Монгол, Вьетнамын Засгийн газар хоорондын комиссын хуралдаан боллоо

2024-11-28, 131

Худалдаа, эдийн засаг, шинжлэх ухаан, техникийн хамтын ажиллагааны Монгол, Вьетнамын Засгийн газар хоорондын комиссын 19 дүгээр хуралдаан энэ сарын 19-23-ны хооронд Ханой хотод боллоо. Хоёр орон дипломат харилцаа тогтоосны 70 жилийн ойн хүрээнд энэ удаагийн Засгийн газар хоорондын комиссын хурал болсноороо онцлог байлаа. Монголын талыг Хүнс, хөдөө аж ахуй, хөнгөн үйлдвэрийн сайд, Засгийн газар хоорондын комиссын Монголын хэсгийн дарга Жадамбын Энхбаяр тэргүүлж, Гадаад харилцааны яам, Хүнс, хөдөө аж ахуй, хөнгөн үйлдвэрийн яам, Сангийн яам, Боловсролын яам, Соёл, спорт, аялал жуулчлал, залуучуудын яамныхан оролцов.

Вьетнамын талыг Хөдөө аж ахуй, хөдөөгийн хөгжлийн сайд, Засгийн газар хоорондын комиссын Вьетнамын хэсгийн дарга Ле Минь Хоан тэргүүлж, Гадаад хэргийн яам, Үндэсний батлан хамгаалах яам, Нийгмийн аюулгүй байдлын яам, Аж үйлдвэр, худалдааны яам, Шинжлэх ухаан, технологийн яам, Тээврийн яам, Соёл, спорт, аялал жуулчлалын яам, Боловсрол, сургалтын яам, Хөдөлмөр, хөгжлийн бэрхшээлтэй иргэд болон нийгмийн асуудлын яам, Мэдээлэл, харилцаа холбооны яам, Эрүүл мэндийн яам, Хөдөө аж ахуй, хөдөөгийн хөгжлийн яам болон албаны бусад төлөөлөгчид оролцлоо. Энэ удаагийн хуралдаан нь хоёр орны “Иж бүрэн түншлэл”-ийн тухай хамтарсан тунхагт туссан ажлуудыг эрчимжүүлэх, хоёр орны бизнес эрхлэгчид хамтын ажиллагаа эхлүүлэх, хөгжүүлэхэд хоёр орны Засгийн газрын зүгээс дэмжлэг үзүүлж, эрх зүйн таатай орчныг бүрдүүлэхээр тохирлоо.

Тус улс нь Азийн дөрөв дэх том зах зээл, Монгол Улсын цагаан будааны экспортын 45 хувийг бүрдүүлдэг. Дэлхийн кофены хоёр дахь томоохон зах зээл бөгөөд манай улс кофеныхоо 35 хувийг БНСВУ-аас импортолж байна. БНСВУ нь манай улсад сайн чанарын цагаан будаа импортлох, Монголын хөрсөнд тохирсон цагаан будааны сортуудыг тариалангийн бүс нутагт турших, туршилтын тариалалтыг эхлүүлэх, мал, амьтан тэдгээрийн гаралтай түүхий эд, бүтээгдэхүүний худалдааг эрчимжүүлэхээр тогтлоо. Монгол Улс БНСВУ-д хонь, ямааны мах экспортлох, Улаанбаатар-Хочиминь чиглэлийн шууд нислэгийг 12 дугаар сард эхлэхээр боллоо. Энэ удаагийн хоёр орны Засгийн газар хоорондын комиссын хуралдаанаас гарсан шийдвэрүүд нь Монгол Улс Зүүн өмнөд Азийн 600 сая хүнтэй зах зээлд нэвтрэх таатай орчныг бүрдүүллээ.

Засгийн газар хоорондын комиссын хуралдаанаар:

-Улс төрийн харилцаа,

-Батлан хамгаалах, хууль сахиулах салбарын хамтын ажиллагаа,

-Эдийн засаг, худалдаа, хөрөнгө оруулалтын салбарын хамтын ажиллагаа,

-Хөдөө аж ахуйн салбарын хамтын ажиллагаа,

-Байгаль орчин, уур амьсгалын өөрчлөлтийн салбарын хамтын ажиллагаа,

-Шинжлэх ухаан, технологи, мэдээлэл, харилцаа холбооны салбарын хамтын ажиллагаа,

-Эрүүл мэндийн салбарын хамтын ажиллагаа,

-Зам, тээврийн салбарын хамтын ажиллагаа,

-Боловсрол, соёл, аялал жуулчлалын салбарын хамтын ажиллагаа,

-Хөдөлмөр, нийгмийн хамгааллын салбарын хамтын ажиллагааны талаар хэлэлцэж, бүхий л салбарт харилцаа, хамтын ажиллагааг өргөжин, хөгжүүлэхийн төлөө байр сууриа нэгтгэлээ.

Монгол, Вьетнамын Засгийн газар хоорондын комиссын хуралдаан боллоо

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид