Элсэлтийн ерөнхий шалгалтыг өнөөдрөөс эхлэн 22-нийг хүртэл орон даяар зохион байгуулахаар болсон. Ерөнхий боловсролын сургуулиа төгсөж буй 40420 шалгуулагч элсэлтийн ерөнхий шалгалт өгөхөөр бүртгүүлжээ. Энэ жилийн элсэлтийн ерөнхий шалгалт цар тахлын үед болж буйгаараа онцлогтой. Иймээс цар тахлын хүнд нөхцөл байдалд элсэлтийн ерөнхий шалгалтыг хэрхэн зохион байгуулахаар төлөвлөж, бэлдсэн талаар эргэлт.мн сайт сурвалжиллаа.

ЭЛСЭЛТИЙН ЕРӨНХИЙ ШАЛГАЛТ ДУУССАНААС 72 ЦАГИЙН ДАРАА БАТЛАМЖ ОЛГОНО

          Шалгалт нь эхлэх гээд тэвдэж сандарсан төгсөх ангийн сурагчид сургуулийн үүдэнд цөөнгүй харагдах бөгөөд өмнө жил шалгалт өгсөн дээд үеийнхнээсээ туршлагыг нь сонсох гэж хошуурцгаана. Тэд хоорондоо “Өдрөөс өдөрт халдварын тоо нэмэгдээд байдаг. Өвчин авчихгүйхэн шиг л шалгалтаа өгөөд дуусчих юмсан” хэмээн ярилцах аж.

Бид элсэлтийн ерөнхий шалгалтыг хэрхэн зохион байгуулж буй талаар тодруулахаар боловсролын үнэлгээний төвийг зорилоо.

          Боловсролын үнэлгээний төвийн хэвлэл мэдээлэл, сурталчилгаа хариуцсан мэргэжилтэн Б.Цэрэннадмид “Энэ жил 34811 сурагч Ерөнхий боловсролын сургууль төгсөж байгаа. Тэдний 31782 нь элсэлтийн ерөнхий шалгалт өгөхөөр бүртгүүлсэн. Өмнө оны төгсөгчидтэй нийлээд энэ жил 40420 шалгуулагч элсэлтийн ерөнхий шалгалт өгөхөөр болсон. элсэлтийн ерөнхий шалгалтын зохион байгуулалтад улсын хэмжээнд давхардсан тоогоор 9250 багш, боловсролын байгууллагын ажилчид оролцож байна. Дээрх багш, ажилчид вакцины хоёрдугаар тунд бүрэн хамрагдсан. Орон нутагт хяналт хийх багш нар тухайн аймгууддаа очсон. Ерөнхийдөө шат, шатны зохион байгуулалт дуусаж, бэлтгэл ажил 100 хувь хангагдсан. Элсэлтийн ерөнхий шалгалтыг улсын хэмжээнд 48 байршилд зохион байгуулж ажилладаг байсан бол энэ жил 82 болж өргөтгөсөн. Үүнээс 42 нь орон нутагт, 40 нь нийслэлд байгаа. Цар тахлын хүнд цаг үед зохион байгуулж байгаа учир халдвар хамгааллын дэглэм баримталж ийм шийдвэрт хүрсэн. Өөрөөр хэлбэл, шалгалт авах анги, танхимийг сурагчид 1.5-2 метрийн зайтай суухаар тохижуулсан. Иймээс нэг ангид 12-15 сурагч шалгалт өгнө. Мөн суудлын хуваарь болон шалгалтын байрны мэдээлэл бүхий хуудсыг сурагч бүрд өгснөөрөө онцлогтой. Шалгуулагч суудлын хуваарьт заасан цаг орох хэсгийн дагуу шалгалтдаа хамрагдана.

