“Хоёр хоногийн дараа гэхэд бензиний нийлүүлэлт хэвийн болж, ШТС-д иргэд автомашинтайгаа дугаарлаж зогсох шаардлагагүй болно” хэмээн салбарын сайд нь хэлсэн. Гэтэл үүнээс хойш бараг 14 хонолоо. Хөөрхий иргэд нь бензин авах гэж хоёроос гурван цаг оочирлож, 50 мянган төгрөгт бензин авдаг хэвээрээ л байна. Шар нь ассан машинаа нармайлдаж, арай хийж, бензин аваад 20-30 километр газар яваад л дахин шар асдаг байна. дүн өвлийн хүйтэнд автомашины шатахуун зарцуулалт хоёроос гурван дахин нэмэгдсэнийг жолоочид хэлж байна. Тиймээс бид шатахуун түгээх станцуудаар явж, дараах сурвалжилгыг бэлтгэлээ.

          Шатахуун түгээх станцуудын ойролцоо саарал манарч, уртаас урт цуваа бий болжээ. Бараг хамгийн багадаа автомашинууд нэг километр газар дугаарлан зогсох аж. Зарим жолооч автомашинаа унтраачихсан байх. Зарим нь цонхоо онгойлгоод янжуурын утаа суунаглуулан сууна. Зарим нь чангаас чанга дуу тавьчихсан байв. Гэвч эдгээр жолоочдын хүсэл бол хурдхан бензин авах. Тэвчээр нь алдгаснаас үүдэн өөр өөрийгөө элдвээр аргацаан байгаа хүмүүс. Ойрын өдрүүдэд нийслэл хот хүйтэн, цас, салхитай агаар цэвэр шахуу байгаа ч иргэдийн бухимдлыг бензин шатахууны хомсдол улам нэмэгдүүлж байна. Шатахуун түгээгүүрийн уулзваруудаас эхлээд багадаа л нэг км үргэлжилсэн урт цуваа үүссэн өдрүүд үргэлжилж байна. Хүйтэн тачигнаж дүн өвлийн жавар хангинахын хэрээр ажил бизнестээ автомашинаар амжуулах хэрэгцээ улам нэмэгдсэн нь ойлгомжтой. Гэхдээ УУХҮЯ-ны сайд Ж.Ганбаатарын “ШТС-уудаас их хэмжээгээр нь авч, цаашаа дамлаж зарах процесс байна. Улаанбаатар хотоос ямар нэгэн захиалга, бичиггүйгээр дизель түлш гаргахыг хориглосон” билээ. Гэвч гадуур бензин шаглаж зарах цөөнгүй тохиолдол байна. Тухайлбал бензин шаглаж байгаа иргэд 20 литрийг нь 100 мянган төгрөгөөр зарж, иргэдийн халаасыг хоосолж байна гэхэд буруудахгүй. Салбарын сайдын хэлсэн үг үнэндээ газар дээр биелсэн юм огт алга. Тиймээс салбарын сайд та “Тэнгэрийн юм ярьж худал мэдээл өгөхийн оронд хөрсөн дээрээ буусан бодит тайлбар хийсэн нь илүү үнэнд нийцэх биз. Хөөрхий иргэд таны хэлсэн үгэнд итгээд бараг 14 хонолоо. Гэтэл өөрчлөгдсөн зүйл огт алга. Бодит үнэн гэвэл иргэд өглөө эрт босоод ажилдаа явах биш ШТС-д дугаарлаж, зогсоод хамаг цаг хугацаа, боломжоо алдаж байна.

 Бодит үнэн гэвэл иргэд өглөө эрт босоод ажилдаа явах биш ШТС-д дугаарлаж, зогсоод хамаг цаг хугацаа, боломжоо алдаж байна.

Өнөө өглөө өглөөний 06.00 цагт очиж гурван цаг дугаарлаад арай ядан 50 мянган төгрөгт шатахуун авсан. Энд хоёр түгээгч нэг зэрэг ажиллаж байгаа учраас өчигдрийнхөөс арай хурдан урагшилж байна.

