Дэлхий нийтийг цочроосон цар тахалтай холбоотойгоор иргэдийн амны хаалтны эрэлт ихэсч, үүнтэй зэрэгцэн эмийн сангууд ашиг олох зорилгоор маскны үнээ нэмж, 300 төгрөгөөр зарагддаг байсан нэг удаагийн амны хаалт 3000-4000 төгрөг болтлоо үнэд орж байлаа. Улмаар эмийн сан, эм ханган нийлүүлэх төвүүдэд амны хаалтны нөөц дуусч, иргэдийн хэрэглээг хангаж чадахааргүй түвшинд хүртлээ хомсдол үүссэн байдаг. Тухайн үед амны хаалт олдохгүй, олдсон маскыг нь орлого багатай иргэд авч чадахгүй байгаа шүүмжлэлүүд гарч байсан. Тэгвэл одоо амны хаалт хэрэглэдэг хүн үгүй болжээ. Эрэлт байхгүй болсноор амны хаалтны үнэ буурч, 500 төгрөг болсон байна.