“Эко стандарт петролум” ХХК-ийн жолооч хаягдал масло, тосыг Баянзүрх дүүргийн арваннэгдүгээр хорооны нутаг дэвсгэрт байрлах шугамын худаг руу асгаснаас болж, иргэдийн ая тухтай байдал алдагдаж, хууль хяналтын байгууллага хэд хэдэн газарт хяналт шалгалтын үйл ажиллагаа явууллаа. Тухайлбал, Нийслэлд энэ сарын 12-ны өдөр учир нь үл мэдэгдэх үнэр гарч оршин суугчдын ая тухыг алдагдуулсан билээ. Үүний улмаас иргэдийн толгой өвдөх, дотор муухайрах шинж тэмдэг ихээр илэрчээ. Уг үнэр юу болохыг тогтоохоор хууль хяналтын байгууллагууд шуурхай арга хэмжээ авч ажилласан. Уг үнэрийг яг юунаас гарч байгааг тогтоохоор хэд хэдэн байгууллагуудад хяналт шалгалтын ажиллагаа явуулсан байна. Тухайлбал, Таван толгой түлш ХХК, Дүнжингарав худалдааны төв болон ойр орчмын бохирын шугамуудыг шалгасан. Мөн Очир дагинас ХХК-д шалгалтын үйл ажиллагаа хийсэн.

“Очир дагинас” ХХК: Манай компани ямар нэг химийн бодис шугамын хоолой руу асгаагүй

 Үүнтэй холбоотойгоор цахим орчинд “Цагдаа болон тагнуулын байгууллага “Очир дагинас” ХХК-ийн хашаанд шалгалтын ажиллагааг үргэлжлүүлэн хийж байна. Шалгалтын үйл ажиллагаа зургаан цаг явагдаж байгаа бөгөөд цагдаагийн байгууллагын автомашинууд нэмэгдэж ирлээ. “Очир дагинас” ХХК устгалд оруулах ёстой химийн бодисоо магистрал шугамын хоолой руу асгасан байж болзошгүй үндэслэлээр мөрдөн шалгах ажиллагааг эхлүүлжээ” гэх мэдээлэл цацагдаад байсан билээ. Бид энэ талаар Очир дагинас ХХК-иас тодруулахад “Цагдаагийн байгууллага хяналт шалгалт хийсэн. Манайхаас ямар нэг буруу зүйл илрээгүй. Шалгалтын үйл ажиллагаа дөнгөж сая дуусаад цагдаа нар явлаа. Цахим орчинд тархаад байсан шиг зүйл огт болоогүй. Манай компани ямар нэг химийн бодис шугамын хоолой руу асгаагүй” гэсэн юм.

Монгол Улсын хүнсний салбарт үйл ажиллагаа явуулдаг тус компани химийн хортой бодис хэрэглэж, хүнсний аюулгүй байдал алдагдсан эсэх талаар бид ХХААХҮ-ийн сайд Х.Болорчулуунаас тодруулсан юм.

       Тэрбээр "Нийслэлд гарсан хийн үнэрийг төмрийн үйлдвэр шатсан учраас гарсан гэсэн мэдээлэлтэй байна. Очир дагинас ХХК-д үүссэн асуудлын талаар би мэдээлэл аваагүй байна. Энэ талаар маргааш албаны хяналтынхнаа ажиллуулъя" гэсэн юм.

-ЭКО СТАНДАРТ ПЕТРОЛУМ ХХК-ИЙН ҮЙЛ АЖИЛЛАГААГ 2022 ОНД ХУУЛЬ ХЯНАЛТЫН БАЙГУУЛЛАГА ЗОГСООЖ БАЙЖЭЭ-

           Налайх дүүргийн тавдугаар хорооны нутаг дэвсгэрт байрлах автомашины мотор, кропны хаягдал тос, масло дахин боловсруулж, түлш үйлдвэрлэх чиглэлээр үйл ажиллагаа явуулдаг “Эко стандарт петролум” ХХК-ийн жолооч 10 тонн орчим хаягдал масло соруулж, Баянзүрх дүүргийн арваннэгдүгээр хорооны нутаг дэвсгэрт байрлах шугамын худаг руу асгасан нь урьдчилсан байдлаар тогтоогдсон байна. Гэвч тус компани хаягдал маслоо бохир ус соруулах үйлчилгээ эрхэлдэг “Маргад эрдэнэ уул” ХХК-д дуудлага өгч, тус компанийн жолооч С.Лхагвабаяраар аюултай хог хаягдлаа хаяулсан байж болзошгүй аж. 

