Нийслэлийн цэцэрлэгийн нэгдүгээр шатны бүртгэл явагдаж дууссан талаар Боловсрол шинжлэх ухааны яамнаас мэдэгдлээ. Харин хоёрдугаар шатны бүртгэл есдүгээр сарын 10-нд явагдах аж. Үүнтэй холбоотой иргэдэд тулгарсан асуудал ар араасаа ундарч, санал гомдол тасрахгүй байгаа бололтой. Буруу хуваарилалт, системийн давтамжтай алдаанаас болж зарим иргэн хүүхдээ цэцэрлэгт хамруулах эсэх нь эргэлзээтэй болж эхэлсэн байна. Энэ талаар бид албаны эх сурвалжууд болон иргэдээс дараах сурвалжилгыг бэлтгэлээ. 

ТҮР ОРШИН СУУГЧДЫН ХҮҮХЭД ЦЭЦЭРЛЭГТ ХАМРАГДАЖ ЧАДСАНГҮЙ 

            Энэ жил цахим бүртгэлээр 2527 хүүхэд, уламжлалт элсэлтээр 1932 хүүхэд бүртгэлд хамрагдсан байна. Бүртгэлд хамрагдсан зарим хүүхдүүдийн дунд өрнөөд байгаа гол асуудлын нэг бол “Үндсэн” болон “Түр оршин суугч” гэсэн байдлаар иргэдийг хувааж байгаа аж. Тухайлбал, тухайн дүүрэгт “Түр оршин суугаа иргэд”-ийн хүүхдүүдийг, “Үндсэн” оршин суудаг иргэдийн хүүхдийн хуваарилалтын дараа сул суудал гарсан цэцэрлэгүүдэд нэмэлт элсэлт зохион байгуулах боломжтой гэсэн шийдвэрийг гаргажээ. Энэ нь хэрэв сул суудал гарахгүй бол таны хүүхэд цэцэрлэгт явахгүй гэх далд ойлголтыг иргэдэд төрүүлж, “Илт ялгаварлан гадуурхаж байна" гэж иргэдийн зүгээс үзжээ. Тэгвэл, Баянзүрх дүүргийн 26-р хороонд түр оршин суугч Ц.Энхчимэг хоёр хүүхдээ цэцэрлэгт хамруулахаар E-Мongolia  төрийн цахим системээр хүсэлт илгээсэн ч хүүхдүүдээ цэцэрлэгт хамрагдуулж чадаагүй байна. Тэрбээр “ Би хоёр болон дөрвөн насны хоёр хүүхэдтэй. Хүүхдүүдээ төрийн цахим системээр цэцэрлэгт бүртгүүлэх хүсэлт илгээсэн ч цэцэрлэгт хамрагдуулж чадсангүй.

Одоо амьдрахын тулд хоёр хүүхдээ түгжиж явъя гэсэн ч үнэхээр зүрх хүрэхгүй хэцүү байдалтай болчихлоо

     Холбогдох хүмүүст учраа хэлтэл “Хоёр, гурав дахь хүсэлтийг явуулж болно. Гэхдээ сул юм олдох нь тодорхойгүй. Олдвол яахав хамрагдуулаад өгье” гэх тодорхойгүй бөгөөд ойлгомжгүй хариултыг надад өглөө. Гэтэл албан ёсны цахим хуудсаараа “Хүсэлт илгээсэн бүх хүүхдээ цэцэрлэгт хуваарилаж дууслаа” гэх мэдээг оруулсан байна. Дан ганц би биш цөөнгүй хүн ийм асуудалтай тулгараад байна” гэв. Албаны эх сурвалжаас  “Хүсэлт илгээсний дараа ямар нэгэн хариу гар утсанд тань илгээгдэж очоогүй бол e-mongolia систем дэх төлөвийг дахин нягтлахыг анхааруулж байна" гэсэн юм. 

