Төсвийг Засгийн газарт буцаах асуудлаар УИХ-ын гишүүн Х.Ганхуяг мэдээлэл өглөө.

Тэрбээр “Төсвийн болон Хууль зүйн байнгын хорооны хамтарсан хуралдаанаар Ерөнхийлөгчийн хоригтой холбоотой төсвийн дэгийн тухай хуулийг хүчингүй болголоо. Бид анхнаасаа төсвөө Засгийн газарт буцаах ёстой байсан. Ерөнхийлөгчийн хоригийг бүхэлд нь хүлээж авсан бол заавал буцаах ёстой. Хэсэгчлэн хүлээж авсан бол хоёр дахь хэлэлцүүлэг хийх боломжтой байлаа. Цаашид УИХ-ын гишүүд төсвийг хэлэлцэнэ гэдэг Засгийн газрын бүрэн эрхэд халдсан гэсэн үг. Улсын төсвийг оруулах онцгой бүрэн эрх зөвхөн Засгийн газарт байдаг.  УИХ шууд хэлэлцээд явчихаар дараагийн Засгийн газар ямар ажил хийх вэ гэдэг асуудал үүснэ, гишүүдээсээ асууна гэсэн үг. Ажлын хэсгийн гишүүд нь дур мэдэж төсөв хасах хэрэг болно. Төсвийг Засгийн газар нь танаад оруулж ирэх хэрэгтэй.  Өмнөх ажлын хэсэг маш хариуцлагагүй ажилласан. УИХ-ын гишүүдийн 80 хувь нь шинэ болсон. Зарим гишүүд дэгийнхээ хуулийн мэдэхгүй байна. Төсөв дээр гишүүн бүр санал хэлэх боломжтой.

Үндсэн хуулиа зөрчсөн дэг батлах гэж байна. Хэрэв дэгийн хуулийн батлаад төсвийг цааш үргэлжлүүлэн хэлэлцсэн бол Засгийн газрын бүрэн эрхэд халдсан асуудал болох байсан. Ингэсэн бол дараа жил Засгийн газар хийх ажилгүй болох байлаа. Энэ удаагийн төсвийн хэлэлцүүлэгт сайд нар хариуцлагагүй ажиллалаа” гэв.