Коронавирусийн цар тахал гарснаас хойш гадаад улсаас эх орондоо ирэх иргэдийг тусгаарлах болсон. Ингэхдээ иргэд эхлээд сар, дараа нь 21, тэгээд 14 хоног гэсэн журмын дагуу тусгаарлагдсаар гэртээ харих эрхээ авч байсан. Тэгвэл өнгөрсөн сарын 23-наас гадаадаас ирсэн иргэдийг гурван хоног тусгаарлахаар шийдвэрлэсэн юм. Энэ хүрээнд нийслэлийн хэмжээнд 20 тусгаарлах байр, зочид буудлын 2191 орыг урьдчилан бэлтгэсэн. Тэгэхдээ эдгээр байр нь цөм Улсын Онцгой Комиссын нэгдсэн шуурхай штабын ажлын хэсгийн сонгон шалгаруулалтад тэнцсэн гэсэн үнэлгээтэй. Гэвч чухам ямар шалгуурыг давсан гэмээр орчин нөхцөл иргэдийг угтаж байгаа талаар иргэд гомдоллож буй. Тун саяхны жишээ дурдахад, иргэн А Кентавр зочид буудалд тусгаарлагджээ.

 

 
 Тэрбээр "Яах вэ, нэмж мөнгө төлсөн болохоор орчин нөхцөл нь гайгүй буудал. Гэвч өгсөн хоолны мах нь нэг сонин амттай. Тэгээд гаднаас хоол захиалая гэхээр хориглоно. Арай л дэндүү, хамаг мөнгө төгрөгөө үрэн байж тусгаарлалтад орж байхад нохой ч тоож идэмгүй хоол өгч биднийг доромжиллоо" гэсэн гомдлыг өгүүлж байв. Ийнхүү тусгаарлалтын байрны гомдол санал үүгээр дуусахгүй. "Халуун усгүй, өрөө нь хүйтэн, усгүй болсноо хэлтэл, карантений ус уу" зэрэг асуудлыг иргэд тавьж буй. Угтаа бол тусгаарлах байрны журам гэж зүйл бий. Иргэд тусгаарлах өрөөнийхөө мөнгийг төлж, түүндээ тохирсон үйлчилгээгээ авах ёстой. Гэтэл муудсан хоол өгч, бохир орчинд тусгаарлаж байгаа нэртэйгээр хорьчихно. Энэ бол хүний эрхийг зөрчиж буй том хэлбэр. Зайлшгүй шаардлага, нийгмийн хариуцлагын хүрээнд УОК, ЭМЯ үгийг үг дуугүй мөрдөж буй иргэд хариуд нь эрхээ зөрчиж, халаасаа суйлуулж байна. Ерөөс тусгаарлаж байгаа гээд эрхийг нь зөрчиж болохгүй.

     Иргэд зочид буудал, тусгаарлагдах байрт тусгаарлагдах төлбөрөө тухайн байрласан газартаа тушаах журамтай. Мөн өөрсдийн сонголтоор ИБИС, Туушин, Кемпенский, Новотел зэрэг зочид буудалд тухайн зочид буудлын ханшаар төлбөрөө төлөн тусгаарлагдах боломжтой. Энэ хүрээнд иргэдээс ирж байгаа гомдол ч бий.

   Иргэн Л "Би нэмэлт төлбөртэй буудалд байрласан. Тэгэхгүй бол муухай хятад буудалд буулгах гээд нялх хүүхэдтэй болохоор хүүхдээ бодоод үнэтэй ч гэсэн төлөөл орсон. Долоо хоногийн төлбөр төлөөд орсон чинь онгоц хоцроод шөнийн 12 цагаас хойш буусан гээд найм хонуулж, найм хоногийн мөнгө авсан. Биднээс шалтгаалаагүй асуудалд хэн ч хариуцлага хүлээгээгүй. Тэгэхээр иргэд бидэнд хүнд тусдаг. Ядаж тал үнээр нь адилхан орчинтой хоолтой газар хүмүүсээ буулгавал бүгд таатай орчинд гайгүй хоолтой тусгаарлагдана" гэв. Иргэд ингэж л орчин нөхцөл, гайгүй хоолтой байрыг сонгохын тулд хамаг мөнгөө зарж, мөнгө муутай нэг нь үг дуугүй л үйлчилгээ муутай оромж шиг буудалд орох сонголттой тулгарчээ. Энэ эрх зөрчигдөж байгаа хэрэг биш гэж үү. Гурван хоног ч тэр ер хэд ч хоносон мөнгөө төлж л байгаа бол аюулгүй эрүүл үйлчилгээ авах бүрэн эрхтэй. Гэтэл мөнгөндөө баригдаад ариун цэвэр хангаагүй, амтгүй хоолтой газар тусгаарлагдаж сууна.

     Үргэлжлүүлэн бид энэ бүхнийг хариуцах ёстой, гаргасан журмаа эргэн нэг харах үүрэгтэй Улсын Онцгой комиссын Шуурхай штабын дарга Т.Баярхүүгээс тодруулахад "Тусгаарлалтын ажиллагааг иргэдийн хүндрэл учруулахаар зохион байгуулсан зүйл байхгүй. Иргэдийг тусгаарлах зохион байгуулалт дээр зарим тохиолдолд жаахан алдаа гардаг” гэсэн хариултыг өгсөн юм. Бүхэл бүтэн улсын цар тахлын нөхцөл байдлын бодлогыг хариуцаж, гадаадаас ирсэн иргэдийг тусгаарлах асуудлыг шийдвэрлэх газар ийм хариулттай сууж байна. Гэтэл иргэд өнөөдөр үйлчилгээ муутай тусгаарлалтын өрөөнд эрхээ зөрчүүлэн, хурдахан гарахыг яарч сууна. Нөгөө талаар иргэд гуравхан хохог тусгаарлана гэдэг бол зүгээр л мөнгөний наймаа. Энд хүнийг, улс нийгмээ бодсон шийдвэр гэж байхгүй байгааг ч шүүмжилж байв.