ОБЕГ: Дэд бүтцийн салбарын чадавхыг бэхжүүлэх, техник туслалцааны хамтын ажиллагааны талаар хэлэлцэж байна

2025-12-10, 23

БНЭУ-ын Гамшиг тэсвэртэй дэд бүтцийн эвсэл олон улсын байгууллагатай хамтран Онцгой байдлын ерөнхий газраас “Гамшигт тэсвэртэй дэд бүтэц” сургалтыг энэ сарын 9-10-ны өдрүүдэд зохион байгуулж байна.

Нээлтийн ажиллагаанд ОБЕГ-ын дарга, хошууч генерал Г.Ариунбуян, БНЭУ-аас Монгол Улсад суугаа Онц бөгөөд Бүрэн эрхт Элчин сайд, ноён Атул Малхари Гоцурвэ нар оролцож, үг хэллээ.

Хошууч генерал Г.Ариунбуян хэлсэн үгэндээ “Монгол Улсын Засгийн газар НҮБ-ын Тогтвортой хөгжлийн зорилгын 9 дэх буюу “эдийн засгийн хөгжил, хүний сайн сайхан аж байдлыг дэмжих чанартай, найдвартай, тогтвортой, тэсвэртэй дэд бүтцийг хөгжүүлэх” зорилго, “Гамшгийн эрсдэлийг бууруулах чиглэлээр 2015-2030 онд хэрэгжүүлэх Сэндайн үйл ажиллагааны хүрээ баримт бичгийн “гамшгийг тэсвэрлэх чадавхыг сайжруулж 2030 он гэхэд гамшгийн улмаас нэн чухал дэд бүтэц, суурь үйлчилгээнд учрах хохирлыг бодитой бууруулах” гэсэн IV зорилтыг бүрэн дүүрэн дэмжиж “Алсын хараа 2050” Монгол Улсын урт хугацааны хөгжлийн бодлогод “Хотын нэн чухал дэд бүтцийг хүчитгэх, өргөтгөх, дахин барих, тогтвортой ажиллагааг нь хангах замаар нийслэл болон хүн ам ихээр төвлөрсөн хот, суурин газруудад гамшигт тэсвэртэй дэд бүтэц бий болгох” зорилгыг дэвшүүлсэн. Дэд бүтцийн гамшигт тэсвэртэй байдлыг хангах нь төр, засгийн бодлого, үйл ажиллагааны тэргүүлэх чиглэлийн нэгд тооцогдож, энэ асуудлаар дээд түвшний манлайлал үзүүлж, ихээхэн анхаарал хандуулж ирсэн. Үүний нэг тод илрэл нь АНУ-ын Нью-Йорк хотноо 2019 онд зохион байгуулсан “НҮБ-ын Уур амьсгалын өөрчлөлтийн эсрэг ажиллагааны дээд хэмжээний уулзалт”-ын үеэр БНЭУ-ын санаачилгаар байгуулагдсан “Гамшигт тэсвэртэй дэд бүтэц эвсэл”-ийн анхны үүсгэн байгуулагч гишүүн орны нэг нь Монгол Улс болсон билээ. Энэхүү сургалт нь нэн чухал дэд бүтцийн салбарын гамшигт тэсвэртэй байдлыг нэмэгдүүлэх арга замыг тодорхойлох, дэд бүтцийн салбарт чадавхыг бэхжүүлэх, техник туслалцааны хамтын ажиллагааны боломжийг хэлэлцэх зорилгоо амжилттай биелүүлж, хамтын ажиллагааны олон боломжийг бий болгоно гэдэгт итгэж байна” гэлээ.

Сургалтад ОБЕГ, Сангийн яам, Хот байгуулалт, барилга, орон сууцжуулалтын яам, Зам тээврийн яам, Эрчим хүчний яам, Стандарт хэмжилзүйн газар, Барилга хөгжлийн төв, нийслэлийн Засаг даргын тамгын газар, Улаанбаатар хотын захирагчийн ажлын алба, нийслэлийн Хот байгуулалт, хотын стандартын газар, Геодези усны барилга, байгууламжийн газар, ШУТИС, Монголын барилгын инженерүүдийн холбоо, БНЭУ-аас Монгол Улсад суугаа ЭСЯ, Азийн хөгжлийн банкны нийт 20 гаруй холбогдох албан тушаалтнууд оролцож байна.

Энэ үеэр гамшигт тэсвэртэй дэд бүтцийг ойлгох нь, дэд бүтцийн тэсвэртэй байдал ба тэсвэртэй байдлын үр ашиг, Монгол Улсын гамшгийн эрсдэлийн талаарх ойлголт, гамшигт тэсвэртэй дэд бүцийг дэмжих хөтөлбөр, санаачлагууд сэдвийн хүрээнд мэдээлэл солилцож, бүлгийн дадлагаар харилцан туршлага судалж байна.

ОБЕГ: Дэд бүтцийн салбарын чадавхыг бэхжүүлэх, техник туслалцааны хамтын ажиллагааны талаар хэлэлцэж байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.