Хүний шинэ орон зай, нийгмийн хоёрдогч хэлбэр цаашлаад амьдрал дах өдөр тутмын хэв маяг ухаалаг утастай яах аргагүй холбогджээ. Сурч боловсрох, танин мэдэх боломжтой бүхий л арга зам энэ жижигхэн биетэд оршино. Шинэ  цагийн залуусын орлого, амжилт, мэдлэг зэрэг нь ухаалаг гар утаснаас шууд хамааралтай байх аж. Ялангуяа сурагч, оюутнуудын дунд гар утасны үүрэг хамгийн чухал бөгөөд түүнийг дагаад эрэлт ч нэмэгддэг байна. Тэгвэл шинэ ухаалаг  утасны үнийн дүн болон иргэдийн худалдан авалттай танилцахаар Улаанбаатар хотын гар утасны өргөн худалдааны төв болох TEDY төвөөс сурвалжилга бэлтгэлээ. 

ХАМГИЙН ҮНЭТЭЙ УТАС БУЮУ IPHONE 13 PROMAX 4 САЯ ТӨГРӨГИЙН ҮНЭТЭЙ

              Ажлын цаг ид дундаа өрнөж, хаа сайгүй хүмүүс завгүй гүйлдэнэ. Тэдний зарим нь залуус, ахмад настнууд ч байх. Урд замаа ч үл анзааран  утасныхаа дэлгэцийг өндийх сөхөөгүй ширтэнэ. Бүр зарим нь гэрлэн дохион дээр ирээд ногоон гэрлээ хүлээх зуур шууд л утсаа гаргаж ирэн ямар нэг зүйл хийж байгаа харагдана. Гэвч хэсэгхэн зуур ийн  анхаарлаа сарниулах хооронд ногоон гэрэл унтарч улаан гэрэл асчихав. Утасныхаа дэлгэцийг ширтэж эхэлсэн цагаас, дэргэд өрнөх үйл явдал, жаргал, зовлонг огтоос анзаарахгүй болж байгаа юм. Автобусны буудал дээр дараагийн автобусыг хүлээх зуур нэгэн эмэгтэй дэргэд зогсоод өөрийн суух автобусыг утсаа ашиглан хаана явж байгааг  нь мэдэж байв. Гэх мэтчилэн хүний хэрэгцээ, цаг зав, зарим асуудлыг хэдхэн хоромд шийдчихлээ. TEDY төвийн хоёрт давхарт гарахад хүмүүсийн  уур амьсгал, хөл хөдөлгөөн оргил үедээ байлаа. Хүүхдээ хөтөлсөн аав, ээжүүд лангуу болгоныг алгасалгүйгээр шинэ утас сонирхоно. Тэдний зорилго хүүхдэдээ гар утас авч өгөх байсан нь илт байлаа. Лангуун дээрх худалдагчид ээлж нэгээр “Наашаа хүрээд ир, ямар утас юм, энд хямдхан байна" гэхчлэн хүмүүсийг өөртөө татах аж. Бид хойшоо чигээрээ алхсаар нэгэн худалдааны лангуун дээр ирж утасны үнийн талаар мэдээлэл авахаар худалдагч Г.Баярсайхантай уулзлаа. Тэрбээр “ Би энэ лангууг ажиллуулж эхлээд  удаагүй байна. Гар утаснууд маань бүгд Солонгос улсаас ирдэг баталгаат утаснууд. Тийм учраас үнийн хувьд ч илүү хямд байдаг.

Жишээ нь Iphone X өмнө оныг  бодвол 100 мянган төгрөгөөр хямдарсан бөгөөд 800 мянган төгрөгөөр зарагдаж байна. Мөн iphone 11 загвар нэг сая 100 мянган бол Iphone 12, 12 pro хоёр сая төгрөгөөс дээш үнэтэй. Харин iphone 13 2 саяаас 4 сая төгрөгийн хооронд байгаа.

                 Эдгээр утаснууд нь бүгд шинэ юм. Хуучин, өмнөх загварын Iphone  гар утасны үнэ унадаг шалтгаан нь APPLE компани шинэ бүтээгдэхүүнээ танилцуулахад өмнөх загварын үйлдвэрлэлийг албан ёсоор зогсоодог. Тиймдээ ч иргэдийн дунд эрэлт үүсч зарим загварууд үнээ тогтоон барьж чаддаггүй юм. Хуучин ашиглаж байсан утас үүнээс 200 мянган төгрөгөөр хямд бий. Гэхдээ албан ёсны худалдааны лангуунаас авахгүй бол луйварт өртөх  магадлалтай” гэв. Бидний хэдийнээ сайн мэдэх өргөн хэрэглэдэг Iphone гар утас нь загвар бүр нь шинэчлэгдэхийн хэрээр иргэдийн дунд эрэлттэй болж эхэлдэг байна.

