Цэргийн алба хаагчид нэгнээ зодсон асуудлаар мэдээлэл өгч байна. Энэ үеэр Дотоодын цэргийн штабын дарга, бригадын генерал Р.Чингис  “Олон аавын хүүхдүүдийг хугацаат цэргийн албанд татахдаа эр хүн, эх орны хүү болоосой гэж бид хүсдэг. Бид цэргийн алба хаасан учраас зовлонг нь мэддэг тиймээс дүрмийн бус харилцааг хэзээ ч хүлээн зөвшөөрдөггүй. Өчигдөр цацагдсан үйл явдал амрах команд өгсний дараа камер байхгүй газар болсон. Тус бичлэг дээр гарч байгаа залуус бүгд нэг оны цэргүүд, бүгд бага дарга нар. Гар хүрсэн алба хаагч түрүүч, нөгөөх нь бага түрүүч юм билээ. Бидний авсан мэдээллээр хоорондын харилцаанаас болж маргалдсан гэсэн. Шалгалтын ажиллагааг хууль сахиулах байгууллага хийж байгаа. Иргэд, цэргийн байгууллага хүн зовоодог гэсэн бодолтой байдаг, тийм биш. Бид хэдий хяналттай ажиллаж байгаа ч бидний нүднээс далд хэрэг болж байна. Өчигдөр зураг дарсан хүнд үнэхээр баярлаж байна, бидэнд ийм хяналт хэрэгтэй байсан. Цэргийн хууль, дүрмийн дагуу буруутай хүмүүст хатуу хариуцлага тооцно. Хүний эрхийн комисстой хамтарч ажиллана. Цэргийн байгууллагын алба хаагчид хүний алдаг, зоддог хүмүүс биш бид хүүхэдтэй, гэр бүлтэй, зүрх сэтгэлтэй хүмүүс” гэв.