Цагаан сарын баяр дөхсөн өдрүүдэд иргэд зах, худалдааны төвийг өргөнөөр зорьж, баярын бэлтгэлээ базааж эхэлжээ. Бид энэ жил домбо, цар, тавгийн идээ ямар үнэлгээтэй байгаа талаар сурвалжилга бэлтгэлээ.

 Бид өдрийн 13:00 цагийн үед “Дүнжингарав” худалдааны төвд очиход цагаан сарын баярын бэлтгэлээ хангахаар зэхэж буй иргэдийн хөл хөдөлгөөн их байлаа. “Дүнжингарав” худалдааны төвийн урд хэсэгт дээл, малгай, толгойн гоёл, хромон гутал өнгө, загварын өргөн сонголттой байна. Охид, бүсгүйчүүд толгойн гоёл, дээл хувцас дээр дарааллаж өмсөж үзэж, толины өмнө эргэлдэж харагдана. Харин эрэгтэйчүүд голцуу хромон гутал, даалин, хөөрөг сонирхож байлаа. 

             Тэднийг өнгөрч, “Цагаан сар үзэсгэлэн худалдаа 2024”  дээр ирлээ. Үзэсгэлэн худалдаанд тавгийн идээ, шүүсний цар, домбо, цагаан идээ, ул, гүрмэл, айргийн хул, даллагын уут, луу жилийн цаг тооны бичиг зэрэг дэлгэгджээ.

  Тавгийн идээний цар, домбо хэмжээ, загвар, хийцийн хувьд хэдэн төрөлтэй, үнийн хувьд ямар байгаа талаар худалдагчдаас тодруулахад,

        “Цар модоор хийсэн алхан хээтэй жижиг нь  50 мянга, том 100 мянга үнэтэй. Харин түмэн наст хээтэй нь 80 мянган төгрөг, хээгүй нь 55 мянга байна. Мөн 3D сийлбэр, 12 жил, найман тахилтай, эрдэнийн чулуун шигтгээтэй гараа сийлсэн цар нь 180-200 мянган төгрөгийн үнэтэй байгаа. Харин домбо шаазан нь 40-50 мянга, хээгүй нь 130-50 мянга, хээтэй нь 365 мянга” гэлээ.

         Худалдагчаас тодруулах зуур иргэд “Энэ цар, тэр домбо хэд үү. Ямар үнэтэй юм бэ, энэ хээ нь юу бэлгэдэх вэ. Таван үе, гурван үеэр засахад аль нь болох уу” гэх нь тасрахгүй байлаа. Эргүүлж, тойруулж үзээд л үнийг нь асуугаад, “Заза цалин буухаар л ирье дээ, үнэ сонирхож яваа юм аа” гэх хүмүүс ч харагдлаа.

ТАВГИЙН ИДЭЭ ЗАСАХАД 300-600 ТӨГРӨГ БОЛЖ БАЙНА

       Мөн иргэд тавгийн идээ засах  цар, ул, ааруул худалдаж авахад нийтдээ 400-600 орчим болж байгаа талаар ярьж байлаа.

Иргэн Х.Сувд: Манай ахмад настай айл болохоор зургаан үеэр тавгийн идээгээ засдаг. Идээний цар маань хуучирсан учир энэ жил шинээр цар авлаа. Бас гүрмэлээр засбал дараа нь хүүхдүүд идэхэд амар байдаг тул гүрмэлээр тавгийн идээгээ засах гэж байгаа. Улаар зургаан үе засаж, дээр нь ааруул тавихад 420 мянган төгрөг болж байна. Харин гүрмэлээр засахад арай хямд буюу 300 орчим мянган төгрөгийн үнэтэй зарж байна.

         Иргэн Г.Ариунаа: Өнөөдөр манай нөхөр бид хоёр хоёулаа амарч таарсан болохоор цагаан сарын бэлтгэлээ хийж явна. Ер баярын өмнө яарч, сандарч байхаар эртхэн бэлдвэл амар байдаг даа. Энэ жил бараа үнэ бага зэрэг нэмэгдсэн байх шиг байна. Бид хоёр гурван үеэр засах тавгийн идээний ул, ааруул нийтдээ 450 мянган төгрөгөөр авлаа. Цагаан сардаа нэг сая төгрөг орчим төгрөг төсөвлөж гарч ирсэн ч арай л хүрэхгүй юм шиг байна. Өөрсдөдөө болон хүүхдүүддээ шинэ дээл авмаар л байх юм. Даанч олсон хэдэн төгрөг маань хүрэхгүй. Тэгсэн ч цалингийн зээл аваад ч хамаагүй энэ сайхан үе уламжлагдаж ирсэн баяраа өргөн дэлгэр, нүнжигтэй тэмдэглэнэ дээ. Монгол хүн цагаан сараар элбэг хангалуун байвал тэр жилдээ эрүүл саруул, хийморьтой явдаг байх гэж эгч нь боддог юм. Аав, ээж минь тэгж сургаж ирсэн дээ гэлээ.

