Хаврын урь орсон эл өдрүүдэд автомашины үнэ ханш ямар байгаа талаар сурвалжлахаар “Да хүрээ” захыг зорилоо. Хаврын ид худалдан авалтын үе бөгөөд ноолуур худалдаанд гарч буй сургаар ченжүүд “Машины үнээ нэмнэ” хэмээн иргэд таамаглаж буй. Өөрөөр хэлбэл, эл өдрүүдэд малчид ойр зуур унах суудлын машинаас авахуулаад ачааны портер машин ихээр худалдан авдаг. Үүнтэй холбоотойгоор автомашины үнэ дахин нэмэгдэх магадлал өндөр байна. Иргэд хөл дүүжлэх унаатай болох аль эсвэл унасан унаагаа “томруулах”-аар автомашины зах, төвүүдийг зорих нь элбэг. Зарим нь бэлтэй харагдахаар автомашин унадаг гэхэд ч хилсдэхгүй. Тэгвэл эрэлт эхэлсэн байх ёстой энэ үеэр автомашины худалдан авалт, үнэ ханшийн үзүүлэлт ямар байгаа талаар сурвалжиллаа.

         Урь орсонтой холбоотойгоор нийслэл хот шавар шавхай, хог шороотой байна. Хаа сайгүй цасны ус хайлж, гудмаар явган явахад хүндрэл болоод буй.  Биднийг “Да хүрээ” захад очиход шавар шавхай болсон гуталтай ченжүүд машинаа өндөр үнээр зарчих санаатай байна. Харин тэдний үнийг сонссон худалдан авчид“ Пүү паа” хэмээн буцаж буй. Зах автомашинаар “хахсан” хэдий ч эзэнгүй худалдааны талбай. Худалдан авагч бага байгаагаас автомашин борлуулагчид ч нам гүм. Эгнэн байрласан автомашинуудад  “Хаврын урамшуулал 1.5 хувийн хямдрал” хэмээх бичгийг энд тэндгүй өлгөсөн байх. Тэр тусмаа ББСБ Урамшуулал, хямдрал зарласан ч худалдан авалт тааруу байгааг хэлж байлаа. Тэдний ярьж буйгаар өнгөрсөн хавар өдийд автомашины борлуулалт сайн байсан гэнэ. Мөн лизинг худалдааг олон төрлийн сонголт боломжоор гаргаж байгаа ч авах хүн олдохгүй байгаа сурагтай. Харин унаж байсан автомашинаа зарах гэсэн иргэдийн хөл тасрахгүй байгаа гэнэ. Үүнээс гадна автомашин худалдан авахаар ирж буй иргэдийн 80 орчим хувь нь арилжааны банк болон ББСБ-ын нөхцөлөөр автомашин худалдан авч байгаа талаар худалдаачид хэлж байна. Мэдээж эдийн засгийн хүнд нөхцөлд бэлэн мөнгөөр автомашин худалдан авах иргэд барагтай байхгүй. Аймгийн ойн баяраар шинэ машин унах санаатай яваа иргэнээс тодруулахад “Энэ зун манай аймгийн ойн баяр болно. Тиймээс шинэ унаа авчих санаатай энд ирээд байна. Хөл дүүжлэх унаатай болохоор шийдэж, автомашин худалдааны төвийг зорьж ирээд байна. Автомашины үнэ ч өнгөрсөн жилийнхтэй адил байх шиг байна. Аймгийнхаа наадамд очих тул жижиг ч болтугай унаа авъя гэж санаалсан юм. Сайн үзэж байгаад л худалдаж авахыг бодно доо. Байгаа мөнгөндөө л тааруулаад машин хайж байна. Ер нь бол ченж нар өөр өөр л үнэ хэлж байна. Болохгүй бол дахиад өөр автомашины зах орж судална даа" гэх хариултыг өгсөн юм.

