бүтээгдэхүүн, тухайн бүс нутгийнхаа өв соёл, онцлог, ондоошил, зан заншлыг таниулах, сурталчлах нөхцөлийг бүрдүүлсэн явдал юм. Нэг аймагт хоёр асар оногдох бөгөөд асартаа тухайн нутгийнхаа онцлог бүтээгдэхүүнийг зарж байлаа.

1500 километр замыг туулан энэхүү үзэсгэлэн худалдаанд оролцохоор ирсэн Ховд аймгийн Буянт сумын Тариалан эрхлэгчдийн холбооны гишүүн А.Энхцацрал “Тав дахь жилдээ энэхүү үзэсгэлэн худалдаанд зорин ирж оролцож байна. Хүмүүс тус үзэсгэлэнг их хүлээдэг болсон юм шиг санагдлаа. Миний хувьд ч их өндөр хүлээлттэйгээр зорин ирдэг. Өнөөдөр /өчигдөр/ хэдий хүйтэн, хуртай байсан ч хүмүүс олноор зорин ирж, худалдан авалт сайн байна. Өмнөх жилүүдэд үзэсгэлэнг дотор зохион байгуулдаг байсан. Харин энэ жил гадна зохион байгуулж байгаа болохоор худалдан авагчдын хувьд авсан бүтээгдэхүүнээ зөөх, машинаа оруулах гэх мэтэд бэрхшээл тулгарч байна. Манайх шинэ ургацын тарвас, амтат гуа, өргөст хэмх, улаан лооль гэх мэт бүтээгдэхүүн худалдаалж байгаа. Хүмүүс амталж үзээд авч байгаа болохоор худалдан авалт сайн байна” гэлээ.

Жижиг, дунд бизнес эрхлэгчид ч өөрсдийн бүтээгдэхүүнээ таниулан сурталчилж, худалдаалж байлаа. Хөвсгөл аймгийн Рашаант сумаас үзэсгэлэнд оролцож буй “Оточ домт” ХХК-ийн үүсгэн байгуулагч Ц.Отгонбаяр “Энэ жил мөн адил талбайн түрээсгүй зохион байгуулж байгаа нь сайхан байна. Гадна талбайд зохион байгуулсан нь өнгөрсөн жилүүдийнхээс бага аж ахуйн нэгж, хоршоо, иргэд оролцоход нөлөөллөө. Манайх тэмээний чөмөгний тос, талын хартай үе мөчний тос, 50 гаруй эмийн ургамал худалдаалж байгаа. Манай бүтээгдэхүүнүүд эрүүл мэндэд чиглэсэн болохоор худалдан авалт илүү сайн байдаг” хэмээлээ.

Үзэсгэлэн худалдаанд анх удаа оролцож буй Өвөрхангай аймгийн Есөнзүйл сумын малчин С.Шүрэнцэцэг “Хашаа руу нь ороход их хүндрэлтэй санагдсан. Үүнээс гадна оролцож буй оролцогчдынхоо машиныг зогсоолд үнэгүй зогсооно гэсэн чинь цагийн 1000 төгрөгийн төлбөр авч байна. Орж гарах, бараагаа зөөхөд хүндрэлтэй байлаа. Манайх айраг, ааруул, шар тос, шар сүүний чихэр, хайлмаг, өрөм, хатаамал, шар сүүний молоко гэх мэт 20-иод төрлийн бүтээгдэхүүн борлуулж байна. Энэхүү бүтээгдэхүүнүүдээ малчныхаа хотонд өөрөө үйлдвэрлэдэг. Тиймээс ч хүмүүс их сонирхож, худалдан авч байна. Зарим нь бүр захиалга өгсөн. Дараа жил ч бас ирж оролцоно гэж бодож байна” гэлээ.

Энэхүү үзэсгэлэнг зорин ирэх хүмүүсийн цуваа тасрахгүй байсан бөгөөд үзэсгэлэн өнөөдөр 20:00 цагт өндөрлөх юм. Үндэсний үйлдвэрлэгчдийнхээ өвөрмөц, содон, шинэлэг бүтээгдэхүүнийг худалдан авах боломж олгодог, шинэхэн ургацын ногоогоо тариаланчдын гар дээрээс шууд авах нөхцөлийг бүрдүүлдэг эл үзэсгэлэн худалдаа нь их хүлээлт үүсгэдэг, үнийн хувьд ч, чанарын хувьд ч боломжийн байдаг тухай иргэд онцоллоо.