-ЦАХИМ СУРГАЛТЫН ҮР ДҮН МУУ БАЙСАН-

          “Ковид-19” цар тахалтай холбоотойгоор Монгол Улс 2020 оны хичээлийн жилийн хаврын улирлаас эхлэн их, дээд сургууль, ерөнхий боловсролын сургууль зэрэг бүх түвшний боловсролын байгууллагын үйл ажиллагааг теле болон цахим хэлбэрээр зохион байгуулсан. Тэгвэл 2021-2022 оны хичээлийн жилд есдүгээр сарын 1-нээс эхэлж, танхим болон танхимын бус хэлбэрийг хослуулж, сургалт явуулах талаар Боловсрол, шинжлэх ухааны сайд Л.Энх-Амгалан мэдэгдсэн юм.

          Их, дээд сургуулиуд албан ёсоор хичээллэж эхлээгүй ч олонх сургуульд оюутан, залуус цуглажээ. Хичээлийн шинэ жил эхлэх болоогүй сургуулийнхаа үүдийг “сахиж” байгаа оюутнуудын ярианаас ажихад ихэвчлэн сургалтын төлбөрийн асуудал, сонгон судлах ёстой кредиттэй холбоотой асуудалтай байх. Улмаар өөрт тулгарсан асуудлаа шийдүүлэхээр оюутнууд хичээл нь эхлээгүй ч ийн багш нарын өрөөний хаалга “сахиж”, шийдүүлэхээр зогсоо аж.

          Өнгөрсөн хоёр хичээлийн жилийн хугацаанд зайны буюу цахим сургалтаар оюутан авах ёстой мэдлэгээ олж, авч чадаагүй гэнэ. Цахим сургалтыг хүлээн авахад интернэт, технологийн асуудлаас эхлүүлээд олон асуудал гардаг аж. Хүмүүнлэгийн ухааны их сургуулийн Олон улсын харилцааны тэнхимийн дөрөвдүгээр түвшний оюутан Т.Уртнасан өнгөрсөн хоёр хичээлийн жилд орон нутгаас цахим сургалтад хамрагджээ. Түүнээс хэлснээр “Орон нутагт интернэтийн хурд муу байгаагаас болж цахим сургалтаа бүрэн гүйцэд авч чадаагүй. Тасалдах, хоцрох тохиолдол их гарч байсан. Олон цагаар ухаалаг төхөөрөмж ашиглаж, хараа муудах болсон” гэнэ. Мөн цахим сургалтын үед багштай харилцаж, асуултдаа хариулт авахад төвөгтэй, электрон номын сан, цахим эх сурвалж олох, сургалтын материал авахад муу байсан аж. Т.Уртнасантай хамт байсан нөхөд ч мөн түүний хэлсэнтэй санал нэгдэж, цахим сургалтын үр дүн муу байсан талаар хэлж байлаа.

-ЗАРИМ ИХ, ДЭЭД СУРГУУЛИЙН СУРГАЛТЫН ТӨЛБӨР НЭМЭГДЖЭЭ-

          Өнгөрсөн хоёр жилийн турш цар тахалтай холбоотойгоор цахим сургалт орсон ч зайны сургалтыг зарим оюутан үр дүнгүй гэж үзсэн байна. Тэгвэл тэнхимийн хичээл орох болоход зарим их сургууль төлбөрөө нэмсэн талаар оюутнууд бухимдлаа илэрхийлж байлаа. Оюутнуудын санал, гомдлыг буцаалгүйгээр хүлээн авдаг ганц “газар нь” цахим сүлжээ. “Оюутны нэгдсэн групп” гэх цахим сүлжээний бүлэгт нэгэн оюутан “Хоёр жил цар тахал, цахим сургалт гэж үр дүнгүй, худлаа юм зохион байгуулж байгаад тэнхимийн сургалт эхлэх болохоор манай сургууль сургалтын төлбөрөө нэмчихлээ. Бүгд л адилхан байхад ингэж болно гэж үү. Сургуулиад дандаа оюутнуудаас мөнгө саах юм аа” гэсэн байна. Мөн бусад оюутнууд ч гэсэн “Цахим болон танхимын сургалтыг хослуулж байгаа гэчихээд яагаад төлбөр нэмж байгаа юм бэ. Ийм үед төлбөрөө нэмж болохгүй шүү дээ”, “Өмнө нь авдаг байсан төлбөрт оюутнуудын сургууль дээрх урсгал зардал ордог байсан. Харин одоо бол урсгал зардал багассан биз дээ. Яагаад төлбөр нэмэгдэж байгаа юм” гэх зэргээр бухимдлаа илэрхийлж байв.

