Манай улс өнгөрсөн хоёрдугаар сараас эхлэн иргэдээ ванцинжуулах аяныг эхлүүлсэн. Тэгвэл одоогийн байдлаар хоёр сая гаруй иргэн дархлаажуулалтад хамрагдаад байгаа гэнэ. Харин өнгөрсөн зургадугаар сарын 16-наас эхлэн өсвөр насны хүүхдүүдийг дархлаажуулалтанд хамруулж эхэлсэн. Энэ цагаас хойш эцэг, эхчүүдийн дунд “Хүүхдэдээ вакцин хийлгэх нь зөв үү, буруу юу”, “Ямар вакцин хийлгэвэл зүгээр вэ” зэрэг яриа өрнөх болсон. Иймээс эргэлт.мн мэдээлийн сайт дархлаажуулалтын цэгүүдийн ажлын явц, вакцинд хамрагдаж буй иргэдийн идэвх зэргийг сурвалжиллаа.

СҮХБААТАР ДҮҮРГИЙН ДАРХЛААЖУУЛАЛТЫН ЦЭГ АЧААЛАЛ БАГАТАЙ БАЙНА

        Бид Сүхбаатар дүүргийн дархлаажуулалтын цэгийг зорилоо. Саяхныг хүртэл олны хөлд дарагдаж, дараалалд зогссон иргэд вакцинаа хийлгэж чадалгүй маргааш нь дахин ирэх ажил болдог байсан бол энэ удаад тус дархлаажуулалтын хүнгүй шахам байв. Эмч, сувилагч нар нь дуугүй дүнбийж, ширээний ард сууцгаана. Бүртгэлийн ажилтан дэвтэр рүүгээ өнгийн харснаа “Өглөөнөөс хойш ердөө 32 хүн вакцинжуулалтад хамрагдсан байна” гэв. Сүхбаатар дүүргийн нэгдсэн эмнэлэгийн Хүүхдийн тасгийн эмч Х.Одонбаяр вакцинжуулалтын талаар “Манайх ажлын өдрүүдэд 09:00-17:00 цаг, амралтын өдрүүдэд 10:00-15:00 цаг хүртэл иргэдэд үйлчилж байгаа. Өдөрт дунджаар 70 орчим хүн дархлаажуулалтанд хамрагддаг. Насны бүлгээр нь ангилбал 12-17 насны хүүхдүүд гол төлөв вакцинжуулалтад хамрагдаж байна. Мөн ойрын өдрүүдэд жирэмсэн болон хөхүүл эмэгтэйчүүд дархлаажуулалтанд хамрагдах нь нэмэгдсэн. Харин өндөр настнуудын идэвх суларч ганц, хоёр хүн л ирэх боллоо. Үйлчлүүлэгчид виросель, файзер, спутник-v вакцин хийдэг. Гэвч иргэд ихэвчлэн файзер вакцин хийлгэх сонирхолтой байна. Үзлэгийн гурван эмч, дөрвөн сувилагчийн бүрэлдэхүүнтэй ажилладаг. Долуулаа байгаа учир цайны цаг гаргаж чадахгүй л ажиллаж байна. Иргэдэд вакцин тарьж байгаа өрөө  хүйтэн болохоор тариулсны дараа 15 минут ажиглаад иргэдийг буцааж байгаа. Бид өдөрт 100 вакцин хийх боломжтой. Мөн вакцины нөөц хангалттай хэмжээнд бий” гэв.

Тус дархлаажуулалтын цэгт 30 гаруй минут болоход нэг ч хүн ирсэнгүй. Иймээс бид Баянзүрх дүүргийн дархлаажуулалтын цэг буюу Улсын хоёрдугаар төв эмнэлэгийг зорьсон юм.

СУРГУУЛИУДАД БАЙСАН ВАКЦИНЖУУЛАЛТЫН ЦЭГҮҮДИЙГ ХААСАН УЧИР БАЯНЗҮРХ ДҮҮРЭГТ АЧААЛАЛ ИХЭССЭН

        Вакцин хийлгэсэн хүмүүс хүлээлгийн сандал дээр эгнэн сууж, зарим нь хана дагуу зогсох аж. Вакцын хийлгэсэн даруйдаа ажиглалтын 15 минутаа гүйцээлгүй хаяад гарах хүмүүс ч цөөнгүй байв. Ажиглалтын цагаа хүлээж уйдсан бололтой 50 орчим настай эмэгтэй “Эгчийн дүү ямар вакцин хийлгэх гэж байна даа” гэж сониучирхан асуув. Тэрбээр вакцины хоёрдугаар тундгаа хийлгэж буйгаа “Би нэгдүгээр тунгаа өнгөрсөн тавдугаар сарын 20-нд хийлгэсэн. Вакцин тасарсны улмаас хугацаа нь болсон ч хоёрдугаар тунгаа хийлгэж чадалгүй өдий хүрлээ. Тэр дундаа бас коронавирусээр өвчлөөд амжсан. Эдгээд 14 хонож байгаа байна. Халдвар авсан ч дахин тусах магадлалтай болохоор вакцинаа хийлгчихэе гэсэн бодолтой ирсэн юм” гэв. Түүний ар талд суух 16 орчим насны хоёр хүү суух бөгөөд нэг нь “Миний толгой эргээд байна аа. Ухаан алдах гээд байх шиг байна” гэвэл нөгөөх нь “Наадах чинь хариу урвал илэрч байгаагийн шинж тэмдэг” хэмээн хэнэггүйхэн инээнэ.