Нийслэлийн Сонгино хайрхан дүүрэгт байрлах шатахуун түгээх станцуудад дугаарлан зогсож буй автомашинууд замын нэгдүгээр эгнээг эзэлжээ. Бид “Шунхлай” “Петровс” “Сод монгол” “МТ” компанийн ШТС-аар явсан юм. Хамгийн багадаа 50-60 орчим тооны автомашин дугаарласан байлаа. Хоёр түгээгч зогсоо зайгүй хоёр тийш холхиж, шатахуунаа хийж байв. Тэднээс шатахууныг ямар зохицуулалттайгаар худалдаалж байгаа талаар тодруулахад “АИ92, А80, А95 бензин худалдаалж байгаа. Иргэдэд ч, байгууллагуудад ч 50 мянган төгрөгийг хязгаарлалтайгаар өгч байгаа ба картаар болон бэлэн мөнгөөр ч тооцоо хийж байна. Нийлүүлэлт хэзээ хэвийн болохыг бид хэлж мэдэхгүй. Дөрвөн тонн ирснийг нь шахаж дуусаад л дараагийн орлого ирэхийг хүлээнэ. Иргэдийн оочир тасрана гэж бараг байхгүй. Харин нийлүүлэлт л тасраад байна” гэх тайлбарыг түгээгч нар хэлж байлаа. Тэдний хувьд өдөр тодорхой хэмжээний бензин зараад ШТС-аа хаадаг гэнэ. Тиймээс бид мөн бензин авахаар дугаарлан зогсоо автомашины жолооч нараас дараах тодруулгыг авсан юм.

Манай төрийн жолоог залж байгаа эрхэм түшээдүүд ажиллаж чадахгүй байна уу даа гэж харж байна

           Иргэн М.Баатарсүрэн “Өчигдөр 16-р хорооллын ШТС-д очиж, дөрвөн цаг шахуу дугаарласан ч бензин нь дууссан гэсэн учраас авч чадаагүй. Балаг бензин авахын тулд бүтэн өдөр алдаж байна. Шатахуун түгээх газруудыг хэрэн хэсүүчилж байна. Өнөө өглөө өглөөний 06.00 цагт очиж гурван цаг дугаарлаад арай ядан 50 мянган төгрөгт шатахуун авсан. Энд хоёр түгээгч нэг зэрэг ажиллаж байгаа учраас өчигдрийнхөөс арай хурдан урагшилж байна. Ирээд цаг гаруй хугацаанд л дугаарлалаа. Удсан ч гэсэн шатахуун нь нийлүүлэлтээр ирж л байвал хүлээхээс өөр яах вэ. Нэгэнд энд ирснийх дахиад 50 мянгад авчихмаар байна. дугаарлаж зогссоор байгаад хамаг бензинээ барлаа” хэмээв. Мөн тус шатуун түгээх газар дугаарлан зогсоо иргэн Б.Сүрэн “Нэг цаг гаруй л дугаарлалаа. Өдөр нь ажилтай байдаг учраас орой цагаар л бензинээ хайж таарлаа. 50 мянган төгрөгийн хязгаарлалт тогтоосон гэж сонслоо. Өгч л байвал 50 мянга байсан ч авна шүү дээ. Хөдөө, орон нутаг руу зорчиж буй хүмүүс л хэцүү болов уу. Зарим ШТС-ийн хэрэглэгчийн тусгай карттай байхыг шаардаад байдаг. Бүхэл бүтэн улс байна даа. Нөөцөө хангалттай хэмжээнд нь хангаагүй байх нь инээдтэй юм. Энэ улс орон чинь шатахуунгүй гээд техник хүчээ хөдөлгөж чадахгүйд хүрэх юм уу. Манай төрийн жолоог залж байгаа эрхэм түшээдүүд ажиллаж чадахгүй байна уу даа гэж харж байна” гэлээ. Үүнээс гадна, жолооч нар “шатахууны нөөц бодит байдал дээр үнэхээр хомстсон уу аль эсвэл импортлогч компаниуд бага хуваарилж энэ нөхцөл байдлыг үүсгэв үү гэдэгт хардлага үүсч байгаа талаар” хэлж байсан юм.

Шатахууны төлөө нийслэлчүүд өдөр бүр дугаарлаж буй нийтлэг дүр зурагтай боллоо. Нөгөөтээгүүр, жолооч нар 50 мянгад бензин авахын тулд багадаа хоёроос гурван цаг дугаарлаж, зарим нь шатахуун түгээх станцуудын үүдэнд хонож байна.