“Мод бут, сөөгийн суулгац, үр, үрслэгээний үзэсгэлэн худалдаа” гэх хулдаасан хэвлэл өлгөсөн ногоон, цэнхэр хүлэмжүүд Барилгачдын талбайг дүүргэжээ. Модны үрсэлгээ, мандлын цэцэг тариалдаг иргэд энд жил бүр үзэсгэлэн худалдаанд гардаг.

        Сарын хугацаанд гарсан үзэсгэлэн худалдаа дуусахад хэдхэн хоног үлджээ. Гялгар хүлэмж зай ихтэй ч бүгчим халуун.  Хүлэмжийн булан бүрд төрөл бүрийн модны үрсэлгээг бөөгнүүлэн тавьж, дээр нь ямар мод болохыг нь бичиж наажээ. Үзэсгэлэн худалдаанд ирсэн иргэд сонирхсон модныхоо ургах нөхцөл, тарихад юу хэрэгтэй талаар худалдагч, тариалагчдаас  сайтар асууна. Бага насны хоёр охиноо дагуулсан бүсгүй зусландаа мод тарих гэж байгаа гэнэ. Тэрбээр “Өнгөрсөн жил зуслантай болсон юм. Модлог ургамал багтай газар учраас хашаагаа цэцэрлэгжүүлж,мод, цэцэг тарихаар төлөвлөөд байгаа. Өнгөрсөн жил жижиг гацуур тариад ургуулж чадаагүй юм. Энэ жил дөрвөн метр урттай хөрс шилжүүлэн суулгахад үндэс нь гэмтэхгүй мод сонголоо. Охидынхоо сонгосон мандлын цэцэг авлаа” гэв. Иргэд дөрвөн улиралд ногооноороо байдаг учраас гацуур модыг сонгож, тарих нь элбэг байдаг ажээ. Үзэсгэлэн дээр гацуур мод 40-450 мянган төгрөгийн үнэтэй худалдаалагдах бөгөөд өндрөөсөө хамаараад үнэ нь ийн нэмэгдэж байгаа аж. Агч, нарс модны суулгац 25-75 мянган төгрөгийн үнэтэй байлаа.

                Хаяа нийлүүлэн байршсан хүлэмж бүр худалдан авагч, үйлчлүүлэгчидтэй байлаа. Хүлэмж бүрд зөвхөн модлог ургамлаас гадна, хүлэмжид тарих зориулалттай хүнсний ногооны үрсэлгээ,  тасалгааны цэцэг,  мод, ногоо тарихад хэрэглэх багаж, бордоо, үр, даршилсан ногоо, жимсний шүүс зэрэг байлаа. Барилагчдын талбайн урд хэсэгт бусдаасаа арай том  хүлэмж байх бөгөөд энд төрөл бүрийн нарийн ногооны үрсэлгээ худалдана. Хүлэмжийн хоёр талаар болон газраар тавьсан үрслэгээний дунд огурцы, салатны навч, амтат чинжүү, байцаа, тарвас, хулуу, лооль зэрэг байна. Хүлэмж болон тасалгаанд тарих зориулалттай бөгөөд салатны навчийг хашаанд тарих боломжтой, арчилгаа бага шаарддаг учир иргэд сонирхож худалдаж авах нь элбэг байгаа аж. Хүмүүсийн ихээр худалдаж авч байгаа салатны навчны үрсэлгээ 500 төгрөг бөгөөд худалдагчид 4-5 ширхгээр нь авч тарьж үзэхийг зөвлөж байлаа.

           Энэ жил гүйлс, буйлс, голт бор зэрэг цэцэглэдэг модыг тарих сонирхолтой худалдан авагчид олон байгаа гэнэ. Хотын тохижилтод өнгө, өнгийн цэцэгт мод тарьж байгаа нь энэ төрлийн модыг иргэдэд таниулж, гэр, хашаандаа тарих хүсэлтэй иргэд худалдан авалт олноор хийж байгаа аж. Тус үзэсгэлэнд  гурав дахь жилдээ гарч байгаа тариаланч бүсгүй н.Нараа “Манай үрсэлгээ, мод үржүүлгийн газар Дарь-эхийн  эцсийн буудал дээр байдаг. Энэ жил цэцэгт ургамал олноор авч байна. Мөн агч, хадны үрсэлгээ авч байгаа. Хад жимсний мод дараа жил багахан жимс өгнө. Ингээд жил бүр жимс ургах нь ихэсдэг. Ер нь жимсний модыг хоёроор нь тарих хэрэгтэй. Худалдан авагчдын ихээр сонирхож байгаа буйлс, гүйлс, голт бор энэ жилийн цэцгээ өгчихсөн учраас, дараа жил цэцэглэнэ. Зун тарьсан модод усалгаа их шаардлагатай” гэв. Нийтлэг худалдаалагддаг нарс, гацуур, агчаас гадна алимын мод 40-50 мянган төгрөг, монос 10000 төгрөг, хар, улаан интоор 1000-12000 төгрөг, бөөрөлзгөнө жимсний мод 1500-2500 төгрөгөөр худалдаалагдаж байлаа.

           Зуны улиралд аж ахуй нэгжүүд гадаа талбайгаа болон хашаандаа мандлын цэцэг  тарьдаг билээ. Барилгачдын талбай дээрх үзэсгэлэн худалдаанд түгээмэл мандлын цэцэг болох хилэн цэцэг 1500-2000 төгрөгийн үнэтэй байлаа. Мандалын цэцэг нь тарихад хялбар хэдий ч богино наст ургамал юм. Энэ жил ургасан цэцэг ирэх жил дахин дэлбээлдэггүй. Үзэсгэлэнд гарсан хүлэмжүүдээс тоотой хэд нь мандлын болон, тасалгааны цэцэг худалдаалж байлаа. Тасалгааны цэцэг болох гоо даль, сарнай, кактус зэрэг ургамал 20- 50 мянган төргийн үнэтэй байв.