Цаг уурын байгууллагаас 2025 оны есдүгээр сараас арваннэгдүгээр сарын хоорондох цаг агаарын урьдчилсан төлвийг танилцууллаа. Намрын улиралд агаарын температур болон хур тунадасны хэмжээ нутгийн бүс нутгаар ялгаатай байх төлөвтэй байна.

Есдүгээр сар: Зарим бүс нутгаар дулаан, хур тунадас ахиу байна

Есдүгээр сард агаарын дундаж температур ихэнх нутгаар олон жилийн дунджаар хадгалагдах ч Өмнөговь, Дорноговь, Сүхбаатар, Дорнод, Говь-Алтай, Баянхонгор, Өвөрхангай, Дундговийн өмнөд болон Хэнтийн зүүн хэсэгт дулаан байх төлөвтэй.

Хур тунадас Өмнөговь, Дорноговийн ихэнх, Дундговийн зүүн өмнөд, Сүхбаатарын өмнөд хэсгээр дунджаас ахиу байх бол бусад нутгаар дунджийн орчим байна.

Аравдугаар сар: Баруун бүс нутгаар хүйтэн байх төлөвтэй

Аравдугаар сард агаарын температур Баян-Өлгий, Увс, Ховд, Говь-Алтайн хойд, Завхан, Баянхонгорын баруун хойд хэсгээр ОЖД-аас хүйтэн байна.

Харин Өмнөговийн зүүн, Дорноговийн өмнөд хэсгээр дулаан байх төлөвтэй.

Хур тунадасны хувьд Өмнөговийн зүүн, Дорноговь, Сүхбаатарын ихэнх болон Дорнодын өмнөд хэсгээр ахиу, бусад нутгаар дунджийн орчим байна.

Арваннэгдүгээр сар: Зүүн бүс нутгаар хүйтэрнэ

Арваннэгдүгээр сард агаарын дундаж температур Дорнод, Сүхбаатар, Хэнтийн өмнөд болон Дорноговийн хойд хэсгээр дунджаас хүйтэн, бусад нутгаар дунджийн орчим байна.

Хур тунадас нийт нутгаар олон жилийн дунджаар байх төлөвтэй байна.