Дэлхийн хүүхдийн өдөр тохиож байна. НҮБ-ын Ерөнхий Ассамблей 1959 онд Хүүхдийн эрхийн тунхаглал, 1989 онд Хүүхдийн эрхийн тухай конвенцыг тус тус баталснаар 1990 оноос эхлэн жил бүрийн арваннэгдүгээр сарын 20-ны өдрийг Дэлхийн хүүхдийн өдөр болгон тэмдэглэж ирсэн уламжлалтай. Энэн жилийн “Дэлхийн хүүхдийн өдөр”-ийг “Ирээдүйгээ сонсъё” уриатайгаар тэмдэглэж байна. Тус өдрийг тохиолдуулан “Unicef Mongolia”-ийн гаргасан онцлох тоо баримтуудыг хүргэж байна.

2030 он гэхэд 5-9 насны найман хүүхэд тутмын нэг нь, 10-19 насны 12 хүүхэд тутмын нэг нь таргалалттай болох эрсдэл өндөр байна.

Өсвөр насны хүүхдүүдийн тэн хагас нь хичээлээс гадуурх үйл ажиллагаа, сургуулийн клубүүдэд оролцож чадахгүй байна.

Хөгжлийн бэрхшээлтэй 11300 хүүхдийн 4200 нь сургууль, сургуулийн өмнөх боловсролд хамрагдаж чадахгүй байна.

Улаанбаатар хотын гэр хороололд нийт хүн амын 60 хувь амьдардаг. Гэр хороололд амьдарч буй бага насны хүүхдүүд сургуулийн өмнөх боловсролд хамрагдах магадлал 40% хүртэл бага байна.

Зүрх судасны өвчлөл нь таргалалт, даралт ихсэх, цусан дахь хүчилтөрөгчийн дутагдал зэргээс үүдэлтэй бөгөөд Монгол Улсын хүн амын нас баралтын тэргүүлэх шалтгаан юм.

Улаанбаатар хотын гэр хорооллын айл өрхийн 95% нь гүний ус болон хөрсийг бохирдуулдаг нүхэн жорлон ашиглаж байна.

Амны хөндийн өвчлөл, тэр тусмаа шүд хорхойтох нь 300 гаруй төрлийн өвчлөлийг үүсгэдэг. Манай улсын 2-12 насны хүүхдүүдийн дунд шүд цоорох өвчлөл хамгийн түгээмэл бөгөөд энэ насны гурван хүүхэд тутмын хоёр нь шүд цооролттой байна.

Манай улсад 3-5 насны хүүхдүүдийн  26 орчим хувь нь цэцэрлэгт хамрагдаж чадахгүй байна

Алслагдсан хөдөө орон нутагт амьдарч буй хоёр хүүхэд тутмын нэг нь сургуулийн өмнөх боловсролд хамрагдаж чадахгүй байна.