Хичээлийн шинэ жил эхлэх гэж байгаатай холбоотойгоор Улаанбаатар хотыг зорьж ирэх оюутан залуусын хөл хөдөлгөөн нэмэгдэж байна. Шинэхэн оюутан болон хүүхдүүдтэйгээ хамт нүүж байгаа гэр бүлүүдийн дийлэх нь хямд үнэ, тухтай орчинтой түрээсийн байрны эрэлд гардаг. Түрээсийн байр, өрөө хайж байгаа иргэдэд түрээсийн байрны үнэ нэмэгдэх, барьцаа мөнгө болон 3-6 сарын түрээсийг нэг дор авдаг нь хүндрэл болдог билээ. Тэгвэл орон сууцны түрээс болон нийтийн байрны үнэ ханш ямар байгаа талаар сурвалжиллаа.

 Улаанбаатар хотод байршил, тавилгатай эсэхээсээ хамаарч түрээсийн байрны  үнэ ихэвчлэн 800 мянган төгрөгөөс эхэлж байна. Мөн түрээсийн байр төлбөрөө гурван сараас дээш хугацаагаар нь авахаас гадна барьцаа хөрөнгө гэж 300-500 мянган төгрөгийн төлбөр авдаг. Энэ нь түрээслэгчдийн хувьд хүндрэлтэй асуудал болох нь элбэг.

ХАЖУУ ӨРӨӨГ САРЫН 400-650 МЯНГАН ТӨГРӨГӨӨР ТҮРЭЭСЭЛНЭ

            Түрээсийн байрны үнэ өндөр байгаатай холбоотойгоор оюутан, ганцаар амьдардаг залуус айлын хажуу өрөө түрээсэлж байгаа аж. Хажуу өрөөний үнэ 300 мянган төгрөгөөс эхлэх бөгөөд хотын төвд байрлалтай тохиолдолд 400-600 мянган төгрөг гэнэ. Угаалгын өрөө, угаалгын машин гал тогоог хамтдаа хэрэглэх бөгөөд зарим тохиолдолд цахилгаан, интернэтийн төлбөрийн тодорхой хувийг нэмж төлдөг. Хажуу өрөө түрээсэлнэ гэсэн зарын дагуу холбогдож тодрууллаа. Тус хажуу өрөө нь Хан-Уул дүүргийн хоёрдугаар хороонд байрладаг гэнэ. Түрээслэгч “Манай байр шинээр ашиглалтад ороод удаагүй байгаа гурван өрөө байрны өрөө бүрийг түрээсэлдэг. Шууд гурван өрөө байр түрээслэх хүн олддоггүй учраас ингэж өрөө, өрөөгөөр нь хувааж түрээсэлдэг юм. Ихэвчлэн оюутан, цагийн ажил хийдэг залуус, залуу хосуудад түрээсэлдэг. Муу зуршилгүй, хүний байранд цэвэрхэн амьдардаг хүмүүсийг оруулдаг. Түрээслэгчид нь интернэт, цахилгааныхаа мөнгийг хувааж төлдөг. Манайх гурван сараар нь түрээсээ авдаг. Бүрэн тавилгатай түрээсэлдэг учраас тавилга эвдсэн тохиолдолд 100 хувь хохирлоо төлүүлнэ” гэв.

НИЙТИЙН БАЙРНЫ ТҮРЭЭС САРЫН 160-300 МЯНГАН ТӨГРӨГ

             Зах зээл дээрх хамгийн хямд үнийг ихэвчлэн нийтийн байр санал болгоно. Олон түрээслэгчид дундаа ашиглах ариун цэврийн өрөө, нэг өрөө бүхий нитийн байрны сарын түрээс 160-300 мянган төгрөгийн хооронд байдаг аж. Түрээсийг ихэвчлэн гурван сараар нь нэгтгэж авах бөгөөд гурван сараар нь төлбөрөө төлсөн тохиолдолд нэг сар үнэгүй амьдрах боломжийг олгох нь бий. Мөн зарим орон сууцны подвалын хэсгийг тохижуулж түрээсэлж байна. Подвалын өрөө тохижилт, талбайн хэмжээнээсээ хамаараад 100-250 мянган төгрөгийн сарын түрээстэй. Нэг хүн амьдрах зориулалттай жижиг өрөөтэй, айлууд дундаа нэг ариун цэврийн өрөөтэй бол түрээс нь 100 мянган төгрөг гэнэ.

НЭГ ӨРӨӨ БАЙРНЫ ТҮРЭЭС 800-3 САЯ ТӨГРӨГИЙН ҮНЭТЭЙ БАЙНА

             Хотын төвд байршилтай бүрэн тавилгатай нэг өрөө байрны түрээс сарын гурван сая төгрөг бөгөөд гурван сараар нь байрны түрээсийг авна. Харин Сонгинохайрхан, Баянзүрх дүүрэгт нэг өрөө байрны түрээс дунджаар нэг сая төгрөг. Харин цөөн тохиолдолд тавилгагүй нэг өрөө байрыг 800 мянгаас дээш төгрөгөөр түрээсэлнэ. Хоёр, болон гурван өрөө байрны түрээс 2-5 сая төгрөг гэнэ. Сарын түрээсийг хоёр сараар нь авах болон барьцаатайгаар түрээсэлж байлаа. Зарим тохиолдолд оюутнууд түрээсийн байрыг хамтарч түрээсэлнэ. Байрны мөнгө, урсгал хэрэглээ гээд шаардлагатай бүх түрээсийг хамтарч төлдөг.

Охидын дотуур байрын сарын төлбөр 200-310 мянган төгрөг

             Улаанбаатар хотод суралцахаар ирсэн охидод зориулсан дотуур байр олон бий. Ихэвчлэн хоёр давхар ор, хувцасны шүүгээтэй бөгөөд нэг өрөөнд 4-6 хүн амьдарна. Байршил, тохижилтоосоо хамаараад сарын төлбөр нь 200-310 мянган төгрөг гэнэ. Интернэт, цахилгаан төлбөр ихэвчлэн байрны үнэнд багтсан байдаг аж.