Шатахууны үнийн нэмэгдэл иргэдэд дарамт болж байна

2022-02-14, 842

Дахиад л шатахууны үнэ нэмэгдчихлээ, ард түмнээ яаж амьдар гэж байгааг мэдэхгүй юм. Одоо шатахуун дагаад хүннсний бүтээгдэхүүн, өргөн хэрэглээний барааны үнэ ч дийлдэхгүй нь" хэмээн “Приус-30” маркийн машины жолооч өгүүлнэ. Түний ийн ярихын учир нь, гурван хоногийн өмнө АИ-92 шатахууны үнэ 40-45 төгрөгөөр нэмэгдсэн тухай Газрын тосны бүтээгдэхүүн импортлогчдын мэргэжлийн холбооны тэргүүн Ж.Мөнхнаран мэдээлсэн юм. Энэ дагуу бид зарим шатахуун түгээх станцаар орж, дараах сурвалжилгыг бэлтгэлээ.

-Ард түмний амьдрал туйлдаа хүрч байхад, шатахууныхаа үнийг нэмчих юм-

Биднийг 100 айлын буудалд байрлах "Петровис”шатахуун түгээх станцад очиход,портер, "Приус-20" маркийн машинтай иргэд шатахуун авч байв. Тус станцын түгээгчээс “Шатахууны үнэ өсжээ, танай дээр хэдэн төгрөгөөр өссөн бэ” гэхэд түгээгч “Газрын тосны газраас очиж асуу, бид нар сайн мэдэхгүй, ер нь өсөөд байгаа шүү дээ” гэсэн хариуг өгөв. Энэ үеэр "Приус-20" машины жолооч “Нэмэгдсэн байна, зүгээр та нар нэмсэн бол нэмсэнээ хэлээч” хэмээн бухимдав. Түгээгчээс ийн асуухын учир тус газар үнээ солиогүй байсан юм. Жолооч үргэлжлүүлэн “Ах нь, сая 10 литр шатахуун авлаа нэмэгдсэн байна. Өмнө нь АИ-92 шатахууны үнэ 2240 байсан бол хоёр хоногийн өмнөөс 2285 болж нэмэгдлээ, одоо мөдхөн литр нь 3000 гэхэд гайхах юм алга. Үнэхээр ард түмний амьдрал өнөөдөр хамаг юмны үнэ өсөөд туйлдаа хүрч байна, тэгэхэд дахиад шатахууныхаа үнийг нэмчихээр яаж амьдрах болж байгааг үнэндээ мэдэхгүй юм. Том сайд, дарга нь хөгжлийн банкнаас зээл авчихаад төлж чадахгүй байна гэх юм, идэж ууж байхаар ард түмнийхээ амьдралд хэрэгтэй нэг ч гэсэн зүйл хийгээсэй" гэв.

Ийнхүү "Петровис", Шунхлай", "Жаст ойл", "Сод Монгол" зэрэг шатахуун түгээх станц АИ-92 шатахууныхаа үнийг 40-45 төгрөгөөр нэмсэн буюу литр шатахууны үнэ 2240-2285 төгрөг болж нэмэгджээ.

-Шатахууны үнийг дахиад нэмбэл жагсана-

Бид шатахууны үнийн нэмэгдэлтэй холбоотойгоор зарим иргэдийн нөхцөл байдлыг тодрууллаа. Иргэн Г.Амаржаргал "Шатахууны үнээ дахиад нэмсэн нь хүнд тусаж байна. Цар тахлын улмаас хил хаагдаж, юмны үнэ өссөн, одоо бүр их нэмэгдчихлээ. Зарим нь хоногийн хоолоо арай ядан залгуулж байсан бол одоо нийтээрээ арга ядаж байна. Шатахууны үнээ ингээд нэмээд байх юм бол хэчнээн тэтгэврийг нэмж, халамж үйлчилгээ төрөөс үзүүлээд ч нэмэр алга. Одоо бидэнд ганц зам байна, дахиад шатахууны үнийг нэмбэл нийтээрээ жагсах хэрэгтэй" гэв. Харин иргэн Ш.Чулуун "Одоо машин унахад хэцүү боллоо. Уг нь сургууль руу ач, зээгээ зөөгөөд, ойр зуурын хүнсээ базаачихдаг юм. Хөдлөөд л шатахуун нэмэгдэнэ. Манай улс хэдийгээр экспортлогч орон биш учраас хүссэн, хүсээгүй шатахууны үнэ дэлхийн зах зээлийг дагадаг байх. Гэхдээ өнгөрсөн жилтэйгээ нийтдээ дөрвөн удаа нэмлээ. Төр засгаас шатахууны үнэд онцгой анхаармаар байна" гэв.

-Такси 500 төгрөгөөр үнээ нэмжээ-

Хүнсний 4-р дэлгүүрийн буудлаас долоон буудал руу 2000 төгрөгөөр явдаг халтуурчид шатахууны үнэ нэмэгдсэний улмаас 500 төгрөг нэмжээ. Тус буудлаас орой бүр 2000 төгрөгөөр зорчдог байсан иргэд 2500 төгрөгөөр зорчих болжээ.

Шатахууны үнийн нэмэгдэл иргэдэд дарамт болж байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2022-02-14 10:30:55

Зөв: Нэмэргүй гээд яах бэ. Хэн алдагдалтай бизнес хийх юм бэ...харин монополийг задалж чөлөөт өрсөлдөөнийг бий болгоё. Үнэтэй болох тутам хэрэглээгээ хянах, багасгая. Заавал тэр үнэтэй юмыг харааж зүхэн хэрэглэх ямар албатай юм бэ
Сэтгэгдэл үлдээсэн: 2022-02-14 10:22:41

гангаа: Одоо яахав дээ. та нарын сонголт чинь тэр