Гэрэлтсэн царай, толигор арьс бол зөвхөн гоо сайхны асуудал биш өөртөө итгэх итгэлийг нэмэгдүүлдэг, өөрийгөө хайрлаж байгаагийн илэрхийлэл болдог. Арьсны өнгө төрөлхийн байдаг ч бохирдол, нарны туяа, насжилт, буруу арчилгаа зэрэг олон хүчин зүйлээс болж арьс бараантаж, жигд бус өнгөтэй болох нь бий. Харин үүнийг буцаан сэргээж, өнгөлөг царайтай байх бүрэн боломжтой. Гэхдээ түргэн хугацаанд цайруулна гэх хүчтэй, химийн найрлагатай бүтээгдэхүүн хэрэглэх нь эрсдэл дагуулдаг тул арьсанд зөөлөн, аюулгүй үр дүн өгөх 10 аргыг бид та бүхэнд танилцуулж байна.

СҮҮНИЙ ХҮЧИЛ ДЭЭР СУУРИЛСАН ЗӨӨЛӨН АРЧИЛГАА

Сүүнд агуулагдах лактын хүчил нь байгалийн гуужуулагч төдийгүй меламины ялгарлыг удаашруулж, арьсыг цайруулах үйлчилгээтэй. Үр дүн нь тогтмол хэрэглэсэн тохиолдолд долоо хоногийн дотор мэдрэгдэж эхэлдэг.

Хэрэглэх заавар:

Хөвөнд бүлээн сүү шингээгээд нүүрээ арчиж, 10-15 минут байлгасны дараа угаах. Эсвэл тараг, гурил хольж маск хэлбэрээр хэрэглэж болно.

НИМБЭГ БА ЗӨГИЙН БАЛ

Нимбэг нь хүчтэй байгалийн цайруулагч бол зөгийн бал нь арьсыг тайвшруулж, чийгшүүлдэг. Хэрвээ та зөв хэрэглэхгүй бол арьс цочроох эрсдэлтэй.

Хэрэглэх арга:

1:1 харьцаатайгаар нимбэгийн шүүс болон зөгийн балыг хольж нүүрэндээ тавьж, 10 минутын дараа угаах. Түрхсэний дараа нарны гэрэлд гарахгүй байх хэрэгтэй. Хэрвээ та эмзэг арьстай бол туршилтаар жижиг хэсэгт түрхэж харшилж байгаа эсэхийг шалгаарай.

ОВЬЁОС БОЛОН ТАРАГТАЙ МАСК

Арьсны үхэжсэн эсийг арилгаж, гэрэлтсэн өнгийг сэргээхэд хамгийн байгалийн арга бол овьёос. Тарагтай хослуулах нь арьсыг зөөлрүүлж, өнгөлөг болгодог.

Хэрэглэх заавар:

Овьёосыг кофе нунтаг шиг болтол нь нүдэж, тарагтай хольж маск болгоно. 10 минутын дараа хурууны өндгөөр зөөлөн үрж угаагаарай.

SPF ХАМГААЛАЛТ  ӨНДӨР БҮТЭЭГДЭХҮҮН ХЭРЭГЛЭХ

Арьсаа цайруулах гэж оролдож буй хүн хамгийн түрүүнд нарны тос хэрэглэх дадлыг хэвшүүлэх хэрэгтэй. Нарны хэт ягаан туяа нь арьс борлуулах, нөсөө толбо үүсгэх хамгийн гол шалтгаан юм.

Хэрэглэх заавар:

Өдөр тутам SPF 30–50 бүхий тос хэрэглэж, 2-3 цаг тутамд дахин түрхээрэй. Бороотой, үүлтэй өдөр ч гэсэн та арьсаа хамгаалаарай.

АРЬСАА ЧИЙГШҮҮЛЭХ

Чийг дутагдсан арьс нь эрт хөгширч, өнгөө алдаж харагддаг. Харин сайн чийгшсэн арьс гэрэлтэж, цайвар өнгөтэй харагдана.

Аргачлал:

Өглөө, оройдоо чийгшүүлэгч хэрэглэж, шаардлагатай бол нэмэлт серум, чийгшүүлэгч маск хэрэглэнэ.

ВИТАМИН C СЕРУМ

Витамин C нь меланины ялгарлыг дарангуйлж, арьсны өнгийг жигдрүүлдэг. Энгийн хэрэглээний арьс арчилгаанд хэрэглэх боломжтой, бөгөөд үр дүн нь 2-3 долоо хоногт анзаарагдана.

Хэрэглэх заавар:

Нүүр цэвэрлэсний дараа витамин C серум түрхэж, дээр нь чийгшүүлэгч давхарлана. Эхлээд долоо хоногт 2 удаа хэрэглэж, бага багаар нэмэгдүүлж хэрэглэнэ.

АЮУЛГҮЙ НАЙРЛАГАТАЙ БҮТЭЭГДЭХҮҮН ХЭРЭГЛЭХ

Сүүлийн жилүүдэд ниацинамид, арбутин зэрэг арьс цайруулах үйлчилгээтэй, аюул багатай найрлагууд олноор хэрэглэгдэж байна. Ниацинамид (Vitamin B3)  тослогийг тэнцвэржүүлж, арьсны өнгийг цайруулна. Арбутин – меланины ялгарлыг бууруулж, өнгө сэргээх үйлчилгээтэй. Эдгээр найрлага агуулсан бүтээгдэхүүнийг эмчийн зааваргүйгээр хэрэглэж болох ч хэрэглэхдээ тунг анхаарах хэрэгтэй.

АРЬСАА ЦЭВЭРЛЭЖ, ГУУЖУУЛАХ

Арьс арчилгааны эхний алхам бол арьсаа цэвэрлэх билээ. Зөвхөн арьсаа арчих биш гуужуулах нь илүү их үр дүнтэй.

Хэрэглэх заавар:

Өдөр бүр арьсаа цэвэрлэх. Долоо хоногт 1-2 удаа зөөлөн гуужуулагч хэрэглэх. Бохирдолгүй, амьсгалдаг арьс илүү цайвар, гэрэлтсэн харагддаг.

ЗӨВ ХООЛЛОХ

Гоо сайхан зөвхөн гаднаасаа биш дотроосоо эхэлдэг. Витамин, антиоксидант ихтэй хүнс нь арьсыг сэргээж, өнгө нэмдэг. Жимс, ногоо, самар болон эрүүл хооллолт арьсанд нөлөөлдөг. Мөн та өдөрт 1.5-2 литр ус уух дадлыг хэвшүүлээрэй.

Гидрохинон, кортикостероид агуулсан цайруулагч бүтээгдэхүүнүүд богино хугацаанд үр дүн өгч болох ч удаан хэрэглэвэл арьсыг нимгэрүүлж, батга, харшил үүсгэдэг. Арьс цайруулах эмчилгээ хийх гэж байгаа бол заавал эмчийн зөвлөгөө авах хэрэгтэй.