-Автомашиныхаа маркийг нь ахиулах сонирхолтой “Ланд Круйзер-2020” “хөлөглөгчид” үзүүлэнгийн талбайд “үзүүлэн” болж байв-

          “Таван Богд” ХХК-ийн үзүүлэнгийн талбайн авто зогсоолд “дэрийсэн” шинэ, хуучин “Ланд Круйзер-200” маркийн автомашинууд эгнэжээ. Эгнэсэн машинуудаас бууж, ирэх жолоочид ихэвчлэн нарны шил, углаашаар “гангарч”, нэг нэгэнтэйгээ америк долларын ханш ярьж, хааяа Монголын эдийн засгийн сэдэв рүү “халтирч” орж байх. Нэгэнтэйгээ ярьж байгаа ярианаас нь сонсоход шинэ загварын “Ланд Круйзер-300” автомашиныг худалдан авах гэсэн ямар нэгэн шалтгааны улмаас шинэ тэрэг “хөлөглөх” зорилго нь бүтэхгүй байгаа гэнэ.

          Үзүүлэнгийн талбайн зогсоолоор дамжиж, том оврын “Норд Бенз”, “Приус” маркийн автомашинууд өнгөрөх бөгөөд зарим нэг нь машинаа зогсоолд нь байрлуулж байгаа харагдана. Залуус дундаа л “од” машинд тооцогддог “Приус-20”, “Приус-30” маркийн автомашинууд тэнд нэг л “сүргүй” харагдаж байлаа. Тэднийг тойрсон “Ланд Круйзер-200”, “Лексус-570” гээд автомашин сонирхогчдын “луугар”-т тооцогддог “баавартай” тэрэгнүүд байгаа нь тэднийг ийн харагдахад хүргэнэ. Ярианаас нь шинжихэд “Приус” маркийн машины жолоочид сэлбэг, засвар, оношилгооны ажлаар, зарим нь үнэ ханш асуух гэж ирсэн бол “Ланд Круйзер”-ын жолоочид бусдаасаа арай өөр байв.

          Өөр өөр “Ланд Круйзер”-ээс буусан жолоочид нарийн тамхи асааж, амандаа зуучихаад бүгд тамхины цэгийг зүглэсэн юм. “Таван Богд” ХХК-ийн үзүүлэнгийн талбайд нэгэндээ “сайрхаж”, томрох гэсэн улсууд цугласан аж. Нарны шилээ хамар дээрээ “тохчхоод”, амандаа янжуур зууж, баруун гартаа түрийвчээ барьсан нэг эр “10 мянган ногоон байвал яаж байна. Би чам руу 10-ыг л шилжүүлье. Чи тэр мөнгөөр яана уу, ийнүү өөрөө мэд. Гэхдээ миний ажлыг болгож өгнө шүү” хэмээн гар утсаар ярьж байлаа. Хааш хаашаа гурван метр орчим жижиг тамхины цэг дотроос албаар бусдад сонсгох гэж байгаа мэт чанга чанга хөхөрч инээх аж.

          Өнөөх “сайрхуу” эрийг утсаар ярьж дууссаны дараа л “Ланд Круйзер” “хөлөглөгчид”-ийн яриа нэг сэдэвт шилжив. “Тэр шинэ “Ланд 300” гэж ёстой янзын амьтан байна билээ. “200”-г бодвол олон ч юм нь шинэчлэгдсэн байна гэсэн. Би ч энэ муу “Ланд 200” маркийг бараг сүүлчийн 10 жилд өнгө өнгөөр сольж, унасаар залхаад байсан юм. Тэгтэл ашгүй “Тоёота” шинэ маркийг нь танилцуулж таардаг шүү” гээд л тамхины цэгийн модон сандал дээр хөндөлдөж, суух махлаг эр хэлсэн юм. Бусад нь ч амыг нь дагуулаад “бурж” байгаа бололтой “Өө ёстой сайхан эд. Нэг унаад хаазаа гишгэвэл сайхан хүүхэн хажуудаа суулгаагүй байсан ч ниснэ л гэж мэд” гээд л мар мар инээлдэж байлаа. Тэднийг ийн инээлдэж суухад “Лексус-570” дэргэдүүр нь ихэд хүчтэй хаазалсаар орж ирэв. Нөгөө тамхины цэг дээрх хэд ч “Яадаг муу п.... вэ. Хүний унадаггүй юм уначихсан юм шиг” гээд эргэж, зогсоогүй машины цаанаас хараалын үгс “урсгаж” гарав. Энэ мэт автомашиныхаа маркийг нь ахиулах сонирхолтой “Ланд Круйзер-2020” “хөлөглөгчид” үзүүлэнгийн талбайд өөр нэгэн “үзүүлэн” хийж байх нь тэр.

