Идэр есийн хүйтнийг үл ажран иргэд автомашин худалдаж авахаар худалдааны захуудаар өдөржин хэсэж байна. Иргэдийн ярьж буйгаар “Сар шинээс өмнө гайгүй үнэтэй автомашин худалдаж аваад хөдөө орон нутагт байгаа төрөл, садангаараа орох, очиж золгох санаатай” гэнэ. Мөн орон нутгаас ч иргэд автомашин худалдаж авахаар “Да хүрээ” захад иржээ. Тиймээс эргэлт.мн мэдээллийн сайт автомашины үнэ ямар байгаа талаар дараах сурвалжилгыг бэлтгэлээ.

           Хот, хөдөөгийн олон хүн цугларсан “Да хүрээ” захад ченжүүд “Даам гарч” автомашин худалдан авах гэж буй иргэдэд аманд орсон үнээ хэлж байна. Гаальтай, монгол явж байснаасаа хамаараад автомашины үнэ харилцан адилгүй аж. Тухайлбал, Монголчуудын хэдийнэ танил болсон, хамгийн ихээр өдөр тутамдаа унаж, хэрэглэдэг приус 30 маркийн автомашин гаальтай нь 23 саяас эхлэх бол монголд явж байсан нь 15 сая төгрөгийн ханштай байна. Харин приус 20 маркийн суудлын автомашин хуучин нь хамгийн хямддаа 12 сая, гаальтай буюу орж ирсэн нь 20 сая төгрөгөөс дээш ханштай байна. Монголчуудын хэрэглээнд хамгийн сайн нийцсэн приус маркийн автомашин үнэ нь тэнгэрт хадаж, худалдаж авах хүн ховорджээ. Биднийг машины судлан автал 60 гаруй насны эмэгтэй хүүгээ дагуулан машин авч өгөхөөр яваа бололтой. Хөөрхий минь “Ээжийнхээ тэтгэврийг зээлж аваад автомашины урьдчилгаанд хүрэх янз байна уу. Уг нь хоёулаа нэг приустай болчихвол цагаан сараар хөдөө явбал зүгээр байна” хэмээн ярих юм.

Монголчуудын хэдийнэ танил болсон, хамгийн ихээр өдөр тутамдаа унаж, хэрэглэдэг приус 30 маркийн автомашин гаальтай нь 23 саяас эхлэх бол монголд явж байсан нь 15 сая төгрөгийн ханштай байна

          Иргэдийн хамгийн их худалдан авалт хийдэг “Prius 20”, “Prius 30”,  “Prius 41”, “Prius 50”, “S”, “Aqua”, “Probox” “Harrier” загварын машины үнэ асуухад “Prius 20” 20-24 сая, “Prius 30” 28 сая, “S” 24 сая, “Prius 50” 36 сая, “Prius 41” 32.5 сая төгрөгийн үнэтэй. Харин “Aqua” загварын автомашин 18-20 сая, “Probox” 15-23 сая, “Harrier” загварын автомашин 36-95 сая төгрөгийн үнэтэйгээр борлуулагдаж байна. Үнийн хувьд нэмэгдээгүй бараг л хэвээрээ байгаа” гэлээ. Өнгөрсөн хавар тус захад ирж машины үнэ сонирхсон болохоор  “Машины үнэ багагүй нэмэгджээ. Өнгөрсөн хавар ирэхэд “Prius 20" 20-23 сая, "Aqua" 17-19,“Probox” 12-21 сая, “Harrier” 36-93 сая төгрөгийн үнэтэй байсан” гэлээ. Тэрбээр үргэлжлүүлэн “Prius”, “Harrier” загварын автомашины үнэ нэг саяаас таван сая төгрөгөөр л нэмэгдсэн байгаа. Ойрд худалдан авалт бага байна. Аравдугаар сарын дундуур борлуулалт жаахан нэмэгдсэн. Наймаачдын хувьд дээрдэж байгаа зүйл алга. Хүмүүс машин үнэтэй байгааг гайхаад л өнгөрөх юм. Валютын үнэ ханш өсөж, шатахууны үнэ нэмэгдээд байхад автомашины үнэ буурах аргагүй. Сүүлийн хоёр жил гэхдээ автомашины үнэ ийм л байгаа шүү дээ” гэв. Автомашины үнэ тэнгэрт хадсан байгаагаас үүдэн борлуулалт муу байгаа гэнэ. Автомашины үнийн хөөргөдөл амьдралд нийцэхгүй болжээ. Хамгийн багадаа үйлдвэрлэгдээд 5-10 жил болж байгаа машинууд монголын зах зээлд асар үнэтэй зарагдаж байна. Үйлдвэрлэгдсэн он нь таван жилээс доош болоод ирэхээр үнэ нь хэд дахин нэмэгддэг байна. Хөл дүүжлэх унаатай болох гэсэн иргэдэд автомашин авна гэдэг мөрөөдөл болжээ. Автомашины үнэ өдрөөс өдөрт нэмэгдсээр...

