Намрын сэрүүн орсон хүйтэн өдөр болоод ч тэр үү “Нарантуул-2”, “Хүчит шонхор” хэмээх нийслэлийн томоохон зах эл хульхан байлаа. Гэхдээ монголчуудын амьдрал, амжиргаа ямар байгаа бодит байдлыг худалдааны захуудын үүднээс л мэдэрч болно. Тухайлбал, нохойны хоол, шулсан яс зарж хоолныхоо мөнгийг олох гэж ядарсан иргэд зам дагуу эгнээд, дуу нь гарахтай үгүйтэй чичирч  сууна. Зарим нь олсон хэдэн төгрөгөөрөө цай, хоол авахаасаа илүү шил юманд өгөөд дуусдаг янзтай халамцуухан, гундуухан хүмүүс гудамжаар л нэг харагдана лээ. Манай улсад 14 хоног шатахуун хомсдож, иргэдийн бухимдал туйлдаа хүрсэн.Тэд шатахуун авах гэж урт дараалал үүсгэж зогсохоос гадна өргөн хэрэглээний бараа бүтээгдэхүүн үнэ нэмэгдчихлээ. “Атар” талх гэхэд 1500 төгрөг болсон хэмээн халаглаж байлаа. Томоохон худалдааны төвүүд өргөн хэрэглээний бараа бүтээгдэхүүний үнэ ханшийн талаар сурвалжиллаа. 

“Нарантуул-2” худалдааны төвд үхрийн борц 59 мянган төгрөгийн үнэтэй байна

       "Нарантуул-2" худалдааны төвд, хонины ястай мах нэг килограмм нь 8500 төгрөг, үхрийн ястай мах нэг килограмм нь 9500 төгрөгийн  ханштай байна. Үхрийн ястай махны үнэ өмнөх долоо хоногтой харьцуулахад 200 төгрөгөөр, үхрийн цул махны үнэ 100 төгрөгөөр нэмэгдсэн. Ер нь махны үнэ хэвийн байгаа хэмээн худалдагчид ярилаа. Махны лангуу бусад лангуутай харьцуулахад хөл хөдөлгөөн багатай байв.

Мах аваад гарч буй иргэнээс махны үнэ наймдугаар сарынхаас нэмэгдсэн эсэх талаар  асуулаа. Тэрбээр энэ тухай ярихдаа "Би 20 мянган төгрөгт тааруулж үхрийн мах авлаа. Би ойрд мах аваагүй болохоор сайн мэдэхгүй байна.  “Хархорин”, "Хүчит шонхор” захад махны үнэ ганц, хоёр мянган төгрөгөөр хямд байдаг.  Харин “Саруул”, “Их наяд” худалдааны төвд үнэтэй. Би “Нарантуул” захын хажууд амьдардаг мөртлөө “Хүчит шонхор”, “Нарантуул-2” орж мах авдаг. Өнөөдөр (өчигдөр) хөл хөдөлгөөн багатай байна. Сиймхийг нь тааруулаад ирвэл 140-150 мянган төгрөгт бүтэн хонь авч болохоор байна” гэсэн юм.

ШӨХТГ: Шатахууны хомсдолтой холбоотойгоор махны үнэ нэмэгдээгүй

    Худалдааны захуудад мах, өргөн хэрэглээний бараа бүтээгдэхүүний үнэ огцом өсөөгүй хэвийн байлаа. Харин иргэдээс ШӨХТГ-т үнэ ханшийн талаар гомдол ирсэн эсэх өнгөрсөн 14 хоногийн хугацаанд зах, худалдааны төвүүдэд хяналт шалгалт хийсэн эсэх талаар ШӨХТГ-ын мэргэжилтнээс тодрууллаа. Тэрбээр "Өнгөрсөн долоо хоногийн мягмар гарагт "Хүчитшонхор" захад үхрийн махны бөөний үнэ 7000-9000, цул мах 11000-12000, хонины мах 6000-7400, цул нь 8500-9500 төгрөгийн ханштай байжээ. Нийлүүлэлт хэвийн, 90.9 тонн мах ирсэн байна. Харин өнөөдрийн байдлаар 113.3 тонн мах нийлүүлсэн байна. Үхрийн мах 200-300 төгрөгөөр нэмэгдсэн бол хонины мах 100-200 төгрөгөөр буурсан байна. Шатахууны хомсдолтой холбоотойгоор махны үнэ нэмэгдээгүй. Бараа бүтээгдэхүүний үнэ нэмэгдсэн гэж  иргэдээс ямар нэгэн санал, гомдол ирээгүй” хэмээлээ.

“Атар” талх 1430-1540 төгрөгөөр худалдаалж байна

      Мөн хурим найрын цагт цагаан идээ ямар үнэтэй байгаа талаар худалдагч нараас тодруулсан юм. Ээзгий, чихэртэй ааруул 18000, тараг 2500, өрөм 12000, аарц 6000, харин үхрийн борц 59 мянган төгрийн ханштай байлаа. Цагаан идээний худалдагч нар “Одоогоор цагаан идээний үнэ хэвийн байна. Их хэмжээгээр авбал, ярьж, тохироод өгч болно. Өвөл цагаан идээний үнэ нэмэгдэх байх” гэлээ.

 "Атар" талхны үнэ асуусан иргэн "Ямар муухай үнэтэй юм бэ" гэчихээд авалгүй яваад өгөв. Харин иргэдийн хамгийн их авдаг "Атар" талхны үнэ 1200-1540 болж нэмэгджээ. Харин “Алтан тариа” савласан дээд зэргийн нэг кг 1500-1800 төгрөг, нэгдүгээр зэргийнх 1300-1600, хоёрдугаар зэргийнх 969-1100 төгрөг байна. Харин “Атар” талх хүнсний зах, дэлгүүрт 1430-1540 төгрөгийн үнэтэй. “М-март” супермаркетад “Атар” талхыг хамгийн хямд буюу 1430 төгрөгөөр, харин “Сансар”, “Оргил”, “Е-март” супермаркетад хамгийн өндөр үнээр буюу 1540 төгрөгөөр худалдаалж байна.

“Өдөрт хоёр төмсөөр хоол хийвэл дараагийн цалинтай золгоно”

      Нийслэлчүүдийн махнаас илүүтэй худалдан авдаг бараа бол хүнсний ногоо. Намрын налгар өдрүүдэд тариаланчдийн буянаар хүнсний ногоо хямдардаг. Харин өвөл үнэ нэмэгдэж, бүр нарийн ногооны хомсдолд орох үе ч бий. Харин одоогоор монгол төмс 700, лууван 1000-2100, байцаа 1000, сармис кг нь 30.000, манжин 1800, өргөст хэмх 6000 төгрөгийн үнэтэй байна. Иргэд хүнсний ногоо бусад бараанаас илүү худалдан авч, хоолтойгоо залгадаг аж.“Өдөрт хоёр төмсөөр хоол хийвэл дараагийн цалин хүргэх байх даа. Мянган төгрөгт таараалууд төмс авъя” гээд задгай мөнгө тоолоод худалдагч руу хандаж буй эмэгтэй монголын мянга мянган ээжүүдийн төлөөлөл аж. Бид ийнхүү л амьдарч, амь зогоож байна даа.