Баяр наадам ч хаяанд ирээд автомашины борлуулалт оргилдоо цэгтээ хүрдэг үе ирж байна даа. Үндэсний баяр наадамтай холбоотойгоор автомашины үнийн өөрчлөлт, эрэлтийн талаар сурвалжлахаар "Да хүрээ" төвийг зорьж очив.

            12:00 цагийн үед “Да хүрээ”-д хаа нэг л ганц, нэг хүн автомашин сонирхож явах харагдана. Уг нь урьд өмнөх жилүүдийн яг энэ үеэр "Хүмүүс ид "язганаж" байдаг сан даа" гээд л нэг ченж хэлж байна. Зуны улирал эхлээд автомашин сонирхож яваа хүмүүс орон нутаг руу гарч, хөдөөгийн зам дээр бартаа туулах чадвар сайтай тэрэг сонирхож байх. Тус төвийн ажилтнууд сүүлийн жилүүдэд цар тахалтай холбоотой хөл хорио, хил хаалттайгаас орж ирэх автомашин, сэлбэгийн тоо цөөрсөн талаар учирлав. Мөн үүнийгээ даган автомашины үнэ ч 2-5 сая төгрөгөөр өссөн гэнэ.

         -АВТОМАШИН ХУДАЛДАН АВАГЧДЫН ТОО ЭРС ЦӨӨРЧЭЭ-

Автомашины худалдан авахаар зорих ирэх хүмүүсийн тоо цөөрч, үнэ ханш өссөн талаар "Да хүрээ"-д тэвштэй автомашины худалдаа эрхэлдэг 50 орчим насны эрэгтэйгээс асуухад тэрбээр “Портер үйлдвэрлэсэн оноосоо хамаараад янз бүрийн л  үнэтэй байна даа. Манайх энэ жил 1999-2005 онд үйлдвэрлэгдсэн автомашинуудыг худалдаалж байна. Энэ портер гэхэд 1999 оных 14 сая төгрөгөөр зарагдаж байгаа" гээд хажуудах автомашинаа зааж байна. Тэрбээр үргэлжлүүлэн "Автомашин оноосоо шалтгаалж, үнийн хувьд 500-800 мянган төгрөгийн зөрүүтэй байдаг. Урьд нь ч наадмын өмнөх хэдэн өдөр хүний хөл хөдөлгөөн тасардаггүй, орлого ч сайн байсан. Харин энэ жилийн хувьд худалдан авалт эрс муу байна. Тээвэрлэлтийн зардал өссөний улмаас нэг автомашин үнэ гэхэд л 1-1.5 сая төгрөг нэмэгдсэн. Өссөн үнэ нь зөвхн тээврийн зардлын өртөг. Түүнээс бус худалдаачид зохиомлоор үнийн хөөрөгдөл үүсгэсэн зүйл байхгүй.

   Би 18 жил автомашин борлуулахдаа энэ жил шиг  бага борлуулалттай байж үзээгүй. Өнгөрсөн жил манай ойр орчмын хашаанууд бараг л хоосорсон. Гэтэл одоо хашаа дүүрэн автомашин нь зарагдахгүй болчихлоо. Уг нь наадмын өмнө малчид ноос ноолуураа аваад бэлэн мөнгөтэй болчихсон наадмын дараа хадландаа гарахдаа унах шинэ портер авахаар хотод ирж сайн гэснийг шилж унаад явдаг. сан Гэтэл энэ жил баруун аймгуудын ноос ноолуур оройтож эхэлж хотыг зорин ирэх малчид ч багасаж байна даа” гэлээ.

-ББСБ-УУД АВТОМАШИНЫ ЗЭЭЛ ОЛГОХОО БОЛЬЖЭЭ-

  Олны хэлдгээр Монгол Улсад өөрт таалагдсан автомашинаа шууд л бэлэн мөнгө тоолж өгөөд унаж гарах бэл бэлчинтэй хүн цөөн. Тиймээс ч иргэд автомашины урьдчилгаа, лизингэд 3-5 сая төгрөг төлж, үлдэгдэл төлбөрийг ББСБ-аар дамжуулан олон жилийн хугацаа, хүүтэй хуваан төлөх нөхцөлтэй зээл авч, автомашинтай болох нь олширсон. Гэсэн ч иргэдийн "хөл дүүжлэх" ганц арга, ББСБ-ууд өнгөрсөн зургадугаар сараас автомашины зээл олгохоо больжээ.

Энэ талаар "Да хүрээ" худалдаа төвийн мэргэжилтэн Г.Ууганбаяраас тодруулахад "Энэ жил машин авах иргэдийн тоо эрс буурсан. Худалдагч авагчид дотроо Улаанбаатар хотын оршин суугчид ББСБ-аар дамжуулан зээл авах нь олон байдаг. Харин өнгөрсөн зургадугаар сараас ББСБ-ууд автомашины зээл олгохоо зогсоосон. Үүнээс шалтгаалан автомашин худалдан авагчдын тоо буурсан гэж үзэж байгаа. Харин хаа нэг орон нутгийн иргэд бэлэн мөнгөөр худалдан авч байна" гэсэн юм.

     "Да хүрээ" төвийн хашаан дотор "Ямар машин сонирхож байна", "Сайн яриад өгнө шүү" гэсэн олон ченж угтаж байна. Нэг нэгнээсээ ам "уралдаж", хариу хэлээгүй байхад нь л машин руугаа оруулж, суулгачих гээд л зогсож байх. Тус төвөөс сүүлийн жилүүдэд иргэдийн түлхүү сонирхох болсон "Aqua", "Prius-20", "Prius-30", "Harrier" зэрэг автомашины үнийг сонирхвол

“Aqua” 14-19 сая төгрөг

“Toyoto Harrier” 47-88 сая төгрөг

“Toyota Pruis 20” 17-23 сая төгрөг

“Toyota Pruis 30”  25-28 сая төгрөгийн үнэтэй байв.

"Да хүрээ" төвд бүтэн өдөр болоход автомашин худалдаж аваад гарч байгаа хүн ховор байх. Тэгсэн жил дараалан орон нутгаас ирж автомашины үнэ сонирхоод хоёр дахь жилдээ худалдан авч чадалгүй гарч байгаа нэг хүн байна. Түүнийг Х.Баатар гэнэ. Тэрбээр "Өнгөрсөн жил бас л автомашин худалдаж авахаар орон нутгаас орж ирсэн. Гэтэл хил, гааль хаалттай гээд автомашины үнээ 2-3 сая төгрөгөөр нэмчихсэн байсан. Энэ жил автомашины урьдчилгаагаа олоод иртэл үнэ нь дахиад л нэмэгдчихжээ. Хажуугаар нь ББСБ-ын зээл гарахгүй гээд дахиад л автомашин авч чадахгүй хоцорлоо доо. Одоо эргээд нутаг руугаа замын унаагаар л явах боллоо" хэмээн учирлаж байв.

      Энэ зэрэг асуудлаас шалтгаалан "Да хүрээ" худалдааны төв худалдан авагчдын "хомстолд" нэрвэгджээ. Ченжүүд ч хэдэн сар хашаандаа "уясан" цөөн автомашинаа гялайж, гялтайтал нь арчиж, цэвэрлэсээр сардаа 2-4 автомашин л арай хийж борлуулж байгаа талаар учирлаж байсан юм.