Манай компани сургууль, цэцэрлэгүүдийн бохир ус соруулах гэрээтэй ажилладаг

        Бид энэ талаар “Маргад эрдэнэ уул” ХХК-ийн жолоочоос зарим зүйлийг тодрууллаа. Тэрбээр “Манайх бохир ус соруулах чиглэлээр үйл ажиллагаа явуулаад 5-6 жил болж байна. Өчигдөр “Эко стандарт петролум” ХХК-ийнхан бохир ус соруулах дуудлага өгсөн. Тус дуудлагад манай компанийн жолооч С.Лхагвабаяр явсан. Тухайн үед 10 тонн хаягдал масло соруулуулсан байж магадгүй. Жолооч С.Лхагвабаяр болон манай компанийн удирдлагуудаас мэдүүлэг авахаар цагдаагийн газраас дуудсан” гэсэн. Манай жолооч дуудлагын дагуу ажиллаж байгаад тухайн компанийн ажилчдын хий гэсэн ажлыг нь хийснээр нэр нь холбогдчих шиг боллоо. Манай компани сургууль, цэцэрлэгүүдийн бохир ус соруулах гэрээтэй ажилладаг” гэсэн юм.

 "Аюултай хог хаягдал, химийн хорт, аюултай бодсыг хаях" гэмт хэргийн шинжтэй байж болзошгүй байна.

             Шалгалтаар “Эко стандарт петролум” ХХК нь ашиглах боломжгүй болсон хаягдал маслыг энэ сарын 11-ны 16:00 цагийн үед “Маргад эрдэнэ уул” ХХК-ийн компанийн жолооч С.Лхагвабаяр  “Хьюндэй голд” маркийн автомашинаар 10 тонн орчим хаягдал масло соруулан ачиж, Баянзүрх дүүргийн арваннэгдүгээр хорооны нутаг дэвсгэрт байрлах 1000 мм бохирын шугамын худаг руу асгасан болох нь тогтоогдсон байна.  Тиймээс тус хэргийг Баянзүрх дүүргийн цагдаагийн газраас үргэлжлүүлэн шалгаж байгаа аж. Энэхүү үйлдэл нь Эрүүгийн хуулийн 20.11 дүгээр зүйлд заасан "Аюултай хог хаягдал, химийн хорт, аюултай бодсыг хаях" гэмт хэргийн шинжтэй байж болзошгүй байна.

            2019 онд үйл ажиллагаа явуулах зөвшөөрөл авсан “Эко стандарт петролиум” нь цар тахлын улмаас үйл ажиллагаагаа нь хойшилж 2022 оны аравдугаар сард хаалгаа нээжээ. Анх зөвшөөрөл авахдаа “Түүхий нүүрс ашиглан ажилласан маслыг дизель түлш үйлдэрлэнэ” хэмээж үйлдвэрлэлээ эхлүүлэх туршилт хийсэн байна. Налайх дүүрэг агаарын бохирдлыг бууруулах бүс буюу түүхий нүүрс ашиглахыг хориглосон бүсэд хамаарагдаж байсан бөгөөд тус үйлдвэр түүхий нүүрсийн оронд мидлинг ашиглахаар болжээ. 2022 оны аравдугаар сарын 25-наас арваннэгдүгээр сарын 04-ний өдрүүдэд туршилт хийхээр зөвшөөрөл авсан байна. Гэсэн ч туршилтын үйлвэрлэл эхэлсний дараахан хурц эхүүн үнэр гарч мэргэжлийн байгууллага үйл ажиллагааг нь түр хугацаагаар зогсоосон байна.