МҮХАҮТ-ын Ээлжит бус чуулган өнөөдөр болно. Тус хуралдаанаар танхимын шинэ Ерөнхийлөгчийг сонгох нөхөн сонгууль явагдах юм. Тэгвэл тус танхимын Ерөнхийлөгчид нэр дэвшиж байсан МҮХАҮТ-ын Гүйцэтгэх захирал Т.Дүүрэнг өчигдөр саатуулсан байна. Түүнийг ямар үндэслэлээр саатуулсан болохыг АТГ-аас тодруулахад “Т.Дүүрэнг 30 хоног таслан хорих шийдвэр өчигдөр Чингэлтэй дүүргийн шүүхээс гарсан. Харин ямар шалтгаан, үндэслэлээр хорьсон болохыг мэдэхгүй” гэсэн юм.  

     Тэрбээр, өөрийн цахим хуудастаа "Намайг үндэслэлгүй хэргээр гэнэт дуудаж 30 хоног таслан хорихоор боллоо. Миний бие өөрийн биеэр бус ч Танхимын нөхөн сонгуульд оролцох эрмэлзэлтэй байгааг үүгээр мэдэгдэж байна" гэж бичжээ. Тэрбээр 1999 онд Энэтхэг улсын Делигийн Их сургуулийг санхүү, маркетингийн мэргэжлээр төгссөн. UFC группийн хүнсний үйлдвэрлэл хариуцсан дэд захирлын албыг хашиж байсан нэгэн бөгөөд 2019 онд МҮХАҮТ-ын Гүйцэтгэх захирлаар томилогдож, өнгөрөгч онд улиран томилогдсон.