-“Монголд орж ирсэн “Ланд Круйзер-300” маркийн автомашиныг бүгд худалдаалж дууссан”-

          “Таван Богд” ХХК-ийн үзүүлэнгийн талбайн ард, урд хоёр талдаа оффистой. Ард талд нь сэлбэг, засвар, оношилгооны төв байрладаг аж. Автомашины үзүүлэнгийн талбайд “үзүүлэн” хийж байсан хүмүүсийн дэргэдүүр “нисэх” шахам өнгөрсөн “Лексус-570”-ын жолооч ч энд ирж, автомашинаа угаалгаж байгаа харагдлаа.

          Харин урд талынх оффисыг үзүүлэнгийн талбайн төв гэж хэлж болно. Уг оффист худалдаа, үйлчилгээ, маркетингийн ажилтнууд нь байрлах. Бид өнгөрсөн зургадугаар сард Япон Улсын “Тоёота Моторс” компаниас танилцуулсан “Ланд Круйзер-300” автомашин болон цаг үеийн нөхцөл байдалтай холбоотой борлуулалт, иргэдийн худалдан авалтын талаар тодруулахаар маркетингийн алба руу нь орсон юм. Харин дотогш ортол маркетингийн албаны хоёр эмэгтэй ажилтан ээлж дараалан нэгэнтэйгээ “ам уралдаж”, “Манайх тэгж ярилцлага, тодруулга өгдөггүй” гэх нь тэр. Лавшруулж асуухад “Манайх ярилцлага өгдөггүй. Харин “Ланд Круйзер-300”-гийн тухайд анхны захиалга нь дуусаад аль долдугаар сард бүгд ирээд худалдаалаад дууссан. Дараагийн захиалга ирэх гэж хил дээрх асуудалтай холбоотойгоор удаж байна” гэснээс өөр хариу хэлээгүй юм.

-“Ланд Круйзер-300” маркийн авто машин 188.1-330 сая төгрөгийн үнэтэй байна-

          Монгол Улсад “Тоёота Моторс” компанийн албан ёсны хоёр дилер байдаг нь “Таванбогд Моторс” ХХК, “Мөнххада” ХХК. Тэгвэл Монголд “Ланд Круйзер-300” маркийн 120 ширхэг автомашиныг оруулж ирэх урьдчилсан захиалгыг зургадугаар сарын 10-нд “Мөнххада” ХХК эхлүүлэхэд урьдчилсан захиалга хоёр хоногийн дотор дүүрсэн. Харин үүний дараа “Таванбогд Мотос” ХХК “Ланд Круйзер-300” маркийн 200 ширхэг автомашины урьдчилсан захиалга эхлүүлэхэд ердөө хоёрхон цагийн дотор захиалга дууссан байдаг.

          “Таванбогд Моторс” ХХК-д “Ланд Круйзер-300” автомашины захиалга хөдөлгүүр, загвараасаа хамаарч, 118.1-293.9 сая төгрөгийн үнэтэй байна. “Мөнххада” ХХК оруулж ирсэн “Ланд Круйзер-300 GX-R” маркийн автомашинаа 197.4 сая төгрөгөөр борлуулсан байдаг. Харин “Үнэгүй.мн” онлайн худалдааны дэлгүүрт шинэ маркийн уг автомашин 310, 330 сая төгрөгөөд үнэлэгдээд байгаа юм.