“Чиний хөл томорсон уу? Миний өнгөрсөн жил өмсөж байсан пүүз надад таарахаа болиод би дүүдээ өгсөн. Алив хоёулаа шалгаж үзье” гээд зүүн, баруун хөлөө зэрэгцүүлэн тавих бага ангийн хоёр жаал хичээлийн эхний өдрөө ийнхүү жаргалтай гэгч нь эхлүүлж байна. “Ангиараа зургаа даруулъя” гээд элгэмсгээр бие биесээ хүзүүдэн сургуулийнхаа үүдэнд зогсох сурагчид, тэдний хажууханд хүүхдүүдийнхээ хичээл тарахыг  хүлээж байгаа бололтой эцэг эхчүүд сүүдэр бараадан сууна.

         “Танай хүүхэд зуны даалгавраа хийсэн үү, манай хүүхэд хийгээгүй ээ. Манай сайн эр талыг нь хийсэн” гэх хөнгөн яриа сургуулийн хашаанд өрнөж байв. Дэлгэр зуны өдрүүд дуусаж, хүүхэд багачуудын хүсэн хүлээсэн хичээлийн шинэ жил ийн эхэллээ.

Хичээлийн шинэ жил хэрхэн эхэлж байгааг сурвалжлахаар бид Монгол гуравдугаар сургуульд очсон нь энэ. Сургуулийн хаалгаар ормогц жижүүр багш хүмүүсийг хаашаа ямар зорилгоор явж байгааг нь асууж,  эцэг эхчүүдэд II ээлжийн ангиудын тарах цагийн хуваарийг танилцуулж, гадаа хүлээж байхыг эелдгээр сануулж байв.

Монгол гуравдугаар сургуулийн жижүүр  багш Г.Заяажаргалаас хичээлийн шинэ жил эхэлсэнтэй холбоотой цөөн хорим ярилцлаа. Тэрбээр “манай сургууль энэ хичээлийн жил хоёр ээлжээр хичээллэж байна. Нэгдүгээр ээлж нь өглөө 07:40  цагаас, хоёрдугаар ээлж нь өдөр 13:30 цагаас ордог. Өглөөний ээлжид хоёрдугаар анги болон ахлах ангиуд хичээллэж байгаа. Нэгдүгээр ангийнхний хичээл үдээс хойш 13:30 цагаас орж байна. Манай сургуулийн хувьд  таван бүлэгт 200 орчим сурагч шинээр элссэн.  Хичээлийн эхний өдөр гэхэд ажлын ачаалал харьцангуй  бага байна” гэв.  

Сургуулийн хаалга нээгдэж “3г анги тарсан уу” гэх дуу сонсогдоно. Жижүүр багш “Болоогүй ээ 16:30 цагаас тарна” хэмээн хариулав. “Өө цэцэрлэгийн хүүхдийн авах цагтай давхацчихлаа. Яана аа” гээд сандран гүйх аав, нярайгаа салхилуулангаа хүүхдээ тарахыг хүлээж суугаа ээжүүд, School police хийж байгаа эцэг эх, өвөө эмээ нар бүгд хичээл тарах цагийг хүлээн сууна.

Шинэхэн дүрэмттэй зургаан настнууд 16:04 цагт сургуулийн хаалгаар хөтлөлцөн гарч ирсэн бөгөөд ногоон, нил ягаан, шар, ягаан өнгийн гастукаар гоёжээ. Анги тус бүр өөр өөр өнгөөр ижилссэн байна. “Шар өнгийн гастуктай хүүхдүүд гараад ирлээ манай хүүхэд одоо гарч ирэх юм байна” гээд шинэ сурагчийн аав хүүхдүүдийн зүг ухасхийн босно.

            “Сургуульд орсон эхний өдөр үнэхээр таалагдаж байна. Цэцэрлэгийнхээ найзтай нэг ангид орсон бас багшдаа ерөөсөө загнуулаагүй.  Сургууль цэцэрлэгийг бодвол эрт тардаг юм байна. Цэцэрлэг дээр унтуулдаг, харин сургууль дээр унтуулаагүй нь маш их таалагдсан. Анги дээр багш маань дүрс бичүүлж, зураг будуулж, шүлэг заасан гээд багшийнхаа заасан “6 настай сурагч” хэмээх шүлгээ цүнхнээсээ гаргаж ирээд  уншиж өглөө. Хараахан уншиж сураагүй хэдий ч цаасаа зөв гэгч нь өмнөө бариад бага зэрэг түгдрэн шүлгээ унших цовоо хүүг Б.Ананд-Очир гэнэ. Түүнд сургуулийн эхний өдөр маш их таалагдсан нь инээд цалгисан царайнаас нь илт...

Тус сургуулийн гуравдугаар ангийн сурагч Б.Түмэнзаяа: “Хичээл орсон эхний өдөр найзуудтайгаа уулзаад  үнэхээр гоё байсан. Би ангийнхаа бүх хүүхэдтэй найзалдаг, бүгдийг нь санасан. Тэдэн дундаас Нандин-Эрдэнэ, Сондор, Уранзаяа гурвыг хамгийн их санасан. Зуныхаа даалгаврыг бүгдийг нь хийсэн боловч манай багш хараахан шалгаагүй. Зуныхаа амралтаараа Сэлэнгэ аймаг болон Дархан-Уул аймагт очиж үзсэн. Сэлэнгэ аймгийн Сайхан хөтөл-д очиж дүүжин гүүр үзсэн.  Өндөр маань хүрээгүй учир дүүжин гүүрэн дээгүүр алхаж чадаагүй” гэв.

Гуравдугаар сургуулийн эцэг эхчүүд анги ангиараа хоёр ээлжээр Scool police хийдэг юм байна. Нэгдүгээр ээлж нь 07:00-13:00 цагийн хооронд гардаг бол хоёрдугаар ээлж нь 13:00-19:00 цагийн хооронд гарах хуваарьтай. Энэ тухай 6в ангийн эцэг, эхийн төлөөлөл Б.Цэрэнбат бидэнтэй сэтгэгдлээ хуваалцсан юм. Тэрбээр “Нэгдүгээр ангид орж байгаа хүүхдүүдийн хувьд эхний өдөр болохоор ч тэр үү төөрсөн байдалтай байна. Өглөө нэг хүүхэд “Ангиа олохгүй байна. Би ерөөсөө харилаа”  гээд гүйж байсан. Харин тарах үеэр эцэг эхчүүд нь жоохон хоцорч ирэхээр “манайхаас намайг авах хүн ирээгүй байна. би харимаар байна, хүргээд өг” гээд  уйлаад ирж байх жишээний. Иймэрхүү хөөрхөн тохиолдлууд гарч байна. Эхний өдөр болохоор арга ч үгүй биз”  хэмээн зургаан настнуудыг өхөөрдсөн, хайрласан өнгө аясаар сэтгэгдлээ бидэнтэй хуваалцсан юм.

Ийнхүү хүүхдийн инээд хөөр, баяр баясал цалгисан дурсамж дүүрэн хичээлийн шинэ жил эхэллээ.

Б.ОТГОНЗАЯА