“Toyota Pruis 20” 15-23 сая төгрөг

БЭЛЭН МӨНГӨӨР АВТОМАШИН ХУДАЛДАЖ АВАХ ХҮН АЛГА

“Да хүрээ” захад автомашин худалдаж авахаар очсон иргэдийн ихэнх нь үнийг нь сонсоод худалдан авалт хийхгүй байгаа аж. Зарим иргэд бэлэн мөнгө нь автомашин худалдан авч хүрэхгүйгээс болоод өндөр хүүтэй ББС-уудад ханддаг байна. Ченжүүд ч автомашинуудаа хурдан борлуулахын тулд иргэдэд ББС санал болгодог аж. Иргэд 20-40 хувийн урдчилгаа өгч автомашин ББСБ-аар авдаг байна. Мөн зарим иргэд банк болон гар утасны АПП-уудад зээлтэй учраас өр орлогын харицаа тэнцэхгүй, үүнээс болоод автомашин худалдаж авч чаддагүй гэнэ. Бид “Да хүрээ” захын ченжээс тодруулахад “Автомашины үнэ баг багаар өсөж байгаа. Ер нь бол өсөх шинжтэй байна. Гэтэл худалдан авалт хийхээр ирсэн иргэд хямд машин хайж, энэ хавиар өдөржин явдаг. Удахгүй Цагаан сарын баяр болох гэж байна шүү дээ. Тиймээс автомашины үнэ хямдрана гэж байхгүй. Ер нь бэлэн мөнгөөр автомашин худалдаж авах хүн алга. Дандаа л ББСБ-аар авч байна” гэсэн юм. Мөн бид орон нутгаас автомашин худалдан авахаар ирсэн иргэнээс автомашины үнэ ханш ямар байгааг тодруулсан юм. Тэрбээр “Би хөдөө уначих, цасанд суугаад байхааргүй өндөрхөн суудлын тэрэг сонирхож явна. Үнийн хувьд үнэхээр чанга сонсогдож байна. Тиймээс ямар машин авдаг юм билээ. Миний авна гэж бодож байсан автомашины үнэ санаснаас өндөр байгаа учраас авч дийлэхгүй байна. Гайгүй машин авъя гэхээр багадаа 20 сая төгрөг шаардлагатай болоод байдаг” гэв.

Иргэд 20-40 хувийн урдчилгаа өгч автомашин ББСБ-аар авдаг байна. Мөн зарим иргэд банк болон гар утасны АПП-уудад зээлтэй учраас өр орлогын харицаа тэнцэхгүй, үүнээс болоод автомашин худалдаж авч чаддагүй гэнэ.

            Автомашин худалдаж авах гэсэн иргэд хороо дүүргийнхээ бичгийг барьчихсан, зарим нь таньдаг ББСБ байна уу” хэмээн нэгнээсээ асуух аж. Идэр есийн хүйтэн тачигнасан энэ өдрүүдэд автомашин худалдаж авах гэсэн иргэдийн хөлд “Да хүрээ” зах дарагдсан байгаа хэдий ч машин худалдаж авах иргэд цөөрчээ. Иргэдийн худалдан чадамж өдрөөс өдөрт муудаж байгааг эндээс харж болохоор байна. Цагаан сараар шинэ машинтай хөдөө явж, ах дүүстэйгээ золгох гэсэн иргэдэд автомашин авна гэдэг мөрөөдөл болжээ.