Сэтгүүлч Н.Өнөрцэцэгийн ар гэрийнхэн хэлмэгдэгсдийн хөшөөний урд шүүх хурлыг нээлттэй явуулахыг хүсэж буйгаа илэрхийлэн суулт зарлахаа мэдэгдлээ. Тус үйл явдалтай холбоотойгоор Н.Өнөрцэцэгийн ээж М.Алдартуяа, ах мэдээлэл өглөө.

Тэрбээр “Охин маань хоригдоод гурван сар гаруй болж байна. Давж заалдах шүүх хурал нь арваннэгдүгээр сарын 7-нд гэж товлогдсон. Шүүх хурлыг хаалттай хийнэ гэж байна, шүүх хурлыг нээлттэй хийлгэхийн тулд суулт зарлаж байна. Өмнөх шүүх хурлын шийдвэрийг сонсоод сэтгэл үймрээд хэцүү байсан. Охинтойгоо уулзаагүй байгаа” гэлээ.

Н.Өнөрцэцэгийн ах “Анхан шатны шүүхээр таслагдсаны дараа 100 гаруй хоног хоригдлоо. Ар гэрийн зүгээс төрийн нууцтай холбоотой хэргийг нь хаалттай хэлэлцээд бусад хэргийг нь нээлттэй хийгээсэй гэж хүсэж байна. Хүүхдүүд, аавын байдал хэцүү байна. Аав саяхан эмнэлэгт хэвтсэн учраас суулт зарлахад ирж чадсангүй. Өмгөөлөгчид шүүх хурлыг нээлттэй явуулахад хэрэгтэй гэсэн. Зөв шийдвэр гаргана гэдэгт шүүхдээ итгэж байна. Н.Өнөрцэцэгт хэрэг овоолж байна” гэв.