ЗАВХАН АЙМГИЙН БАЯНТЭС СУМЫН 220 ХҮҮХДИЙН СУРГУУЛЬ ЦАХИЛГААНЫ УТАСНААС  ҮҮДЭЛТЭЙГЭЭР ШАТАЖ, 400 ГАРУЙ САЯ ТӨГРӨГИЙН ХОХИРОЛ УЧИРЧЭЭ

    Завхан аймгийн Баянтэс сумын Ерөнхий боловсролын сургууль өнгөрсөн арванхоёрдугаар сарын 12-13-нд шилжих шөнө шатсан талаар бид өмнө нь мэдээлж байсан. Дээрх дуудлагын дагуу Тэс сум дахь гал унтраах 57 дугаар ангийн бүрэлдэхүүн, сумын алба хаагчид, иргэд нийт 190 орчим хүн ажиллаж, галын тархалтыг зогсоосон байдаг. Тухайн сумын сургууль юунаас болж шатсан, урьдчилсан байдлаар хэчнээн төгрөгийн хохирол учирсан талаар холбогдох албаны хүмүүсээс тодрууллаа.

БАЯНТЭС СУМЫН СУРГУУЛИЙН ЗАХИРАЛ н.ДАШХҮҮ: СУРГУУЛИЙН АРХИВ, БИЧИГ ХЭРЭГ ШАТААГҮЙ

     Сургуулийн архив, сурагчдын ном, дэвтэр шатсан эсэх талаар тус сургуулийн захирал н.Дашхүүгээс тодруулахад “Холбогдох албаныхан шалгалтын ажиллагааг үргэлжлүүлж байгаа. Одоогийн байдлаар галын дүгнэлт гараагүй учир дэлгэрэнгүй мэдээлэл өгөх боломжгүй байна. Гал юунаас болж гарсныг би хэлж мэдэхгүй. Манай сум гурван хичээлийн байртай учир шатсан байранд архив, бичиг хэрэг байгаагүй” гэв. Мөн тус сургуулийн сургалтын менежерээс түймрийн талаар тодруулахад “Галын дүгнэлт гараагүй учир хэчнээн төгрөгийн хохирол учирсан болон гал юунаас болж гарсан талаар мэдээлэл өгөх боломжгүй байна. Багш нарын журнал цахим болсон учир чухал бичиг баримт шатаагүй. Харин хичээлийн хэрэглэгдэхүүн, тоног төхөрөөмж шатсан” гэв.

БАЯНТЭС СУМЫН ЗАСАГ ДАРГА Х.ЛҮНДЭЭЖАНЦАН: СУРГУУЛЬГҮЙ БОЛСОН 220 ХҮҮХДИЙГ ДОТУУР БАЙРНЫ НЭГ ДАВХАРТ ХИЧЭЭЛЛҮҮЛНЭ

     Харин тус сумын Засаг дарга Х.Лүндээжанцангаас хүүхдүүдийг цаашид хаана, хэрхэн хичээллүүлэх талаар тодрууллаа. Тэрбээр “Манай сумынхан дотуур байр байсан барилгыг 2014 онд засварлаж, 220 хүүхдийн хичээлийн байр болгосон. Тус барилгад дунд, ахлах ангийн найман бүлэг хичээллэж байсан. Мөн Дуу хөгжмийн тэнхим, технологийн хичээлийн тэнхим байсан. Тэнд байсан тоног төхөөрөмжүүд хамгийн үнэтэй зүйлс байсан. Сургуулийн архив, бичиг хэрэг, номын сан зэрэг нь өөр сургуульд байсан учир галд өртөөгүй. 220 хүүхдийн сургууль шатсаны улмаас урьдчилсан байдлаар 400 гаруй сая төгрөгийн хохирол учирсан байна лээ. Гал гарах үеэр Шадар сайдаар ахлуулсан Ажлын хэсгийнхэн ирж ажилласан. Найман ангийн ширээ, сандал, техник, хэрэгсэл бүгд шатсан учир холбогдох газруудад хүсэлт өгч, шинэ ширээ, сандалтай болж байгаа. Мөн хичээл орохоор 220 хүүхдийг 100 хүүхдийн дотуур байрны нэг давхарт болон бусад ангиудтай ээлжилж хичээллүүлэхээр болсон. Мөн манай суманд шинэ сургууль барихаар 6.1 тэрбум төгрөг өнгөрсөн оны төсөвт батлагдсан. Түүнээс 1.2 тэрбум төгрөгийнх нь ажлыг хийсэн байгаа. Тодруулбал, барилгын гурван давхрыг нь барьчихсан 2024 онд багтааж ашиглалтад оруулахаар төлөвлөж байна. Манай сумын хувьд нэн даруй сургуультай болох нь чухал байна” гэв.

ГАЛ УНТРААХ 57 ДУГААР АНГИЙН АХМАД Ц.АЛТАНСҮХ: БИДНИЙГ ОЧИХОД СУРГУУЛИЙН 70 ХУВЬ ШАТЧИХСАН БАЙСАН УЧИР ГАЛ ДААМЖИРАХГҮЙ БАЙХ АРГА ХЭМЖЭЭГ АВСАН

    Өнгөрсөн арванхоёрдугаар сарын 12-13-нд шилжих шөнө Баянтэс суманд гарсан галыг унтраахаар ажилласан Завхан аймгийн гал унтраах 57 дугар ангийн ахмад Ц.Алтансүхээс зарим зүйлийг тодрууллаа. Тэрбээр “Дуудлагын дагуу 10 хүний бүрэлдэхүүнтэй гал унтраахаар Баянтэс сум руу явсан. Цас ихтэй байсан учир бид замдаа цаг алдсан. Биднийг очиход сургуулийн 70 хувь нь шатсан байсан. Тиймээс бидний хүч хүрэхгүй учир гал тархахгүй байх арга хэмжээг яаралтай авсан. Гал даамжирч, сургуулийн гал тогооны дээвэр, хоёр дэлгүүрийн хана шатаж байсныг нь унтраасан. Хэрэв тухайн хоёр дэлгүүр шатсан бол гудамж тэр чигтээ шатах магадлалтай байсан. Гал гарсан шалтгааныг бид урьдчилсан байдлаар цахилгааны утаснаас болсон хэмээн үзэж байгаа. Гэхдээ мэргэжлийн байгууллагын дүгнэлт гараагүй байна” гэв.