БШУЯ-наас “Энэ хичээлийн жилд зөвхөн нэгдүгээр түвшний оюутнуудын сургалтын төлбөрт өөрчлөлт орно. Бусад түвшний оюутнуудын төлбөрт өөрчлөлт орохгүй” гэж мэдээлж байсан билээ. Тэгвэл 2-4 түвшний ангийн сургалтын төлбөрийг нэмсэн талаар оюутнууд бухимдлаа цахим сүлжээгээр дамжуулан илэрхийлж байгаа юм. Жишээлбэл, Хүмүүнлэгийн ухааны их сургууль зарим салбарын төлбөрийн нэг кредит тутамд 5435 төгрөгөөр сургалтын төлбөрийг нэмжээ. Мөн Их Засаг ОУИС есдүгээр сарын 1-ний хугацаанд багтаж, сургалтын төлбөрөө төлбөл хуучин төлбөрөө төлөх хөнгөлөлт үзүүлэх. Харин заасан хугацаанаас хойш төлбөрөө төлбөл сургалтын төлбөр нь өнгөрсөн жилүүдийнхээс нэмэгдэнэ гэжээ.

Зарим их, дээд сургууль сургалтын төлбөрөө нэмсэн ч энэ талаараа ямар нэгэн албаны мэдэгдэл хийдэггүй гэнэ. Харин сургалтын төлбөрийн талаарх мэдээллийг тухайн сургуулийн оюутны хувийн мэйл хаяг, сургуулийн вебсайтаараа дамжуулан оюутнууддаа хүргэдэг аж.

Б.ТУНГАЛАГТАМИР: Танхимаар хичээллэх нь цахим сургалтаас хэд дахин илүү

2020-2021 оны хичээлийн жил Монгол Улс дотооддоо халдвар алдах үе хүртэл буюу хоёр сарын хугацаанд танхимаар хичээллэсэн. Танхимын болон цахим сургалтаа онцлог, давуу, сул талуудын талаар МУИС-ийн ХШУИС-ийн хоёрдугаар түвшний оюутан Б.Тунгалагтамираас хоёр асуултад хариулт авсан юм.

-Таныг анх их сургуульд элссэн цагаас эхэлж, цахимаар хичээллэж, эхэлсэн. Энэ хугацаанд цахимаар хичээллэх үед ямар хүндрэл, бэрхшээл тулгарч байсан бэ?

          -Цар тахал Монгол Улсад илэрснээс хойш буюу өнгөрсөн оны арваннэгдүгээр сараас эхэлж, цахимаар хичээллэсэн. Тухайн үед нэгдүгээр ангийн оюутан байсан болохоор тусалж, дэмжих хүн байхгүй. Цахимаар ч багштайгаа холбогдож, сайн зөвлөгөө авч чаддаггүй байлаа. Чадахгүй, мэдэхгүй олон зүйл тулгарсан. Харин гэрээсээ гарч, хоол, унааны мөнгө зарцуулах шаардлагагүй болсон нь нэг талаараа сайн байсан.

-Шинэ хичээлийн жилд танхим болон танхимын бус сургалтын хослуулж зохион байгуулахаар болсон. Энэ талаар ямар байр суурьтай байгаа вэ?

          -Танхим болон цахимаар хослуулах нь илүү сайн байх болов уу гэж бодож байна. Гэсэн хэдий ч коронавирусийн дельта хувилбар Монголд их тархаж байгаа үед танхимаар хичээллэх нь буруу сонголт байж магад. Гэсэн хэдий ч боловсролын салбараа хойш тавиад байж болохгүй учир танхимаар орох нь нэг талаар зүйтэй. Танхимаар хичээллэх нь цахим сургалтаас хэд дахин илүү.

М.ЭНХЗУЛ