НЭГ АЙЛЫН ХОЁР ХҮҮХДИЙГ ӨӨР ӨӨР ЦЭЦЭРЛЭГТ ХУВААРИЛЖЭЭ

            Энэ жил нийслэлийн цэцэрлэгийн бүртгэл төрийн цахим систем e-mongolia-гаар явагдсан. Гэтэл цахимаар бүртгүүлсэн зарим иргэдийн хүүхдийг өөр өөр цэцэрлэгт хуваарилсан байсан нь тэднийг бухимдахад хүргэв. Боловсрол, шинжлэх ухааны яамнаас өгсөн мэдээллээр “Систем автомат хуваарилалт хийхдээ таван настай хүүхдээс эхэлж цэцэрлэгт хуваарилсан учраас нэг айлын хүүхдүүдийг ялгаж таниагүй болно. Тиймээс хүүхдээ хамруулах хүсэлтэй байгаа цэцэрлэгт хандан, өргөдөл гаргана уу. Цэцэрлэг хооронд шилжилт хийх боломжийг нэгж дээр шийдвэрлэнэ” гэв. Гэтэл иргэд энэ талаар цэцэрлэгийн бүртгэлийн мэдээлэл зөвлөгөө өгөх дүүрэг хариуцсан хүмүүс рүү удаа дараа хандах боловч “Бид сайн мэдэхгүй” гэх хариултыг өгөх бөгөөд зарим дүүрэг утсаа авахгүй байгаад иргэд гомдолтой байгаагаа илэрхийлж байна. Сүхбаатар дүүргийн иргэн Золбаяр Хувийн цэцэрлэг рүү хуваарилагдсан хүүхдийнхээ гэрээг байгуулахаар цэцэрлэг дээр очход “Бидэнд ямар ч мэдээлэл ирээгүй. Тэгээд ч нэмж хүүхэд авахгүй” гэжээ. Төр болон хувийн хэвшлүүд хоорондоо ойлголцож ч амжаагүй байгаа нь иргэдийг ихээр төөрөгдүүлж байна. Боловсрол, шинжлэх ухааны яамнаас нэг ангид 40-с хэтрэхгүй хүүхэд суралцахаар зохицуулалт хийжээ. Хувийн зарим цэцэрлэгүүд төлбөр нэхэж байна гэх асуудлаар албаны эх сурвалжууд “ Цэцэрлэг бүр харилцан адилгүй төлбөртэй. Төрөөс хүүхдийн хувьсах зардлыг хоёр дахин нэмэгдүүлж олгон, хоолны мөнгө нэмэлтээр өгөхөөр шийдвэрлэсэн. Энэ дэмжлэгийн дараа тухайн цэцэрлэгийн төлбөрт зөрүү гарвал эцэг, эх, асран хамгаалагчтай харилцан тохиролцож зөрүүг тооцож авахаар зохицуулалт хийсэн” гэлээ.

Харин иргэдийн зүгээс хувийн цэцэрлэгүүд төлбөрөө 50-100% нэмсэн гэх хардалт ч явж байв

Сүхбаатар дүүргийн 34-р хорооны иргэн Д.Нямсүрэн “ Манай дүүргийн Гоёхондоо цэцэрлэг “Есдүгээр сарын 20-ноос хойш тодорхой болно. Одоогийн байдлаар улстай ямар ч гэрээ хийгээгүй байна” гэх хариултыг өгсөн. Гэтэл Боловсролын яамнаас есдүгээр сарын 10-ны дотор эхний ээлжийн хуваарилагдсан хүүхдүүд баталгаажуулалт, гэрээгээ хийж байна гэж мэдээлсэн. Одоо яах ёстойгоо мэдэхгүй байна” гэв.  

БШУЯ: НИЙСЛЭЛИЙН ЦЭЦЭРЛЭГИЙН НЭГДҮГЭЭР ШАТНЫ БҮРТГЭЛД НИЙТ 113,474 ХҮҮХЭД ХАМРАГДАВ

         Төрийн нэгдсэн цахим системд ачаалал үүсэж буй шалтгаан нь иргэдийн хуурамч хаяг, шилжилт хөдөлгөөнөөс шалтгаалж байгаа аж. Ингэснээр зарим ачаалалтай дүүрэгт алдаа гарч, хүүхдүүд өөр өөр цэцэрлэгт хуваарилагдаж байгаа гэнэ. Төрийн зүгээс хяналт, шалгалт явуулж шийдвэрлэх арга хэмжээг авч эхэлжээ. Мөн төрөөс зарим хүүхдийг хувийн цэцэрлэг рүү хуваарилаж байгаа нь төрийн өмчит цэцэрлэгүүд багтаамжгүйгээс болдог гэнэ. Харин нийслэлийн хэмжээнд 140 мянга 904 хүүхдийн цэцэрлэгийн хүчин чадлыг бий болгожээ. Тухайлбал: 

-Түрээсийн байр 14 мянга 133

-Байгууллагын цэцэрлэг 2 мянга 527 байна. Үүнээс: 

-Баянзүрх дүүрэг 35 мянга 100

-Сонгинохайрхан дүүрэг 31 мянга 718

-Баянгол дүүрэг 21 мянга 447 

-Хан-Уул дүүрэг 20 мянга 891 

-Чингэлтэй дүүрэг 13 мянга 345

-Сүхбаатар дүүрэг 12 мянга 316

-Налайх дүүрэг 3 мянга 472

-Багануур дүүрэг 2 мянга 340

-Багахангай дүүрэг 275 

         Нийт 14 мянган суудал буюу 130 гаруй түрээсийн байрыг салбар бүлгээр ажиллуулж байгаа аж. Эдгээр байрын 70 хувь нь хичээлийн жилийн өмнө ашиглалтад орж, үлдсэн 30 хувь нь үе шаттайгаар ашиглалтад орж, хүүхдээ хүлээж авна гэжээ. Нийслэлийн цэцэрлэгийн хоёр дахь шатны бүртгэл есдүгээр сарын 10-нд зохион байгуулагдана. Эхний шатанд хамрагдаж чадаагүй бол дараагийн шатанд хамрагдах боломжтой гэнэ.