“Гялгар уут гэдэг юм чинь ховрын бараа болсон шүү дээ” гээд мар мар инээх худалдагч эрийг сонсож зогссон үйлчлүүлэгч нь багтахыг нь халаасалж, үлдсэнийг нь тэврээд гарч байна. Тэвэрсэн хайрцагтай печениэ унагачихаад авахаар доош тонгойхдоо жүржээ унагасаар гарч явлаа.

-ХҮНСНИЙ ДЭЛГҮҮРҮҮДИЙН БАРАА ТАСАРЧ, ӨРГӨН ХЭРЭГЛЭЭНИЙ БҮТЭЭГДЭХҮҮНИЙ ҮНЭ НЭМЭГДСЭН ГЭВ-

          Супермаркет, өргөн хэрэглээний барааны “Үнийг нь асуухаараа л уулга алддаг” гээд хоёр эмэгтэй хоорондоо ярьж яваа харагдана. Сүхбаатар, Чингэлтэй дүүрэгт тогтмол үйл ажиллагаагаа явуулдаг хэд хэдэн ч дэлгүүрээр орсон үнийг нь гайхсан улс тасрахгүй. Иргэдийн ярьж байгаагаар хэзээнээс л үнийг нь гайхширч, муулж байдаг ч, энэ удаад “янших”-аас өөр аргагүй байгаа гэнэ. Өдөр тутмын, өргөн хэрэглээний мах, ногоо, гурил, будаа зэргээс авахуулаад үнэ нь 100-1100 төгрөгөөр нэмэгдсэн аж.

          Замын-Үүд, Эрээний боомт хаалттай байгаа нь хүнсний дэлгүүрүүдэд зарим бараа тасарчээ. Мөн үнийн хөөрөгдлийг дагаж, өргөн хэрэглээний барааны үнэ ч нэмэгдсэн байна. Нийслэлийн Статистикийн газраас гаргасан үнийн судалгаанд 2022 он гарснаас хойш мах, гурил, гурилан бүтээгдэхүүн, нарийн ногооны үнэ огцом өсжээ. Тодруулбал,

• 2021 оны арванхоёрдугаар сарын 30-нд 10,250 төгрөгийн үнэтэй байсан адууны ястай мах энэ сарын 5-нд 15,378 төгрөг,
• 2021 оны арванхоёрдугаар сарын 30-нд 8500 төгрөгийн үнэтэй байсан ямааны ястай мах энэ сарын 5-нд 10,083 төгрөг,
• 2021 оны арванхоёрдугаар сарын 30-нд нэг кг нь 1116 төгрөгийн үнэтэй байсан монгол төмс энэ сарын 5-нд 8350 төгрөгийн өсөлт үзүүлжээ.

-“ТЭНГЭРТ ХАДСАН” ҮНЭТЭЙ БАРААГАА ТЭВРЭЭД ЯВЖ БАЙГАА МОНГОЛЧУУД-

          “Сансар”, “И-март”, “Номин” зэрэг сүлжээ дэлгүүрт халдвар хамгааллын дэглэм баримтлах нь бага байна. Тооцоо хийхээр ар араасаа оочерлож, нэгнээ түлхэж байгаа харагдах аж. Шаардлага тавьсан нэгэн рүүгээ бухимдан хараалын үг урсгаж байхыг ч харлаа.Томоохон супермаркетууд “жижиг” хүнсний дэлгүүрүүдээс ялгаатай нь тасалдаж байгаа бараа цөөн гэнэ. Дэлгүүрүүдэд хамгийн их тасарч байгаа нь нэг удаагийн гялгар уут. Гялгар уут нь тасарсан учир худалдагчид нь үйлчлүүлэгчдээ бараагаа тэврээд явахыг зөвлөж байх.

Дэлгүүрийн лангуу тойрч тойрч, хүссэн бараагаа “тэнгэрт хадсан” үнээр авсан иргэд багтахыг нь халаасалж, үлдсэнийг нь тэврээд гарч байлаа.

ИРГЭН: Цахим үндэстэнд бичгийн хэрэгсэл хэрэггүй...

Хэдэн өдрийн өмнө нь “Урд хөршийн хил хаалттай байгаатай холбоотойгоор модны шуудай тасарсан” тухай цахим сүлжээгээр шуугиж байлаа. Тэгвэл бодит байдал дээр дэлгүүр, худалдааны төвүүдэд тасарсан бараа нь гялгар уут, шуудайгаар тогтохгүй байна. Жишээлбэл,

Хүүхдийн витамин

           Томоохон худалдааны төв, дэлгүүрүүдэд хүүхдийн витамины нөөц асуудалтай, зарим нь тасарсан байна. Хүүхдийн дархлаа дэмжих витамин тасарч, нярай хүүхдийг угждаг сүү, сүү орлуулагчийн нөөц бага байгаагаас үнэ нь 15 мянган төгрөгөөр нэмэгдэж, 79,990 төгрөг болсон талаар эцэг, эхчүүд учирлаж байв.

Бичгийн хэрэгсэл

           Хотын төв орчимд худалдаа эрхэлдэг бичиг хэрэгслийн хэд хэдэн дэлгүүрт өнгөрсөн сараас эхэлж, бичгийн хэрэгсэл тасарчээ. Үүнд иргэдийн өргөнөөр хэрэглэдэг А4  бичгийн цаас, дэвтэр, үзэг, сав, баглаа боодол багтаж байгаа юм. Бичгийн хэрэгсэл тасарч, лангуунууд нь “хоосроод” удаж байгаа дэлгүүрийн худалдагчаас оюутан, сурагчид үзэг, дэвтэр асуухад “Цахим үндэстэнд бичгийн хэрэгсэл хэрэггүй шүү дээ” гээд инээх аж.

Тэжээвэр амьтны хоол

           Жижиг амьтны дэлгүүрээс эхлүүлээд тогтмол үйл ажиллагаагаа явуулдаг том худалдааны төвд ч тэжээвэр амьтны хоол тасарчээ. Тодруулбал, урд хөршөөс импортолдог олонх тэжээвэр амьтны хоол, тэжээл тасарсан. “Нохой, мууранд өгдөг хуурай хоол тасарч,  бага савлагаатайг нь хадгалсан хувь хүн, дэлгүүр үнийг нь нугалж зарж байгаа” талаар иргэд хэлж байлаа.

Дүрслэх урлагийн хэрэгсэл

           Хүний нүднээс хол, тэр бүр анзаарагдаад байдаггүй ч, Монгол Улсад хамгийн их тасарч, “ховрын” бараа болсон зүйл нь дүрслэх урлагийн хэрэгсэл аж. Баянзүрх дүүрэгт байрлах “Бийр” дүрслэх урлагийн дэлгүүрийн лангуунууд нь хэдийнэ хоосорч, хэдхэн бийр, бэх л торойж харагдах. “Бийр” дэлгүүрт 2021 оноос хойш тосон будаг, акрилка, будаг шингэлэгчийн “сураг тасарсан” гэнэ.