            Харин булангийн цагаан идээний тасагт хэдэн хүн ааруулын үнэ асууж, амс үзэх нь ажиглагдав. Худалдаагчаас үнийг нь тодруулахад, “Сүүн ааруул 45-50 мянга, мэхээр болон энгийн хольсон тос нэг килограмм нь 20 мянга, шар тос 40 мянган төгрөгөөр борлуулагдаж байна. Амсаад үзээрэй, Архангайгаас ирсэн, ямар ч хольцгүй ааруул байгаа шүү” гэв.

        Цагаан идээний үнэ тодруулж байх зуур гоёл чимэглэл, бэлэг дурсгалын худалдагч Н.Сувд “Эгчийн дүү толгойн гоёл зүүж үзэх үү ,чиний насныхан энийг л их авдаг юм даа. Эгч нь жаахан хямдруулаад өгье. Өнгөрсөн жил иргэд цагаан сараар хүний гар цайлгах  монгол загвартай зүйл их асууж байсан болохоор хэд хэдэн зүйл авчирсан. Мөн охид, бүсгүйчүүдийн монгол загвартай толгойн гоёл, ээмэг зэргийг өөрөө урлаж ирлээ. Үнийн хувьд үсний уут, даллагын арьсан уут 20 мянга, гоёлын эрдэнийн чулуутай даруулга 10-15 мянга, дөрвөн бэрх савтайгаа 25 мянга төгрөгийн үнэтэй байгаа” гэлээ.

          Бид “Цагаан сар үзэсгэлэн худалдаа 2024”  худалдаанаас гарч, иргэдийн өргөнөөр үйлчлүүлдэг зарим дэлгүүрүүдэд цар, домбо ямар үнэтэй байгаа талаар сонирхлоо.

“МӨНГӨН ЗАВЬЯА”-Д ДОМБО 299 МЯНГААС 1.2 САЯ ТӨГРӨГ, ИДЭЭНИЙ ГУУЛИН ЦАР 640 МЯНГАН ТӨГРӨГИЙН ҮНЭТЭЙ БАЙНА

            Харин “Мөнгөн завъяа”-д ган домбо 299 мянга, зэсэн өнгөтэй ган домбо 365 мянга, нүүдэл домбо 579 мянга, хаан хатан бугуйвч хээтэй домбо 679 мянга төгрөг байгаа бол хамгийн үнэтэй нь найман тахил хээтэй домбо 1.2 сая төгрөгөөр борлуулагдаж байна. Харин идээний гуулин цар 640 мянга, шүүсний дөрвөн хүчтэнтэй цар 607 мянга, 12 жилтэй нь 648 мянган төгрөгийн үнэтэй байна.

“EMART” сүлжээ дэлгүүрт идээ, шүүсний цар хосоороо 160-260 мянган төгрөгөөр борлуулагдаж байна

          Мөн “Emart” сүлжээ дэлгүүрт идээ, шүүсний цар хосоороо найман тахил, 12 жил, эрдэнийн чулуун шигтгээтэй нь 260 мянга, ухсан сийлбэр, эрдэнийн чулуутай нь 160 мянган төгрөгөөр зарагдаж байна. Тэгвэл хувиараа бизнес эрхлэгчид сийлбэртэй цар 150-300 мянга, энгийн цар 80-100 мянган төгрөгөөр хийж байгаа аж.

            Нэг айл идээ, шүүсний цар болон домбо худалдаж авахад дунджаар 500 мянга, харин тавгийн идээний ул, ааруул авахад 300-400 мянган төгрөгөөр зарцуулахаар байна. Тэгэхээр зөвхөн тавгийн идээ, ширээгээ нэг сая орчим төгрөгөөр засах юм. Хэдий цагаан сар тэмдэглэхэд өртөг их гарч байгаа ч уламжлал болсон баяраа элбэг хийнэ гэх иргэд их байлаа.