        Бид вакцины хариу урвал гарах үед ямар арга хэмжээ авдаг талаар Улсын хоёрдугаар төв эмнэлэгийн Эрүүл мэндийн нийгмийн ажилтан Ш.Ган-Саруулаас тодруулахад “Дархлаажуулалт хийгдэж эхэлснээс хойш буюу өнгөрсөн хоёрдугаар сараас хойш даралт ихсэх, ухаан алдаж унах 12 тохиолдол гарсан. Бид хүн тус бүрийн биеийн онцлогт тохируулан яаралтай тусламж үзүүлж байгааа. Манайх ачаалал ихтэй өдөр 500-600 хүнтэй байдаг. Баянзүрх дүүргийн сургуулийн вакцинжуулалтын цэгүүдийг хаасантай болохоор манайхыг зориг иргэд ихсэж, ачаалал нэмэгдсэн. Манай дүүрэгт виросель, файзер гэсэн хоёр төрлийн вакцин хийж байна.Хариу урвал бага үзүүлдэг, үр нөлөө сайтай болохоор хүмүүс файзер вакцин хийлгэх дуртай байдаг. Өнөөдрийн байдлаар 300 хүнийг дархлаажуулалтад хамруулсан. Вакцин хийлгэснээс хойш ажиглалтын хугацаанд иргэдийн биед ямар нэгэн өөрчлөлт гарсан тохиолдолд яаралтай түргэн тусламжийн эмч үзлэг хийж байгаа” гэв.  Дархлаажуулалт хийх цаг дуусахтай зэрэгцэн ээжийгээ дагуулсан эмэгтэй гүйхээрээ ирэв. Тэрбээр “Ашгүй яг амжлаа шүү хэмээн” баярлах аж. Оройтож ирсэн хоёр Чингэлтэй дүүргийн эмнэлэгт хоёрдугаар тунгаа хийлгэхээр очсон боловч чадаагүй гэнэ. Тэрбээр “Чингэлтэй дүүргийн дархлаажуулалт хариуцсан мэргэжилтэн нь “Хоёр хүн бүрдэж байж вакцин хийнэ” гээд биднийг цаг гаран  хүлээлгэлээ. Нэг вакцинд хоёр хүний тун байдаг болохоор заавал өөр нэг хүн байх шаардлагатай юм билээ. Даан ч ээжээс өөр вакцин хийлгэх хүн олдсонгүй. Дүүрэг дүүргийн эмч нартай ярьж байж танайд вакцин хийж байгааг сонсоод ирлээ. Ээж маань 80 настай. Уг нь нэгдүгээр тунгаа өнгөрсөн тавдугаар сарын 4-нд хийлгэсэн юм. Дөнгөж вакцин хийлгэснийхээ дараа хатгаа туссан болохоор хоёрдугаар тунгаа хийлгэж чадаагүй юм. Манай хорооны ахлагч, өрхийн эмнэлгийнхэн дархлаажуулалтын цэгүүд хаана, хаана ажиллаж байгаа талаар юу ч мэдэхгүй байна” хэмээн бухимдалтай нь аргагүй ярив.

Манай хорооны ахлагч, өрхийн эмнэлгийнхэн дархлаажуулалтын цэгүүд хаана, хаана ажиллаж байгаа талаар юу ч мэдэхгүй байна

        Энэ талаар Чингэлтэй дүүргийн эрүүл мэндийн төвийн дархлаажуулалт хариуцсан мэргэжилтэн Б.Эрдэнэтуяагаас тодруулахад “Манай дүүрэг дархлаажуулалтын хоёр цэгтэй. Энэ цэгт эмч, сувилагч нийлсэн гурван хүн ажилладаг. Дүүргийн зорилтот бүлгийн иргэдийн 80-90 хувь нь вакциндаа хамрагдсан болохоор хүн цөөтэй байна. Өнөөдрийн байдлаар нэг ч хүн ирсэнгүй. Нэг савалгаандаа хоёр тун байдаг болохоор ядаж хоёр хүн ирсэн тохиолдолд вакцин хийдэг. Тэгэхгүй бол нэг тун вакцин хаягдах болно” гэсэн тайлбар өгөв.

М.ХОНГОРЗУЛ