Отгонтэнгэр Их сургууль жил бүрийн багш нарын баярыг угтан “Дээд боловсролын шинэчлэл” сэдвийн хүрээнд эрдэм шинжилгээний хурал зохион байгуулдаг уламжлалтай. Багш нарынхаа эрдэм шинжилгээ, сургалт, судалгааны ажлын чанарыг сайжруулах, ахиц, үр дүнд дүн шинжилгээ хийх, түүнийг практикт нэвтрүүлэх зорилготой юм. Энэ жилийн хурал “Багш суралцагчдын сургалт, судалгааны ажлын чанар, үр өгөөжийг нэмэгдүүлэх арга зам” сэдвийн хүрээнд нийт илтгэгчдийн судалгааны ажлыг хэлэлцэж, олон шинэлэг санаа, санаачилгыг хуваалцсан юм.

          Хурлын үндсэн илтгэлийг Боловсролын хүрээлэнгийн эрдэмтэн нарийн бичгийн дарга, доктор профессор С.Санжаабадам, эрдэм шинжилгээний ажилтан Г.Түвшинжаргал нар “Боловсрол судлалын нэг сэдэвт бүтээлд хийсэн шинжилгээ, үр дүн” сэдвээр хэлэлцүүлсэн юм. Энэ жилийн эрдэм шинжилгээний хурлын илтгэлүүд улсын их дээд сургуулиуд болон олон улсын дээд боловсролын байгууллагуудын харьцуулсан судалгаа, цахим сургалтын чанарын үнэлгээ, оюутны дасан зохицлын судалгаа зэрэг өргөн хүрээний сэдвүүдийг хамарсан цар хүрээ, ач холбогдол өндөртэй, цахимаар зохион байгуулагдсанаараа онцлогтой . Энэ жил Отгонтэнгэр их сургуулийн үүсэн байгуулагдсан 30 жилийн ой тохиож байгаа юм.