Байгаа мөнгөндөө л тааруулаад машин хайж байна. Ер нь бол ченж нар өөр өөр л үнэ хэлж байна

           Автомашины худалдан авах гэж буй хүний тоо цөөрсөн талаар "Да хүрээ"-д тэвштэй автомашины худалдаа эрхэлдэг 50 орчим насны эрэгтэйгээс асуухад тэрбээр “Портер үйлдвэрлэсэн оноосоо хамаараад янз бүрийн л  үнэтэй байна даа. Манайх энэ жил 2004-2008 онд үйлдвэрлэгдсэн автомашинуудыг худалдаалж байна. Энэ портер гэхэд 2008 оных 14 сая төгрөгөөр зарагдаж байгаа" гээд хажуудах автомашинаа зааж байна. Тэрбээр үргэлжлүүлэн "Автомашин оноосоо шалтгаалж, үнийн хувьд өсөлт байхгүй. Өмнөх хэдэн өдөр хүний хөл хөдөлгөөн тасардаггүй, орлого ч сайн байсан. Харин энэ жилийн хувьд худалдан авалт эрс муу байна. Энэ жил Монгол Улсыг хамарсан зудны нөхцөл байдлаас хамаараад малчид портер машин худалдан авахгүй байна” гэв.

  "Да хүрээ" төвийн хашаан дотор "Ямар машин сонирхож байна", "Сайн яриад өгнө шүү" гэсэн олон ченж угтаж байна. Нэг нэгнээсээ ам "уралдаж", хариу хэлээгүй байхад нь л машин руугаа оруулж, суулгачих гээд л зогсож байх. Тус төвөөс сүүлийн жилүүдэд иргэдийн түлхүү сонирхох болсон "Aqua", "Prius-20", "Prius-30", "Harrier" зэрэг автомашины үнийг сонирхвол

          "Да хүрээ" захын зогсоол дээр ченж нар зарж буй автомашинаа тавихаас гадна машин авахаар ирсэн хүмүүс тээврийн хэрэгслээ байршуулдаг аж. Автомашин тус бүрээс 2000 төгрөгийн хураамж авах бөгөөд төлбөрөө төлсөн автомашины эзэн тухайн өдрийн турш нэмэлт төлбөр төлөлгүйгээр машинаа байрлуулж болдог гэнэ. Цаг алдалгүй хэдэн тийш гүйж, захын талбай руу орж байгаа автомашинаас төлбөр авч буй үүдний жижүүр “Өнөөдөр үйлчлүүлэгчдийн тоо харьцангуй бага байна. Хүмүүс манай захыг амралтын өдрүүдээр амардаг гэж боддог учир үйлчлүүлэгч цөөн байдаг. Харин автомашинаа бусдад шилжүүлэх, даатгалд бүртгүүлэх гэж ирж байгаа улс их байна даа” гэв. 

Автомашин оноосоо шалтгаалж, үнийн хувьд өсөлт байхгүй. Өмнөх хэдэн өдөр хүний хөл хөдөлгөөн тасардаггүй, орлого ч сайн байсан. Харин энэ жилийн хувьд худалдан авалт эрс муу байна

           Иргэдийн хамгийн их сонирхдог “Prius 20” маркийн автомашин нь орж ирсэн оноосоо хамаарч, “Да хүрээ” захад орж ирсэн нь 16-19 сая бол Монголд явж байсан нь 12-15 сая байна. Харин “Үнэгүй.мн”-д 13 сая төгрөгийн дундаж үнэтэй байгаа юм. Үүнээс гадна хөдөө орон нутгийн иргэд түлхүү сонирхдог, түлшинд хэмнэлттэй “Probox” машин орж ирсэн оноосоо хамаарч, “Да хүрээ” захад 10-14 сая, “Үнэгүй.мн”-д 7-14 сая төгрөгийн үнэтэй байв. Мөн “Harrier” маркийн автомашин “Да хүрээ”-д 35-86 сая, “Үнэгүй.мн”-д 33-90 сая төгрөгөөр худалдаалагдаж байна.