Нийслэлийн Баянзүрх дүүргийн VIII хороонд хүүхэд, ахмад настнуудад дагнасан тусламж, үйлчилгээ үзүүлэх, хэвтүүлэн эмчлэх зорилгоор 160 ортой эмнэлэг барьсан ч ашиглалтад оролгүй удааширч байгаа талаар тус дүүргийн иргэд удаа дараа мэдээлж байсан. Тэгвэл үүнтэй холбоотойгоор УИХ-ын гишүүн Ж.Чинбүрэн өнөөдөр (2025.01.19) тус эмнэлэг дээр ажиллаж, иргэд, сонгогчидтой уулзан санал солилцсон юм. Энэ үеэр УИХ-ын гишүүн Ж.Чинбүрэнгээс улсын төсвөөс санхүүжүүлсэн 160 ортой шинэ эмнэлгийг яагаад ашиглалтад оруулахгүй байгаа талаар тодрууллаа.

-Баянзүрх дүүрэгт харьяа дүүргийнхээ иргэдэд үйлчилдэг улсын эмнэлэг байдаггүй. Харин энэ асуудлын шийдэл болгож 160 ортой эмнэлэг барьсан ч ашиглалтад ороогүй хэвээр байна. Хүүхэд, ахмад настнуудад дагнасан тусламж, үйлчилгээ үзүүлэх шинэ эмнэлэг ямар шалтгааны улмаас ашиглалтад орохгүй байна вэ?

     -Эмнэлгийн барилга бүрэн баригдчихсан, ашиглахад бэлэн болсон ч энэ нөөц боломжоо ашиглахгүй байна. Ашиглалтад ороход нарийн тулгамдсан асуудал байхгүй гэж харж байгаа. Өнгөрсөн хавар Ашиглалтын өмнөх захиргаа байгуулан ажиллуулж, удаа дараа холбогдох газруудад ашиглалтад яаралтай авах талаар хүсэлт тавьсан.

Баянзүрх дүүрэг 500 мянга гаруй иргэнтэй. Ханиад томууны дэгдэлт өндөр, улсын чанартай эмнэлэг байхгүй, хэвтүүлэн эмчлэх орны дараалал ихтэй, хүүхдүүдийг коридороор хэвтрүүлсэн ийм үед хэдийнэ бэлэн болчихсон энэ эмнэлгийг яаралтай ашиглаасай гэсэн иргэдтэй адил хүсэлтэй байгаа.

-Шинээр баригдсан 160 ортой эмнэлгийг ямар өртгөөр барьсан талаар тодруулахгүй юу?

     -Орчин үеийн дэвшилтэт стандарт бүхий эмнэлгийн зориулалттай энэ найман давхар барилгыг улсын төсвийн хөрөнгө оруулалтаар найман тэрбум төгрөгөөр барьсан.

-Хэрэв ашиглалтад орууллаа гэхэд шинэ эмнэлгийн тоног төхөөрөмж, боловсон хүчин бэлэн байж чадна гэж харж байна уу?

     -Миний хувьд 2023 оноос хойш энэ эмнэлгийн үйл ажиллагааг эхлүүлэхтэй холбоотойгоор санал, бодлоо хэлж, улсын төсөвт зарим хөрөнгө оруулалтыг нь тусгуулсан. Баянзүрх дүүргийн Эрүүл мэндийн газар амбулаторынхаа харьяа хэвтүүлэн эмчилдэг эмнэлэг болгоод ашиглах бүрэн боломжтой. Эрүүл мэндийн яамнаас ч хөрөнгө оруулалтаар шийдвэрлэх боломж бий. Ийм нөөц боломж байхад ашиглахгүй байгаа нь их харамсалтай байна. Тиймээс иргэд, сонгогдын хүсэлтээр ирж ажиллаж, хурдан ашиглалтад авах талаар хэлж, ярьж яваа юм.