          Үүнээс гадна бид дүн оноолт буюу хуудас засалтын үйл ажиллагаагаа шууд дамжуулна. live.eec.mn цахим хуудсаар шалгалтын дүнг шууд танилцуулах нь бөөгнөрөл үүсэхээс сэргийлж байгаа явдал юм. Бүртгэлийн дугаараар анхны оноонууд нь гарч ирэх ба овог нэрийг нийтэд зарлахгүй. Хэмжээст оноо шалгалтыг зохион байгуулснаас 24 цагийн дараа шалгуулагчийн буланд байршина. Иймээс тухайн сурагч өөрийн бүртгэлийн дугаар, нууц үгээ оруулаад тухайн хичээл дээр ямар оноо авсан гэдгээ мэдэх боломжтой. Шалгуулагч шалгалт өгөхөөс нэг цаг 30 минутын өмнө ирсэн байх шаардлагатай бөгөөд шалгалтын байранд нэвтрэхдээ гурван хэсэгт хуваагдаж орно. Элсэлтийн ерөнхий шалгалт дууссанаас 72 цагийн дараа батламжийг өгөх болно. Эцэг, эхчүүд шалгалт өгч байгаа хүүхдээ дагах ирэх тохиолдол элбэг байдаг. Иймээс  шалгалтын цэг дээр аль болох ирэхгүй байж, бөөгнөрөл үүсгэхгүй байна гэж эцэг, эхчүүдээс хүсэж байна “гэв

Элсэлтийн ерөнхий шалгалтыг улсын хэмжээнд 48 байршилд зохион байгуулж ажилладаг байсан бол энэ жил 82 болж өргөтгөсөн.

Ч: БАТТУЛГА: СУРГУУЛИЙН БҮСРҮҮ ЭЦЭГ ЭХИЙГ НЭВТРҮҮЛЭХГҮЙ

Бид элсэлтийн ерөнхий шалгалтын бэлтгэл ажил хэдэн хувтай байгааг сурвалжилахаар Чингэлтэй дүүрэгт орших Ерөнхий боловсролын тавдугаар сургуулийг зорилоо.

          Сургуулийн гадна талбайд 1.5 метрийн зайтай, дугаарлан зогсох улбар шар өнгийн тэмдэглэгээ хийжээ.  Мөн гадна талын хаалганы хажууд орох гарах чиглэлийг заасан сум байрлуулж тэмдэг, тэмдэглэгээ хийсэн харагдана. Үүдээр нь явж ороход шалгалт авах ангиудын байрлах давхар, өрөөний дугааруудыг маш цэгцтэй байрлуулжээ. Үүдний хэсэгт гар ариутган халдваргүйжүүлэх бодисуудыг эгнүүлэн тавьсан нь шалгалтын байр бэлэн болсныг илтгэнэ. Бид шалгалтын бэлтгэл ажил хэр явцтай байгаа, ариутгал халдваргүйжүүлэлтийг зохих ёсоор нь хийсэн талаар тус сургуулийн сургалтын менежер Ч.Баттулгаас тодрууллаа.

          Тэрбээр “Элсэлтийн ерөнхий шалгалтын бэлтгэл дууссан. Тэмдэг тэмдэглэгээ, ариутгал халдваргүйжүүлэлтийн ажлыг шат дараатайгаар зохион байгуулсан. Манай сургууль дээр таван сургуулийн 400 сурагч шалгалт өгөхөөр болсон. Хянагчаар багш, ажилчдын хийлсэн 40 хүн ажиллана. Өмнө жилийг бодвол халдвар хамгааллын дэглэмийг өшөө илүү чангатгасан. Нэг ангид 12-15 хүүхэд шалгалт өгнө. Тухайн ангийн багтаамжаас хамаараад суудал хоорондын зайг нэг метр байхаар төлөвлөсөн. Нийт 26 анги танхимд шалгалтыг зохион байгуулна. Манай сургуулийн хувьд нэг тусгаарлах өрөө, нэг тусгай ангийг бэлдсэн. Сэжигтэй тохиолдол илэрсэн тохиолдолд тусгаарлах өрөөнд оруулж, биеийн байдлыг нь ажиглаад шалгалтад орох боломжтой бол тусгай ангид шалгалтыг авахаар төлөвлөсөн бөгөөд тухайн хүүхдийг өөр хаалгаар гаргаж оруулна.

          Сургуулийн бүс рүү эцэг, эхийг нэвтрүүлэхгүй. Элсэлтийн ерөнхий шалгалтын үед ариутгалын ажлыг маш эрчимтэй зохион байгуулахаар төлөвлөсөн ба манай сургуулийн бүх үйлчилгээний ажилчид цэвэрлэгээ, ариутгалыг хийж гүйцэтгэнэ. Шалгалтын завсар бүрээр анги танхимыг халдваргүйжүүлэн ажиллах болно. Ариун цэврийн өрөөнд гар ариутгагч, савангуудыг байршуулсан. Энэ жил шалгуулагч өөрөө маск, бээлий зэргийг бэлтгэн ирэх шаардлагатай. Дамжуулж хэрэглэх боломжтой харандаа балруул гэх мэтийг гэрээсээ авчрах ёстой гэлээ”

Бидний ярилцаад дуусах мөчид ариутгал хийх хүмүүс ар араасаа орж ирлээ. Тэд сургуулийн өнцөг булан, анги танхим бүрийг нэг бүрчлэн ариутгах бөгөөд ариутгал хийж байх хугацаанд сургууль дотроос гарах хэрэгтэй гэж зөвлөсний үндсэн дээр бид Сүхбаатар дүүргийн шалгалтын цэг болох гуравдугаар сургуулийг зорилоо.

