“Цагийн ажил буюу даалгавар биелүүлэх ажил хийж, мөнгө өсгөж өгнө” гэх зарын дагуу мөнгө байршуулж залилуулсан гэх гомдол мэдээлэл нэмэгдэж, сүүлчийн дөрвөн сарын хугацаанд 619 гэмт хэрэг бүртгэгдэн шалгагдаж байгаа аж. Цагдаагийн байгууллагад бүртгэгдсэн хэргээс 10 тэрбум гаруй төгрөгийн хохирол учирчээ. Тодруулбал, онлайн цагийн ажил хийлгэж, мөнгө өсгөнө гэх зарын дагуу холбогдож, 12.262.459 төгрөг, цахимаар ажил хийлгэх зорилгоор 13 удаагийн гүйлгээгээр 22 сая төгрөг, телеграм хаягаар даалгавар биелүүлж, мөнгө өсгөж өгнө гэх зарын дагуу долоо удаа холбогдож, 22 сая 300 мянган төгрөгийг шилжүүлж залилуулсан байна. Иймд иргэд телеграм группэд элсэхгүй, бусад руу мөнгө шилжүүлэхгүй байх, залилах гэмт хэрэгт өртсөн тохиолдолд цагдаагийн байгууллагад нэн даруй мэдэгдэх шаардлагатайг цагдаагийнхан анхааруулж байна.