Лангуу түрээслэх хэдэн төгрөгөө хоногийнхоо хоолд хадгалж, хурууны өндгийг хатган байж оёсон монгол цамц, дээлээ гудамжны төмөр сараалжинд өлгөчихөөд дүн хүйтэн өдөр гараа атгаж, үлээн зогсоо эмэгтэйтэй таарлаа. “Эгч нь цагаан сардаа бэлдэх гээд л хүйтэн өдрийн турш энд зогсож байна даа. Юу юугүй л шинийн нэгэн болох гээд байхад тавгийн идээгээ ч авч чадаагүй л явна. Гэхдээ оёсон хэдэн дээлээ өнөөдөр авч гарч ирснийх түмнийхээ хүчинд тавгийн идээний мөнгөө болгочихоод л байж байна” гээд инээмсэглэн зогсох аж.

            М.Сувд “Би монгол цамцаа аль чадахаараа хичээж, оёж хийсэн. Эрэгтэй загварыг нь 50 мянга, эмэгтэйг нь 45 мянган төгрөгөөр зарж байна. Гэтэл “Хүннү” брэнд гэж яг ижилхэн материал, загвартай цамц хийгээд түүнийг “брэнд” гээд 250 мянган төгрөгөөр зарж байгаа сурагтай. “Брэнд”-ээр түрий барьсан улс л цагаан сараар иргэдээ шулдаг байх” хэмээн учирлаж байлаа.

-ОЁДОЛЧДЫН ЗАХИАЛГА ДҮҮРЧ, ЗАХИАЛГАА ЗОГСООЖЭЭ-

            Хотын төвд үйл ажиллагаа явуулдаг “Чандмань” худалдааны төвөөр оров. Сар шинийн баяр ч ойртож, хувцасны тасгийнх нь лангуу бүрт л монгол цамц, гоёлын дээл харагдана. “Баяраар аав, ээжийндээ очиж золгоно доо” хэмээн утсаар ярьж явсан хосууд хос дээл сонирхож, худалдагчаас үнийг нь асуух аж. “Чандмань” төвийн үндэсний хувцасны тасагт хос дээл 250-350 мянган төгрөгний үнэтэй байна. Давхар дээл 150-250 мянган төгрөгний үнэтэй байх аж. Үйлчлүүлэгчид нь дээлний үнийг багасгахыг ахин дахин хүсэх ч, таван мянган төгрөгөөр л үнийг нь буулгаж, “Авбал ав. Авахгүй бол өөр дуртай газраасаа авахгүй юу” гэх нь тэр.

            Баянзүрх дүүрэгт худалдаа эрхэлдэг “Соёлын урлал” дэлгүүрээр орлоо. Бэлэн зарж байгаа цөөн гоёлын давхар дээлээ хажуудаа дэлгэсэн оёдолчин “Захиалга авахгүй байгаа. Энэ сард их захиалга аваад одоо хугацаанаасаа өмнө дуусгах гээд амсхийх завгүй л сууж байна” гэв. Ойролцоох оёдолчны газар руу орвол мөн л захиалга нь овоорсон аж. Харин бэлэн цөөн хэдэн дээлнийх нь үнийг асуувал таван мянга, 10 мянгаар үнийг буулгаж, цагаан сар болж, дээлний эрэлт буурахаас өмнө зарахыг хичээж байгаа харагдана.

-ХУРГАН ДОТОРТОЙ ДЭЭЛ 400 МЯНГААС НЭГ САЯ ТӨГРӨГИЙН ҮНЭТЭЙ БАЙНА-

            Энэ өвөл куртикэн загвартай дээл эрэлттэй байна. “Нарантуул” худалдааны захад куртикэн загвартай дээл, хантааз өмссөн худалдагч нар олон байлаа. Тус захаар үйлчлүүлж байгаа иргэдийн ярианаас анзаарахад энэ сар шинийн баяраар монгол цамц, хантаазаар гангарах хүн олон.

Олон хүн цугласан нэг хэсэгт монгол цамц 60 мянган төгрөгний үнэтэй байх аж. “Доош нь буулгаад 50 л болгож өгье” гээд худалдагч махлаг эр мар мар инээж зогсох. Харин хантаазны үнэ загвараасаа хамаарч 75 мянган төгрөг болон түүнээс дээш үнэтэй. Хэрэв дээлтэй хамт авах юм бол хантаазны үнэ 25 мянган төгрөгөөр хямдарч, 50 мянган төгрөг болгож өгөх гэнэ.

            Жилийн жилд иргэдийн сонирхох, өмсөх дуртай хурган дээл “Нарантуул” захад ховорхон харагдах. Лангуун дээр бэлэн байгаа нь эрэгтэй, эмэгтэй загвар, хэмжээнээс хамаарч, 600 мянган төгрөгөөс нэг сая хүрэх аж. Хурган дотортой дээл сонирхож худалдагч дээр нь ирэх хүн олон байгаа харагдах ч үнийг нь асуухаас хэтрэхгүй байлаа.

“ДАВХАР ДЭЭЛ АВБАЛ БҮС ҮНЭГҮЙ ӨГНӨ”

            “Бөмбөгөр” худалдааны төв болон түүний ойролцоох жижиг худалдаа төв, дэлгүүрүүдээр үйлчлүүлж яваа хүн олон байв. Шинэ загварын хурган дотортой дээл 400 мянга болон түүнээс үнэтэй. Харин цөөн хэдэн лангуу ажиллуулж байгаа худалдаа эрхлэгч дээлний эрэлт буурч, сар шинийн баяр болохоос өмнө дээл худалдан авбал эмэгтэй бүс үнэгүй дагалдуулж, эрэгтэй бүс хямдруулах “уралдаан” зарласан байна.