СЭЖИГТЭЙ ТОХИОЛДОЛ ИЛЭРСЭН НӨХЦӨЛД ТУСГАЙЛАН БЭЛТГЭСЭН АНГИД ШАЛГАЛТ АВНА

          Ерөнхий боловсролын гуравдугаар сургуулийн гадаа талбайд гурван том асар сүндэрлэх бөгөөд мөн л хүн хоорондын зай барих тэмдэг, тэмдэглэгээг хийжээ. Сургуулийн хаалган дээр ангиуд руу орох тэмдэг тэмдэглэгээ, явах чиглэлийг план зургаар харуулсан байна. Ингэснээр шалгуулагчид аль шатаар орж, хаагуур гарах вэ гэдгийг ойлгох юм. Үүдээр нь ороход гадаа талбайтай нэгэн адилаар зай барих тэмдэг тэмдэглэгээг тавижээ. Халдвар тархах эрсдэлийг бууруулахаар сургуулийн зүүн талын шатыг дээш өгсөх баруун талын шатыг доош буухаар зохицуулсан байна. Шатны хажуу талд халуун хэмжигч, гар ариутгагчийг байрлуулсан байх агаад гаднаас орж ирэх хүмүүс сургууль руу орохдоо халуунаа үзүүлээд гараа ариутгаад орох аж.

          Тус сургуулийн ахлах анги хариуцсан менежер Д.Нямлхам “Дээрээс ирсэн тушаал шийдвэрийн дагуу бэлтгэл ажлыг 100 хувь хангаж дууссан. Шалгалт авах 25 анги танхим, хоёр тусгай анги, тусгаарлах нэг өрөөг тус тус бэлдсэн. Үүнээс гадна шууд засалтын ангийг бэлдсэн. Ингэснээрээ хүүхдүүдийг шууд дүнгээ мэдэх боломжийг бүрдүүлж байгаа юм. Бүртгэлийн дугаараар дүнг зарлах учир тухайн шалгуулагчийн дүнг бусад хүн мэдэх боломжгүй. Интернет орох боломжгүй тохиолдолд тухайн хүүхдийн гар утсанд мессежээр дүнгийн мэдээлэл очно. Шалгуулагчдыг гурван цэгт бүртгэж дотогш нэвтрүүлнэ. Нэг танхимд 15 хүүхэд шалгалт өгөхөөр ширээнүүдийг байрлуулсан. Анги болгонд гар ариутгагч, халдваргүйжүүлэгч байрлуулж халдвар хамгааллын дэглэмээ баримтлах боломжийг бүрдүүлсэн.

          Бөөгнөрөл үүсгэхгүйн тулд гурван хэсэгт хувааж орох гарах чиглэлийг тодорхой зааж өгсөн. Ариун цэврийн өрөөний ариутгал халдваргүйжүүлэлтийг тогтмол хийж, аль болох бөөгнөрөл үүсгэхгүй байх тал дээр анхаарч ажилласан. Боловсролын үнэлгээний төвөөс ариутгал, халдваргүйжүүлэлт хийх ариутгалын бодисыг өгсөн. Шалгуулагчийг орохоос өмнө анги танхимыг ариутгаж, шалгалт өгч дууссаны дараа дахин ариутгана. Энэ удаагийн ЭЕШ нь тусгай ангитай гэдгээрээ онцлогтой. Шалгалтад орж байгаа хүүхдүүд дунд сэжигтэй тохиолдол илэрсэн тохиолдолд тусгай ангид шалгалтыг авна. Элсэлтийн ерөнхий шалгалт өгөх гэж байгаа шалгуулагчид хувийн бэлтгэлээ сайтар базааж ирэх хэрэгтэй”гэлээ.

М.ХОНГОРЗУЛ