ХУУЧИН УТАСНААСАА ИЧДЭГ

          Бид олон худалдан авагчдын дундуур зөрж алхсаар  ээжтэйгээ утас сонирхон зогсох шинэ оюутан Г.Баярмаатай ярилцлаа. Тэрбээр “Би оюутан болоод Улаанбаатар хотод орж ирээд удаагүй байна. Хамгийн түрүүнд гар утсаа солино доо л гэж бодсон. Ээж, аав минь надад аль хэдийнээс шинэ утас авч өгнө гэж хэлж байсан. Миний сонирхдог утас бол SAMSUNG  загвар. Би одоо өөрийн ашиглаж байгаа утсаа гурван жил барьж байгаа. Энэ хугацаанд олон шинэ загвар гарсан. Эргэн тойрныхон маань гоё утас аваад л байсан. Би сүүлдээ бага зэрэг ичмээр санагддаг байсан үе бий. Ядаж л сайн камертай бол зураг дарахад ч гоё байдаг.

Хичээлээ хийхэд ч мөн утас маш их хэрэгтэй.

Сүүлийн үед ингэж найзуудаасаа ичдэг байсан ч одоо шинэ утастай болох гэж байгаа болохоор баярлаж байна” гэлээ. Үр хүүхдийнхээ таатай орчинг бүрдүүлэх, сурч боловсроход нь насан туршдаа хувь нэмэр оруулан хариу нэхэлгүй ирсэн аав, ээж нар үүгээр ч төгсөхгүй, лангуу болгонд харагдаж байв. Олны дунд үр хүүхдээ бусдаас дутаахгүй гэсэн аав ээжүүд ийн явж харагдана. Үүнээс хараад үзэхэд гар утас нь дэвшилтэт технологи хэдий ч хүнийг үнэлэх үнэлэмж болов. 

SAMSUNG  УТАС 150 МЯНГААС 3 САЯ ТӨГРӨГИЙН ХООРОНД, REDMI  УТАС 300 МЯНГАН ТӨГРӨГӨӨС ЭХЭЛЖ БАЙНА

             TEDY төвийн хоёр давхарын лангуунууд үйлчлүүлэгчдээр тасрахгүй орлого арвин байгаа бололтой. Хаа сайгүй хүмүүс утастай бүх зүйлээ холбосон нь ил харагдаж байна. Худалдааны төвийн хойд хаалгаар ороод хоёр давхарт гарахад SAMSUNG-ын албан ёсны гэрээт борлуулагчидтай уулзлаа. Солонгосын алдарт энэхүү гар утасны брэнд дэлхий дахинаа өргөн хэрэглэгчидтэй болсоор ирсэн. Манай оронд худалдаалагдаж байгаа энэ загварын утаснууд мөн л Солонгос улсаас орж ирдэг байна. Борлуулагчид карго болон зардлын мөнгийг утасныхаа үнэ дээр тусгадаг байна. Энэ нь ч бас үнийн өсөлттэй холбоотой байдаг байна. Гэрээт борлуулагч Б.Гэрэлтуяа “ Манай дээр борлуулагдаж байгаа утаснуудаас хамгийн үнэтэй загвар буюу  SAMSUNG S22 ultra 3 сая 800 мянган төгрөгийн үнэтэй байна . Мөн SAMSUNG A  загварууд 300 мянган төгрөгөөс эхэлж байна. Хамгийн хямд нь 150 мянган төгрөгөөс эхэлж байгаа. SAMSUNG A30 400 мянга гэх мэтчилэн.  Мөн хятадын алдарт REDMI  утаснууд төрөл төрлөөрөө ирсэн бөгөөд үнийн хувьд хамгийн ихдээ 800 мянган төгрөгийн үнэтэй. Иргэд худалдан авалт энэ сараас сайн болж эхэлж байгаа. Ялангуяа хүүхэд, залуучууд гар утас их авдаг” гэлээ.  

             Энэ мэтчилэн залуус өдөр тутамдаа гар утасны хэрэглээг илүү түлхүү анхаарч, дэвшилт гарах тусам өөрийн амьдралд шинэ өнгө төрхийг бий болгодог байна.